ಭ್ರಾಮರಿ ಯಕ್ಷ ಕಲಾಕೇಂದ್ರಗಳಲ್ಲಿ ಮಾತ್ರವಲ್ಲದೆ, ಶೆಟ್ಟರು ಥಾಣೆ, ಮೀರಾ ರೋಡ್, ದಹಿಸರ್, ಭಿವಂಡಿ, ದೊಂಬಿವಿಲಿ, ವಸಾಯಿ, ಕಾಂದಿವಲಿ, ಕಲ್ಯಾಣ್, ವಾಪಿ ಹೀಗೆ ಮುಂಬಯಿ ಸಮೀಪದ ಇತರ ಪ್ರದೇಶಗಳಿಗೂ ತೆರಳಿ ಯಕ್ಷಗಾನದ ತರಬೇತಿ ನೀಡುತ್ತಿದ್ದಾರೆ. ಇವರ ಹೊಸ ಹೊಸ ಪ್ರಸಂಗಗಳು ಮಹಾರಾಷ್ಟ್ರದಾದ್ಯಂತ ಪ್ರದರ್ಶನ ಕಂಡು ಜನಮನ್ನಣೆ ಗಳಿಸಿವೆ. ಭ್ರಾಮರಿ ಸಂಸ್ಥೆಯ ‘ಕೃಷ್ಣಂ ವಂದೇ ಜಗದ್ಗುರುಂ’ ಅನ್ನುವ ಹಿಂದಿ ಭಾಷೆಯ ಯಕ್ಷಗಾನ ಪ್ರಯೋಗ, ಹಿಂದಿ ಭಾಷಿಗರ ಎದೆಯಲ್ಲಿ ತಲ್ಲಣ ಸೃಷ್ಟಿಸಿದೆ. ಇದಲ್ಲದೆ ಮರಾಠಿ ಭಾಷೆಯಲ್ಲಿ ಮಹಿಷ ಮರ್ದಿನಿ, ತುಳು ಭಾಷೆಯಲ್ಲಿ ಲವ ಕುಶ ಜತೆಗೇ ಇತರ ಹಲವಾರು ಸಾಂಪ್ರದಾಯಿಕ ಯಕ್ಷಗಾನ ಪ್ರಸಂಗಗಳು ಮತ್ತು ತಾಳಮದ್ದಳೆಗಳು ಕೂಡ ದಶಮಾನೋತ್ಸವದ ವಿಶೇಷ ಪ್ರದರ್ಶನಗಳ ಪಟ್ಟಿಯಲ್ಲಿ ಸೇರಿಕೊಂಡಿವೆ.
