ಸಾತ್ವಿಕ, ರಾಜಸ, ತಾಮಸ ಗುಣಗಳಲ್ಲಿ ಸಾತ್ವಿಕವಾದ ಆಹಾರ, ಸಾತ್ವಿಕವಾದ ಚಿಂತನೆಗಳು ನಮಗೆ ಪುಷ್ಟಿಯಾಗಿರುತ್ತವೆ. ಅಂದರೆ ವ್ಯಕ್ತಿತ್ವದಲ್ಲಿ ಪ್ರೌಢತೆ ಹಾಗೂ ಒಳ್ಳೆಯ ವಿಚಾರಧಾರೆಗಳನ್ನು ಇವು ಕೊಟ್ಟರೆ ರಾಜಸ ಎನ್ನುವಂತಹದ್ದು ಮಾಧ್ಯಸ್ಥ ಭಾವವನ್ನು ಕೊಡುತ್ತದೆ. ತಾಮಸದಲ್ಲಿ ಇನ್ನೊಬ್ಬರಿಗೆ ನೋವು, ಹಿಂಸೆ ಉಂಟು ಮಾಡುವ ಆಲೋಚನೆ ಒಡಮೂಡುತ್ತದೆ. ಮತ್ತು ಅದನ್ನು ಕಾಯೇನ ವಾಚಾ ಮನಸಾ ಮಾಡುತ್ತಿರುತ್ತೇವೆ. ಕಾಯೇನ ಎಂದರೆ ದೈಹಿಕವಾಗಿ ಇನ್ನೊಬ್ಬರಿಗೆ ಹಿಂಸೆ ಕೊಡುವಂಥದ್ದು, ಘಾಸಿಗೊಳಿಸುವಂಥದ್ದು, ವಾಚಾ ಎಂದರೆ ಬಾಯಿಮಾತಿನಲ್ಲಿ ಕೊಲ್ಲುವುದು ಅಂದರೆ ಹೀಯಾಳಿಸುವುದು, ಚುಚ್ಚುಮಾತು ಆಡುವುದು, ದೂಷಿಸಿ ಹಿಂಸಿಸುವುದು. ಮನಸಾ ಎಂದರೆ ಮನಸ್ಸಿನಲ್ಲೇ ಇನ್ನೊಬ್ಬರ ಹಗೆತನ ಬೆಳೆಸಿಕೊಳ್ಳುವುದು. ಇನ್ನೊಬ್ಬರ ಬಗ್ಗೆ ಕೆಟ್ಟದಾದ ಆಲೋಚನೆಯನ್ನು ಬೆಳೆಸಿಕೊಂಡು ಹೋಗುವುದು. ಹಾಗಾಗಿ ನಮ್ಮ ಗುರಿ ಕಾಯೇನ ವಾಚಾ ಮನಸಾ ಸಾತ್ವಿಕತೆಯನ್ನು ಬೆಳೆಸಿಕೊಳ್ಳುವುದರಲ್ಲಿ ಇರಬೇಕು.
