ಇಲ್ಲಿರುವ ಚಿತ್ರದಲ್ಲಿ ಕಾಣಿಸುತ್ತಿದೆಯಲ್ಲ. ಇದು ಶಿಲೀಂಧ್ರ ಜಾತಿಗೆ ಸೇರಿದ ಸಸ್ಯ. ಇದರ ವಿಶೇಷತೆಯೆಂದರೆ ಇದು ಕೀಟವೂ ಹೌದು, ಸಸ್ಯವೂ ಹೌದು. ಇದರ ಹೆಸರು ಕಾರ್ಡಿಸೆಪ್ಸ್ ಸಿನೆನ್ಸಿಸ್ (Cordyceps sinensis). ಪ್ರಾಚೀನ ರೋಮನ್ ಭಾಷೆಯಲ್ಲಿ ‘ಕಾರ್ಡ್’ ಎಂದರೆ ಬೆತ್ತ ಮತ್ತು ‘ಸೆಪ್ಸ್’ ಎಂದರೆ ತಲೆ. ಇವುಗಳ ಜೋಡಣೆಯಾಗಿ ಬೆತ್ತದಾಕಾರದ ತಲೆ ಎಂಬ ಹೆಸರು ಇದಕ್ಕೆ ಬಂದಿದೆ. ಈ ಶಿಲೀಂಧ್ರಗಳು ಹೆಚ್ಚಾಗಿ ನೇಪಾಳ, ಚೀನಾ, ಜಪಾನ್, ಭೂತಾನ್, ಕೊರಿಯಾ, ವಿಯಟ್ನಾಮ್, ಥಾಯ್ಲೆಂಡ್ ದೇಶಗಳಲ್ಲಿ ಕಂಡುಬಂದರೂ ಭಾರತದ ಪಶ್ಚಿಮ ಹಿಮಾಲಯದ ಹುಲ್ಲುಗಾವಲಿನಲ್ಲಿ ಹೇರಳವಾಗಿ ಬೆಳೆಯುತ್ತವೆ. ಭಾರತದಲ್ಲಿ ಇದನ್ನು ಕೀಡಾ ಜಡಿ ಎಂದು ಕರೆದರೆ, ಚೀನಾದವರು ಇದನ್ನು ಡಾಂಗ್ ಚಾಂಗ್ ಕ್ಸಿಯಾ ಕಾವೊ ಎಂದು ಕರೆಯುತ್ತಾರೆ, ಅಂದರೆ ಚಳಿಗಾಲದ ಕೀಟ ಬೇಸಿಗೆಗಾಲದ ಹುಲ್ಲು ಎಂದರ್ಥ.
