ಹಾಗಾಗಿ, ಮುಂದೆ ಯಮದೇವರಿಂದ ತತ್ವೋಪದೇಶ ಪಡೆದು ಉದ್ಧಾರ ಹೊಂದುತ್ತಾನೆ.ಇದು ಕಾಠಕೋಪನಿಷತ್ತಿ ನಲ್ಲಿ ಬರುವ ಕಥೆ. ಈ ಕಥೆಯ ಮೂಲಕ ನಮಗೆಲ್ಲ ಬಹಳ ದೊಡ್ಡ ಸಂದೇಶ ನೀಡುತ್ತದೆ ಉಪನಿಷತ್ತು. ನಮ್ಮ ಸನಾತನ ವೈದಿಕ ಸಂಪ್ರದಾಯದಲ್ಲಿ ಮದುವೆ, ಉಪನಯನ, ಗೃಹಪ್ರವೇಶ, ಹೋಮ, ಹವನ ಹೀಗೆ ಯಾವುದೇ ಕಾರ್ಯಗಳಲ್ಲಿ ದಾನ-ಧರ್ಮ ಮಾಡುವುದು ಶಾಸ್ತ್ರವಿಹಿತ. ಮತ್ತು ಅತಿವೃಷ್ಟಿ, ಅನಾವೃಷ್ಟಿ, ಭೂಕಂಪ ಮುಂತಾದ ಪ್ರಕೃತಿವಿಕೋಪದ ಪರಿಣಾಮವಾಗಿ ಬಹಳ ಕಷ್ಟದಲ್ಲಿದ್ದವರಿಗೆ, ನಾನಾವಿಧ ರೋಗರುಜಿನಗಳಿಂದ ದುಃಖದಲ್ಲಿದ್ದವರಿಗೆ ಅನೇಕ ವಿಧವಾದ ಜೀವನಾವಶ್ಯಕ ವಸ್ತುಗಳನ್ನು ಕೊಟ್ಟು ಸಹಾಯ ಮಾಡುವುದು ಮಾನವೀಯತೆ. ಹೀಗೆ ದಾನದ ರೂಪದಲ್ಲಿಯೋ, ಸಹಾಯದ ರೂಪದಲ್ಲಿಯೋ ಯಾವುದೇ ಪದಾರ್ಥಗಳನ್ನು ಮತ್ತೊಬ್ಬರಿಗೆ ಕೊಡುವಾಗ, ಕೊಡುವ ಆ ಪದಾರ್ಥ ಅವರಿಗೆ ಉಪಯುಕ್ತವಾಗುತ್ತದೆಯೋ ಇಲ್ಲವೋ ಎಂಬುದನ್ನು ಯೋಚಿಸಿ, ಉಪಯುಕ್ತಪದಾರ್ಥಗಳನ್ನೇ ಕೊಡಬೇಕು ಎನ್ನುವುದು ಉಪನಿಷತ್ತು ತಿಳಿಸುವ ದಿವ್ಯಸಂದೇಶ. ಅಷ್ಟೇ ಅಲ್ಲ, ಇದೇ ನಿಜವಾದ ಮಾನವೀಯತೆ ಕೂಡ.
