ಕೊಟ್ಟೂರೇಶ್ವರರನ್ನು ನೆನೆಯುತ್ತ, ಭಜನೆ ಮಾಡುತ್ತ, ನೂರಾರು ಕಿ.ಮೀ. ದೂರದಿಂದ ಮಕ್ಕಳನ್ನು ಹೆಗಲಮೇಲೆ ಹೊತ್ತು ನಡೆಯುವ ಹೆತ್ತವರು, ಕಣ್ಣಿದ್ದವರನ್ನು ಕೈಹಿಡಿದು ಹೆಜ್ಜೆ ಹಾಕುವ ಅಂಧರು, ಅಂಗವಿಕಲರು, ವೃದ್ಧರು, ಸಾವಧಾನವಾಗಿ ನಡೆಯುವ ಗರ್ಭಿಣಿಯರು ಕೊಟ್ಟೂರೇಶ್ವರ ಸ್ವಾಮಿ ರಥೋತ್ಸವಕ್ಕೆ ನದಿಯಂತೆ ಹರಿದುಬರುತ್ತಾರೆ. ರಥೋತ್ಸವಕ್ಕೆ ಮೂರು ನಾಲ್ಕು ದಿನಗಳಿರುವಂತೆಯೇ ದಾವಣಗೆರೆ, ಹರಿಹರ, ಹಾವೇರಿ, ರಾಣಿಬೆನ್ನೂರು, ಚಿತ್ರದುರ್ಗ, ಮುಂಡರಗಿ, ಗದಗ - ಹೀಗೆ ನೂರಾರು ಊರುಗಳಿಂದ ಪಾದಯಾತ್ರೆ ಬರುವವರಿದ್ದಾರೆ. ಹಗಲು, ರಾತ್ರಿ, ಬೆಳಗಿನ ಜಾವವಾದರೂ ಸರಿ, ಕಾದು ಅವರನ್ನು ತಮ್ಮ ಮನೆಗಳಿಗೆ ಕರೆದು ಭಕ್ತರು ಸತ್ಕರಿಸುತ್ತಾರೆ. ಆಯಾಸವಾಗಿದ್ದರೆ ತಂಗಲು ವ್ಯವಸ್ಥೆ ಮಾಡುವ ಗ್ರಾಮಸ್ಥರು, ನಡೆದು ಪಾದಗಳಲ್ಲಿ ಬೊಬ್ಬೆ ಬಂದವರ ಪಾದಗಳಿಗೆ ಚಿಕಿತ್ಸೆ ಮಾಡುತ್ತಾರೆ. ಕಾಯಿಲೆಯಿಂದ ಬಳಲುವ ಭಕ್ತರಿಗೆ ವೈದ್ಯರು ಹಗಲು ರಾತ್ರಿ ಸೇವೆ ಮಾಡುತ್ತಾರೆ. ಎಲ್ಲವೂ ಕೊಟ್ಟೂರೇಶ್ವರ ಸ್ವಾಮಿ ಹೆಸರಿನಲ್ಲಿ ನಡೆಯುತ್ತವೆ. ಅಲ್ಲಲ್ಲಿ ಮೊಬೈಲ್ ಆಸ್ಪತ್ರೆಗಳೇ ತೆರೆದಿರುತ್ತವೆ. ಕೊಟ್ಟೂರು ಬಂದು ಸೇರುವ ಎಲ್ಲ ದಾರಿಗಳ ಮಧ್ಯದ ಊರುಗಳಲ್ಲಿ ಪಾದಯಾತ್ರಿಗಳಿಗಾಗಿ ಪಾನಕ, ಹಣ್ಣು, ಚಿತ್ರಾನ್ನ, ಉಪ್ಪಿಟ್ಟು ಇತ್ಯಾದಿ ಹಲವಾರು ತಿಂಡಿತಿನಸುಗಳು ಸಿದ್ಧವಾಗಿರುತ್ತವೆ. ಇಲ್ಲಿ ಮತ, ವರ್ಗ, ವರ್ಣ ಯಾವುದೂ ಭೇದವಿಲ್ಲ. ಕೊಟ್ಟೂರು ಪಟ್ಟಣ ಕೂಡ ಪಾದಯಾತ್ರಿಗಳ ಸೇವೆಗಾಗಿ ಟೊಂಕ ಕಟ್ಟಿ ನಿಂತಿರುತ್ತದೆ. ಯಾವುದೇ ಮನೆಗೆ ಹೋದರೂ, ಬಂಧುಗಳಂತೆ ಆಹ್ವಾನಿಸುತ್ತಾರೆ. ಸ್ನೇಹಿತರಂತೆ ಸತ್ಕರಿಸುತ್ತಾರೆ. ಕೊಟ್ಟೂರೇಶ್ವರ ಸ್ವಾಮಿಯ ಪವಾಡಗಳನ್ನು ನೋಡಿದವರಿಲ್ಲ. ಆದರೆ ನಾಡಿನ ನಾನಾ ಮೂಲೆಗಳಿಂದ ಹರಿದುಬರುವ ಪಾದಯಾತ್ರಿಗಳನ್ನು ಹಾಗೂ ಅವರನ್ನು ಸತ್ಕರಿಸುವ ಭಕ್ತರನ್ನು ಕಂಡರೆ ಇದು ಕೊಟ್ಟೂರೇಶ್ವರರ ಪವಾಡವೇ ಎನಿಸುತ್ತದೆ.
