ಅನೇಕ ಆಂಟಿಬಯೋಟಿಕ್ಗಳು ಯಕೃತ್ನ ಮೇಲೆ ವಿಷಕಾರಿ ಪರಿಣಾಮ ಬೀರುತ್ತದೆ ಎಂಬುದರ ಬಗ್ಗೆ ಹಲವಾರು ಸಂಶೋಧನಾ ಅಧ್ಯಯನಗಳ ವರದಿಗಳಿವೆ. ಅಂತರ್ಜಾಲದಲ್ಲಿ ಹುಡುಕಿದರೂ ತಕ್ಷಣವೇ ಇವೆಲ್ಲ ಮಾಹಿತಿ ಸಿಗುತ್ತದೆ. ಕ್ಷಯರೋಗ, ಆತ್ರೈಟಿಸ್, ಕ್ಯಾನ್ಸರ್, ಚರ್ಮರೋಗ, ಮಾನಸಿಕ ರೋಗಗಳಲ್ಲಿ ಉಪಯೋಗಿಸುವ ಅನೇಕ ಔಷಧಿಗಳು ಯಕೃತ್ನ ಮೇಲೆ ದುಷ್ಪರಿಣಾಮ ಬೀರುವುದು ತಿಳಿದಿರುವ ವಿಚಾರ. ಇದೇ ಕಾರಣದಿಂದ ಈ ರೋಗಿಗಳಿಗೆ ಚಿಕಿತ್ಸೆ ನೀಡುತ್ತಿರುವ ಅವಧಿಯಲ್ಲಿ ಯಕೃತ್ಗೆ ಸಂಬಂಧಿಸಿದ ರಕ್ತ ತಪಾಸಣೆಯನ್ನು ಆಗಾಗ ನಡೆಸುವುದರ ಹಿಂದಿನ ಉದ್ದೇಶದ ಅರಿವೂ ಜನಸಾಮಾನ್ಯರಿಗೆ ಸ್ಪಷ್ಟವಾಗಿ ಇದೆ. ಹಾಗೆಂದು ಆ ಪದ್ಧತಿಯಲ್ಲಿ ಅಂತಹ ಔಷಧಗಳನ್ನೆಲ್ಲಾ ಚಿಕಿತ್ಸೆಯಲ್ಲಿ ಉಪಯೋಗಿಸದೆ ಇರಲು ಸಾಧ್ಯವೇ? ಅದು ಆಯಾಯ ಪದ್ಧತಿಗಳ ಇತಿಮಿತಿಗೆ ಸಂಬಂಧಿಸಿದೆ. ಆದರೆ ಆಯುರ್ವೆದದಲ್ಲಿ ಜ್ವರದ ಚಿಕಿತ್ಸೆಗೆ ಹೇರಳವಾಗಿ ಬಳಸಲ್ಪಡುವ ನೂರಹತ್ತು ಔಷಧೀಯ ಸಸ್ಯಗಳಲ್ಲಿ ಮೂವತ್ತನ್ನು ಹೆಪಟೈಟಿಸ್ನಲ್ಲೂ ಉಪಯೋಗಿಸಲಾಗುತ್ತದೆ! ಚಿಕಿತ್ಸಾ ದೃಷ್ಟಿಕೋನದಿಂದ ನೋಡಿದರೆ ಲಿವರ್ಗೂ ಫಿವರ್ಗೂ ನಿಕಟ ಸಂಬಂಧವಿರುವುದು ಇದರಿಂದ ತಿಳಿಯುತ್ತದೆ. ಜ್ವರಕ್ಕೆ ಬಳಸುವ ಬಹುತೇಕ ಔಷಧೀಯ ಸಸ್ಯಗಳು ಯಕೃತ್ನ ರಕ್ಷಕವೂ ಆಗಿವೆ. ಆಯುರ್ವೆದದ ಅನೇಕ ವಿಶೇಷತೆಗಳಲ್ಲಿ ಇದೂ ಒಂದು. ಈ ಸುರಕ್ಷತೆಯ ಕಾರಣದಿಂದಲೇ, ಯಕೃತ್ನ ಹಿತದೃಷ್ಟಿಯಿಂದ ನೋಡಿದರೆ ಜ್ವರ ಬಂದಾಗ ಆಯುರ್ವೆದ ಚಿಕಿತ್ಸೆಗೆ ಪ್ರಾಧಾನ್ಯತೆ ನೀಡಬೇಕೆಂಬುದು ಮನದಟ್ಟಾಗುತ್ತದೆ. ಮೂರು ದಶಕಗಳ ಹಿಂದಿನ ತನಕವೂ ಯಕೃತ್ ಚಿಕಿತ್ಸೆಗೆ ರಾಸಾಯನಿಕ ಔಷಧಗಳಿಲ್ಲದೆ ಕೊರತೆ ಕಾಡುತ್ತಿತ್ತು. ಹಾಗಾಗಿ ಯಾವುದೇ ವಿಧವಾದ ಹೆಪಟೈಟಿಸ್ಗೂ ಚಿಕಿತ್ಸೆಯ ಅಗತ್ಯವೇ ಇಲ್ಲ ಎಂದು ಹೇಳುತ್ತಿದ್ದುದು ಯಾರೆಂಬುದು ಇನ್ನೂ ಜನತೆಯ ನೆನಪಿನಲ್ಲಿದೆ. ಹೀಗೆ ಚಿಕಿತ್ಸೆಯೇ ಬೇಡ, ಅವೆಲ್ಲ ತನ್ನಿಂದ ತಾನೇ ಗುಣವಾಗುತ್ತವೆ ಎಂಬುದಾಗಿ ಹೇಳಿ ತದನಂತರ ಆಸ್ಪತ್ರೆಗೆ ದಾಖಲಿಸಿ ಚಿಕಿತ್ಸೆಯನ್ನೂ ನೀಡಿ ದುಬಾರಿ ವೆಚ್ಚದೊಂದಿಗೆ ರೋಗಿಗಳು ಹೊರಬರುತ್ತಿದ್ದುದೂ ಲೋಕಕ್ಕೆ ತಿಳಿದಿರುವ ಸಂಗತಿ. ಈಗಲೂ ಕೇವಲ ಬೆರಳೆಣಿಕೆಯ ರಾಸಾಯನಿಕ ಔಷಧಗಳಷ್ಟೇ ಚಾಲ್ತಿಯಲ್ಲಿದ್ದರೂ ಆಯುರ್ವೆದದಲ್ಲಿ ಸಾವಿರಾರು ಔಷಧಗಳು ಯಕೃತ್ ಚಿಕಿತ್ಸೆಗಾಗಿಯೇ ಲಭ್ಯವಿರುವುದು ಮಾನವನಿಗೆ ಆಯುರ್ವೆದ ದಯಪಾಲಿಸಿದ ವರದಾನ. ಹರ ಎಂದರೆ ಸಂಹರಿಸುವುದು, ನಾಶಮಾಡುವುದು ಎಂದರ್ಥವಿದೆ. ಆಯುರ್ವೆದದಲ್ಲಿ ವಾತಹರ, ದೋಷಹರ, ವ್ಯಾಧಿಹರ, ವಿಷಹರ ಮುಂತಾದ ಗುಣಧರ್ಮ ಹೊಂದಿದ ಸಾವಿರಾರು ಔಷಧಗಳಿವೆ. ಆದರೆ ಯಕೃತ್ಹರ ಎಂಬ ಗುಣದ ಒಂದೇ ಒಂದು ಔಷಧವಿಲ್ಲ!
