ಭಾರತೀಯ ಸೇನೆಗೆ ತನ್ನದೇ ಆದ ಘನತೆ ಇದೆ, ಶೌರ್ಯ, ವೀರತೆಯ ಇತಿಹಾಸವಿದೆ. ಜಗತ್ತಿನ ಶಕ್ತಿಶಾಲಿ ಸೇನೆಗಳಲ್ಲಿ ಭಾರತೀಯ ಸೇನೆ ಮುಂಚೂಣಿಯಲ್ಲಿದೆ. ಭಾರತೀಯ ಸೇನೆ ಯಾವಾಗಲೂ ರಾಷ್ಟ್ರೀಯ ಏಕತೆಯ ಪ್ರತೀಕವಾಗಿದೆ. ದೇಶದಲ್ಲಿ ಈ ಹಿಂದೆ ರಾಜಕೀಯ ಕಲಹ ಅಥವಾ ದ್ವೇಷದ ಭಾವನೆ ಇದ್ದರೂ, ಅದರಲ್ಲಿ ಸೇನೆಯನ್ನು ಎಳೆದು ತರಲಾಗಿಲ್ಲ ಎಂಬುದನ್ನು ಗಮನಿಸಬೇಕು. ಸೇನೆ ನಮ್ಮ ದೇಶದ ಹೆಮ್ಮೆಯೂ ಹೌದು. ಗಡಿಗಳನ್ನು ಕಾಯುತ್ತ ಬಾಹ್ಯಶತ್ರುಗಳಿಂದ ರಕ್ಷಿಸುತ್ತಿದ್ದರೆ, ದೇಶದೊಳಗಡೆ ಪ್ರಾಕೃತಿಕ ವಿಕೋಪ, ಅವಘಡಗಳು ಸಂಭವಿಸಿದಾಗ ಜನರ ರಕ್ಷಣೆಗೆ ಬರುವುದು ಸೇನೆಯೇ. ಭಾರತದ ಸಾಮರ್ಥ್ಯ, ಶಕ್ತಿಯನ್ನು ಜಾಗತಿಕ ಮಟ್ಟದಲ್ಲಿ ಸಾಬೀತು ಪಡಿಸಿರುವ ಸೇನೆ ಇತ್ತೀಚೆಗೆ ಪಾಕಿಸ್ತಾನ ವಿರುದ್ಧ ನಡೆಸಿದ ‘ಆಪರೇಷನ್ ಸಿಂಧೂರ’ ಕಾರ್ಯಾಚರಣೆಯ ಯಶಸ್ಸು ಕೂಡ ಅಸಾಧಾರಣ. ಸೇನೆಯೆಂದರೆ ಶಕ್ತಿ, ಶೌರ್ಯ ಮತ್ತು ದೇಶಭಕ್ತಿಯ ಭಾವಗಳು ಒಟ್ಟಾಗುತ್ತವೆ. ಆದರೆ, ರಾಜಕೀಯ ಲಾಭಕ್ಕಾಗಿ ಸೇನೆಯನ್ನು ರಾಜಕೀಯಕ್ಕೆ ಎಳೆದು ತರುವ ಪ್ರಯತ್ನ ಖಂಡನೀಯ ಮಾತ್ರವಲ್ಲ, ಧೂರ್ತತನದ ನಡವಳಿಕೆ.
