ಯಾವುದೇ ವಿಚಾರ ಜಗದ ಮನೆ ಮನಗಳನ್ನು ತಲುಪಿ ಜನಪ್ರಿಯವಾಗಬೇಕಾದರೆ ಜ್ಞಾನರಾಶಿಯಿಂದ ಸಮೃದ್ಧವಾದ ಕೃತಿಗಳು ಬೇಕು. ಅಂತಹ ಬೃಹತ್ ಕೃತಿಗಳು ಗ್ರಂಥಗಳಾಗಿ ಸಾರ್ವಕಾಲಿಕವಾಗಿ ಉಳಿಯಬೇಕಾದರೆ ಅದರ ಲೇಖಕರು ತಂತ್ರಯುಕ್ತಿಯನ್ನು ಪಾಲಿಸಿರಲೇಬೇಕು ಎನ್ನುತ್ತದೆ ಆಯುರ್ವೆದ. ಏನಿದು ತಂತ್ರಯುಕ್ತಿ? ಆಯುರ್ವೆದದ ಮೂಲ ಗ್ರಂಥಗಳೆಲ್ಲಾ ಮಾನವನ ಬದುಕಿಗೆ ಸಂಬಂಧಿಸಿದ ವೈಜ್ಞಾನಿಕ ಗ್ರಂಥಗಳಾದರೂ ತಂತ್ರಯುಕ್ತಿಯನ್ನು ಪೂರ್ಣಪ್ರಮಾಣದಲ್ಲಿ ಅನುಸರಿಸಿ ಅನುಷ್ಠಾನಿಸಿ ಇರುವುದರಿಂದ ಅವುಗಳಿಂದು ಸಾಹಿತ್ಯಕವಾಗಿಯೂ ಅತುಲ್ಯ, ಅರ್ನ್ಯಘ ರತ್ನಗಳಾಗಿ ಉಳಿದುಕೊಂಡಿವೆ. ವ್ಯಾಕರಣ ಶುದ್ಧತೆಗೆ, ವಿಷಯದ ಬದ್ಧತೆಗೆ ತಂತ್ರಯುಕ್ತಿ ಬೇಕು. ಚಿಕ್ಕದಾದ ಚೊಕ್ಕದಾದ ಅಭಿವ್ಯಕ್ತಿಗೆ ತಂತ್ರಯುಕ್ತಿಯ ಅನುಕರಣೆ ಅನಿವಾರ್ಯ. ತಂತ್ರಯುಕ್ತಿಯ ಪೂರ್ಣ ಅರಿವಿದ್ದ ಅಧ್ಯಯನ ನಿರತನಿಗೆ ಮಾತ್ರ ಗ್ರಂಥಗಳು ಪರಿಪೂರ್ಣವಾಗಿ ಗ್ರಾಹ್ಯವಾಗುತ್ತದೆ ಎಂಬುದಾಗಿ ಚರಕಾದಿ ಸಂಹಿತೆಗಳು ಸಾರಿವೆ. ಅಷ್ಟಾಂಗ ಸಂಗ್ರಹದ ಉತ್ತರತಂತ್ರದಲ್ಲಿ ಈ ತಂತ್ರಯುಕ್ತಿಗೆ ಅರ್ಥದುರ್ಗಾ ಎಂಬುದಾಗಿ ಕರೆದಿದ್ದಾರೆ. ಕೋಟೆಗಳ ಒಳಗೆ ರಾಜರ ಹಾಗೂ ರಾಜ್ಯಾಡಳಿತದ ಅನೇಕ ಸಂಗತಿಗಳು ಗುಪ್ತವಾಗಿ ಇರುವಂತೆ ತಂತ್ರಯುಕ್ತಿಯನ್ನು ಯಥಾವತ್ತಾಗಿ ಬಳಸಿಕೊಳ್ಳುವುದರಿಂದ ನಿಜ ಅರ್ಥವು ಗುಪ್ತವಾಗಿ ಉಳಿದು ಅಪಾತ್ರರಿಗೆ ಸುಲಭದಲ್ಲಿ ಅರ್ಥವೇ ಆಗುವುದಿಲ್ಲ ಎಂಬುದು ಅರ್ಥದುರ್ಗಾದ ಸಾರಾಂಶ. ತಂತ್ರಯುಕ್ತಿ ಮುಖ್ಯವಾಗಿ ಎರಡು ವಿಧವಾಗಿದೆ- ಮೊದಲನೆಯದು ವಾಕ್ಯಯೋಜನ. ಶಬ್ದಗಳು ಮತ್ತು ವಾಕ್ಯಗಳು ಪುಸ್ತಕಗಳಲ್ಲಿ ಕ್ರಮಬದ್ಧವಾಗಿ ಜೋಡಿಸಲ್ಪಟ್ಟಿರಬೇಕು. ಎರಡನೆಯದಾದ ಅರ್ಥಯೋಜನ ಎಂದರೆ ಕೃತಿಯು ಅಂತಿಮವಾಗಿ ಸರಿಯಾದ ಅರ್ಥವನ್ನು ಕೊಡುವಂತಿರಬೇಕು. ಗ್ರಂಥ ರಚನೆಯಲ್ಲಿ ಇವೆರಡು ವಿಚಾರಗಳು ಬಹುಮುಖ್ಯ. ಆಯುರ್ವೆದದ ವೈದ್ಯಕೀಯ ಗ್ರಂಥಗಳು 36 ತಂತ್ರಯುಕ್ತಿಗಳನ್ನು ವಿವರಿಸಿ ಹೇಳಿದ್ದನ್ನು ನೋಡಿದರೆ ಯಾರಾದರೂ ಮಂತ್ರಮುಗ್ಧರಾಗಲೇಬೇಕು. ಎತ್ತಣ ವೈದ್ಯ ವಿಜ್ಞಾನ, ಎತ್ತಣ ಸಾಹಿತ್ಯ ಮಾಪನ! ಪ್ರಾಚೀನ ವೈದ್ಯವಿಜ್ಞಾನಿ ಲೇಖಕ ಋಷಿಗಳ ಶಿಸ್ತುಬದ್ಧತೆಗಳ ಔನ್ನತ್ಯದ ದರ್ಶನವು ತಂತ್ರಯುಕ್ತಿಗಳಲ್ಲೂ ಆಗುವುದು ಆಶ್ಚರ್ಯಕರ ಸಂಗತಿ.
