ಇಂದಿನ ಧಾವಂತದ, ಸಾಮಾಜಿಕ ಮಾಧ್ಯಮಗಳ ಯುಗದಲ್ಲಿ ಪ್ರೀತಿಯ ಸ್ವರೂಪ ಬದಲಾಗಿದೆ. ಲೈಕ್ಸ್, ಕಾಮೆಂಟ್ಸ್ ಮತ್ತು ಜೋಡಿಸೆಲ್ಪಿಗಳನ್ನು ಹಂಚಿಕೊಳ್ಳುವುದೇ ಪ್ರೀತಿಯ ಅಳತೆಗೋಲಾಗಿದೆ. ಆಧುನಿಕ ಪ್ರೀತಿಯಲ್ಲಿ ‘ಗಿವ್ ಆಂಡ್ ಟೇಕ್’ ಎಂಬ ವ್ಯವಹಾರಿಕ ಮನೋಭಾವ ಹೆಚ್ಚಾಗುತ್ತಿದ್ದು, ‘ನಾನು ನಿನಗಾಗಿ ಇಷ್ಟೊಂದು ಮಾಡಿದೆ, ನೀನು ನನಗೇನು ಮಾಡಿದೆ?’ ಎಂಬ ನಿರೀಕ್ಷೆಗಳು ಸಂಬಂಧಗಳನ್ನು ಸಡಿಲಗೊಳಿಸುತ್ತಿವೆ. ನೈಜ ಪ್ರೀತಿ, ಕಾಳಜಿ ಅಪರೂಪವಾಗುತ್ತಿವೆ. ಬಾಂಧವ್ಯಗಳಲ್ಲಿ ಬಿರುಕು ಮೂಡಲು ಇದು ಮುಖ್ಯ ಕಾರಣ. ಅತಿಯಾದ ನಿರೀಕ್ಷೆ. ‘ನಾನು ಅವರನ್ನು ಎಷ್ಟು ಪ್ರೀತಿಸುತ್ತೇನೋ, ಅವರೂ ನನ್ನನ್ನು ಅಷ್ಟೇ ಅಥವಾ ಅದಕ್ಕಿಂತಲೂ ಪ್ರೀತಿಸಬೇಕು, ನಾನು ನೀಡುವ ಕಾಳಜಿಗೆ ಪ್ರತಿಯಾಗಿ ಅವರಿಂದಲೂ ಕೊಡುಗೆ ಸಿಗಬೇಕು’ ಎಂಬ ಅಪೇಕ್ಷೆ ಮೂಡಿದಾಗ ಪ್ರೀತಿ ಒಂದು ವ್ಯವಹಾರದಂತಾಗುತ್ತದೆ. ನಿರೀಕ್ಷೆ ಹುಸಿಯಾದಾಗ ನಿರಾಸೆ, ಕೋಪ ಮತ್ತು ನೋವು ಆವರಿಸಿಕೊಳ್ಳುತ್ತವೆ. ಸಂಬಂಧಗಳೂ ಹಳಸುತ್ತವೆ. ದ್ವೇಷ, ಅಸೂಯೆಗಳಿಂದ ಏನನ್ನೂ ಗೆಲ್ಲಲು ಸಾಧ್ಯವಿಲ್ಲ; ಪ್ರೀತಿಯಿಂದ ಮಾತ್ರ ಪ್ರತಿಯೊಂದು ಹೃದಯವನ್ನೂ ತಲುಪಲು ಸಾಧ್ಯ.
