ಶ್ರೀಮದುಜ್ಜಯಿನಿ ಸದ್ಧರ್ಮ ಸಿಂಹಾಸನಾಧೀಶ ಶ್ರೀ ತರಳಬಾಳು ಜಗದ್ಗುರು ಬೃಹನ್ಮಠದ 20ನೇ ಜಗದ್ಗುರುಗಳಾಗಿದ್ದ ಶ್ರೀ ಶಿವಕುಮಾರ ಶಿವಾಚಾರ್ಯ ಮಹಾಸ್ವಾಮಿಗಳವರು ತಮ್ಮ ಜೀವಿತದ ಅವಧಿಯಲ್ಲಿಯೇ ಜನಮಾನಸದಲ್ಲಿ ದಂತಕಥೆಯಾದವರು. ಕೇವಲ ನುಡಿಜಾಣರಾಗದೆ ನಡೆಧೀರರೂ ಆಗಿದ್ದ ಅಪ್ರತಿಮ ವೀರಸನ್ಯಾಸಿ. ಹಳ್ಳಿಗಾಡುಗಳ ಜನರಿಗೆ ಶಿಕ್ಷಣದ ನೀರೆರೆದು, ಬದುಕಿನ ಬೆಂಗಾಡಿನಲ್ಲಿಯೂ ಸುಖದ ನಂದನವನವನ್ನು ನಿರ್ವಿುಸಿದವರು. ಅಂಜದೆ ಅಳುಕದೆ ಪರಮಾತ್ಮನ ರಾಜತೇಜದಲ್ಲಿ ಬಾಳಿ ಸಮಾಜವನ್ನು ಮುನ್ನಡೆಸಿದವರು. ಅವರು ಆಸೀನರಾದದ್ದು ಬೆಳ್ಳಿ ಬಂಗಾರದ ಸಿಂಹಾಸನದ ಮೇಲೆ ಅಲ್ಲ, ಭಕ್ತರ ಹೃದಯವೇ ಅವರ ಸಿಂಹಾಸನವಾಗಿತ್ತು. ಶ್ರೀಗಳ ಪೂರ್ವಾಶ್ರಮದ ಹೆಸರು ರೇವಣಸಿದ್ದಯ್ಯ. ಹೊಳಲ್ಕೆರೆ ತಾಲ್ಲೂಕಿನ ಮುತ್ತುಗದೂರಿನಲ್ಲಿ 1914ರ ಬಸವ ಜಯಂತಿಯಂದು ಮಹಾದೇವಯ್ಯ ಮತ್ತು ಬಸಮ್ಮನವರ ಮಗನಾಗಿ ಜನಿಸಿದರು. ಬೀರೂರು, ಕಾಶಿಯಲ್ಲಿ ವಿದ್ಯಾಭ್ಯಾಸ ಮಾಡಿ ತರಳಬಾಳು ಮಠದ ಶಾಖಾ ಮಠವಾದ ಹಾಸನ ಜಿಲ್ಲೆಯ ಯಲಹಂಕ ಮಠಕ್ಕೆ ಶ್ರೀ ಶಿವಕುಮಾರ ಶಿವಾಚಾರ್ಯ ಸ್ವಾಮಿಗಳು ಎಂಬ ಅಭಿದಾನದಿಂದ ಪಟ್ಟಾಭಿಷೇಕಗೊಂಡರು. ನಂತರ ಅವರನ್ನು ಸಿರಿಗೆರೆಯ ಮೂಲಪೀಠಕ್ಕೆ 1940ರಲ್ಲಿ ಪಟ್ಟಾಧಿಕಾರಿಯನ್ನಾಗಿ ಮಾಡಲಾಯಿತು. ಅವರು ತರಳಬಾಳು ಪೀಠವನ್ನು ಕೇವಲ ಧಾರ್ವಿುಕ ಕ್ಷೇತ್ರವನ್ನಾಗಿಸದೆ ಸಮಾಜಮುಖಿಯನ್ನಾಗಿ ಮಾಡಿದರು. ಕಾಯಕ ಮತ್ತು ಕಾಲದ ಮಹತ್ವ ಸಾರಿ, ಸಿರಿಗೆರೆಯನ್ನು ಅನ್ನ-ಅಕ್ಷರ-ಆಸರೆಯ ಕಾಶಿಯನ್ನಾಗಿಸಿದರು. ಸಂವಿಧಾನ ರಚನೆಯ ಪೂರ್ವದಲ್ಲಿಯೇ ಜಾತ್ಯತೀತ ಸಮಾಜದ ಕನಸು ಕಂಡು ನನಸನ್ನಾಗಿಸಿದರು. 14 ಜಿಲ್ಲೆಗಳಲ್ಲಿ ನೂರಾರು ಶಾಲೆ ಕಾಲೇಜುಗಳನ್ನು ಸ್ಥಾಪಿಸಿದರು. ಪ್ರಸಾದ ನಿಲಯಗಳನ್ನು ತೆರೆದರು. ಅಣ್ಣನ ಬಳಗ, ಅಕ್ಕನ ಬಳಗ, ತರಳಬಾಳು ಕಲಾಸಂಘ, ತರಳಬಾಳು ಪ್ರಕಾಶನ ಹೀಗೆ ಹಲವಾರು ಸಂಸ್ಥೆಗಳನ್ನು ಸ್ಥಾಪಿಸಿದರು. ಶಿವಾನುಭವ ಪ್ರವಾಸ, ಜಾತಿ- ಧರ್ಮ ಮೀರಿ ಸರ್ವಶರಣ ಸಮ್ಮೇಳನಗಳನ್ನು ಸಂಘಟಿಸಿದರು. ಸಂಸ್ಕೃತ ಪಾಂಡಿತ್ಯ ಗಳಿಸಿದ್ದ ಅವರು ಕವಿ, ಲೇಖಕ, ವಿಮರ್ಶಕ, ನಾಟಕ ರಚನೆಕಾರ- ನಿರ್ದೇಶಕ, ಉತ್ತಮ ವಾಗ್ಮಿಗಳೂ ಆಗಿದ್ದರು. ಅವರ ಅಸಂಖ್ಯಾತ ಶಿಷ್ಯರು ಶಿಕ್ಷಕರಾಗಿ, ಜನನಾಯಕರಾಗಿ, ವಿದ್ವಾಂಸರಾಗಿ, ಉದ್ಯಮಿಗಳಾಗಿ, ವಿಜ್ಞಾನಿಗಳಾಗಿ, ವೈದ್ಯರಾಗಿ ಯಶಸ್ವಿಯಾಗಿದ್ದಾರೆ.
