ಚಿತ್ರದುರ್ಗದ ಇತಿಹಾಸದ ಕುರಿತು ಡಾ.ಬಿ.ಎಲ್. ವೇಣು ಅವರು ಬರೆದಿರುವ ‘ರಾಜ ಬಿಚ್ಚುಗತ್ತಿ ಭರಮಣ್ಣ ನಾಯಕ’ ಕಾದಂಬರಿ ಆಧರಿಸಿರುವ ‘ಬಿಚ್ಚುಗತ್ತಿ’ ಸಿನಿಮಾದಲ್ಲಿ ಭರಮಣ್ಣ ನಾಯಕ, ಗುಡಿಕೋಟೆ ರಾಜಕುಮಾರಿ ಸಿದ್ದಾಂಬೆ ಹಾಗೂ ದಳವಾಯಿ ಮುದ್ದಣ್ಣನ ಪಾತ್ರಗಳೇ ಪ್ರಮುಖವಾದವು. ಈ ಪಾತ್ರಗಳಲ್ಲಿ ಕ್ರಮವಾಗಿ ರಾಜ್ವರ್ಧನ್, ಹರಿಪ್ರಿಯಾ ಹಾಗೂ ತೆಲುಗಿನ ಖ್ಯಾತ ನಟ ಪ್ರಭಾಕರ್ ಅಭಿನಯಸಿದ್ದಾರೆ. ಆ ಪೈಕಿ ದಳವಾಯಿ ಮುದ್ದಣ್ಣನ ಪಾತ್ರಕ್ಕೆ ಸ್ವತಃ ಪ್ರಭಾಕರ್ ಕಂಠದಾನ ಮಾಡಿರುವುದರಿಂದ ಬಹಳಷ್ಟು ಅಪಭ್ರಂಶಗಳಾಗಿದ್ದಷ್ಟೇ ಅಲ್ಲದೆ, ಸಂಭಾಷಣೆ ಅಸಹಜ ಎಂಬ ರೀತಿಯಲ್ಲಿ ಮೂಡಿಬಂದಿದೆ. ಈ ಬಗ್ಗೆ ವಿಮರ್ಶೆಗಳಲ್ಲಿ ಮಾತ್ರವಲ್ಲದೆ ಪ್ರೇಕ್ಷಕರ ಪ್ರತಿಕ್ರಿಯೆಗಳಲ್ಲೂ ಋಣಾತ್ಮಕ ಅಭಿಪ್ರಾಯ ವ್ಯಕ್ತವಾಗಿರುವುದರಿಂದ ಚಿತ್ರತಂಡ ಎಚ್ಚೆತ್ತುಕೊಂಡಿದೆ. ಅಲ್ಲದೆ ತಕ್ಷಣ ಮುದ್ದಣ್ಣನ ಪಾತ್ರವನ್ನು ಹೊಸದನಿಯೊಂದಿಗೆ ತೆರೆಗೆ ತರುತ್ತಿದೆ. ಈ ವಿಷಯವಾಗಿ ಕೆಲಸಗಳು ಭರದಿಂದ ಸಾಗಿದ್ದು, ಇನ್ನೆರೆಡು ದಿನಗಳಲ್ಲಿ ಮುಗಿಯುವ ಸಾಧ್ಯತೆ ಇದೆ. ಇದೇ ಶುಕ್ರವಾರದಿಂದ ಚಿತ್ರಮಂದಿರಗಳಲ್ಲಿ ಮುದ್ದಣ್ಣ ಹೊಸ ದನಿಯಲ್ಲಿ ಗುಡುಗಲಿದ್ದಾನೆ.
