ದೈವ ಭಕ್ತಿ, ಪ್ರಕೃತಿಗೆ ಕೃತಜ್ಞತೆ ಸಲ್ಲಿಸುವ ರೀತಿ, ಸಾಮಾನ್ಯ ಜನರ ಅನುಭವ, ನಂಬಿಕೆ, ಭಾವನೆ ಮತ್ತು ಸಂಸ್ಕೃತಿ ಇತ್ಯಾದಿಯನ್ನೆಲ್ಲ ಪ್ರತಿಬಿಂಬಿಸುವ ಜನಪದ ಕಲೆಯು ಒಬ್ಬರಿಂದೊಬ್ಬರಿಗೆ ಅಥವಾ ಅಜ್ಜನಿಂದ ಮಗ, ಮೊಮ್ಮಗನಿಗೆ, ವಂಶಪಾರಂಪರ್ಯವಾಗಿ ಮುಂದುವರಿದುಕೊಂಡು ಬಂದಿರುವಂಥದ್ದು. ವಿಶೇಷವಾಗಿ ಗ್ರಾಮೀಣ ಜನತೆಯು ಬಿತ್ತನೆ, ಕೊಯ್ಲು, ಮಳೆಗಾಗಿ ಪ್ರಾರ್ಥನೆ, ಹಬ್ಬ-ಜಾತ್ರೆ ಮುಂತಾದ ಸಂದರ್ಭಗಳಲ್ಲಿ ಹಾಡು, ನೃತ್ಯ, ವೇಷಭೂಷಣಗಳ ಮೂಲಕ ಜನರು ತಮ್ಮ ಭಾವನೆಗಳನ್ನು ವ್ಯಕ್ತಪಡಿಸುತ್ತಿದ್ದರು. ಹೀಗೆ ಕೃಷಿಯೊಂದಿಗೆ ಗ್ರಾಮೀಣರ ಬದುಕು ತಳುಕು ಹಾಕಿಕೊಂಡಿದ್ದು, ವಿವಿಧ ಆಚರಣೆಗಳಲ್ಲಿ ಭಕ್ತಿ, ಶೌರ್ಯ, ಹಾಸ್ಯ, ಮಾತ್ರವಲ್ಲದೆ ನೈತಿಕ ಮೌಲ್ಯಗಳನ್ನೂ ಕಾಣಬಹುದಾಗಿದೆ.
