ಇಲ್ಲಿ ಗಮನಿಸಬೇಕಾದ ವಿಚಾರ ಎಂದರೆ ಮಗನ ಕ್ಷಮತೆ, ಆಸಕ್ತಿಯನ್ನು ಪಾಲಕರಾದವರು ಗಮನಿಸಬೇಕು. ಆತನ ಅಭಿರುಚಿಯನ್ನೂ ಗೌರವಿಸಬೇಕು. ಆತನ ಮಾತನ್ನು ಸಮಚಿತ್ತದಿಂದ ಆಲಿಸಬೇಕು. ಆದರೆ ಈ ಪ್ರಕರಣದಲ್ಲಿ ಹಾಗಾಗಿರಲಿಲ್ಲ. ನಾನು ಹೇಳಿದ್ದನ್ನು ನೀನು ಕಲಿಯಲೇಬೇಕು ಎನ್ನುವ ಫರ್ವನು ಮಗನ ಆತ್ಮಸ್ಥೈರ್ಯ ಕುಗ್ಗಿಸಿತ್ತು. ಇದರ ಪರಿಣಾಮ ಮಗ ಪಿಯುಸಿಯಲ್ಲಿ ಕಳಪೆ ಸಾಧನೆ ಮಾಡಿದ. ಈ ವಿಷಯಕ್ಕೂ ಆತ ಖಿನ್ನತೆಗೆ ಒಳಗಾಗಿದ್ದ. ಅಪ್ಪ ಮತ್ತು ಮಗನ ಮಾತುಗಳನ್ನು ಆಲಿಸಿದ ನಂತರ ಇಬ್ಬರಿಗೂ ಕೆಲ ವಿಚಾರ ತಿಳಿಹೇಳಿದೆ. ಮಗ ಉನ್ನತ ಹುದ್ದೆ ಅಲಂಕರಿಸಲಿ ಎಂದು ಆಸೆ ಪಡುವುದು ತಪ್ಪಲ್ಲ. ಆದರೆ ಇದು ಸಾಧ್ಯವಾ? ಆತನ ಶಕ್ತಿ, ಸಾಮರ್ಥ್ಯವೇನು? ಎಂಬುದನ್ನೂ ಸ್ವಲ್ಪ ನೋಡಬೇಕು. ನಮ್ಮ ಅಂಕಗಳಿಕೆಯ ಒತ್ತಡ ಆತನಿಗೆ ಬೇಸರವಾಗಬಾರದು ಎನ್ನುವ ಜ್ಞಾನ ಅತ್ಯಗತ್ಯ. ಅದೇ ರೀತಿ ಮಕ್ಕಳೂ ಅಷ್ಟೇ. ಇರುವ ವಿಚಾರವನ್ನು ಧೈರ್ಯವಾಗಿ ಹೇಳಬೇಕು. ವಾಸ್ತವತೆ ತಿಳಿ ಹೇಳಬೇಕು.
