ಬೆಳೆಗಳನ್ನು ನಾಶಮಾಡುವ ಪ್ರಾಣಿಗಳನ್ನು ನಿಯಂತ್ರಿಸಲು ಬಹಳಷ್ಟು ಮಂದಿ ಹಿಂಸೆಯ ಮಾರ್ಗ ಹಿಡಿಯುತ್ತಾರೆ. ಅಹಿಂಸಾತ್ಮಕ ದಾರಿ ಅನುಸರಿಸುವುದು ಉತ್ತಮ. ಕಾಡುಪ್ರಾಣಿಗಳು ಕೃಷಿಕರ ತೋಟ ಪ್ರವೇಶಿಸದಂತೆ ಮಾಡಲು ಕಾಡಿನಲ್ಲಿ ಅವುಗಳಿಗೆ ಆಹಾರ ಸಿಗುವ ವ್ಯವಸ್ಥೆ ಮಾಡುವುದು ಅಗತ್ಯ. ಆನೆ, ಕೋತಿಗಳು, ಕಡವೆ, ಜಿಂಕೆಗಳು, ಕಾಡುಹಂದಿಗಳು, ನವಿಲುಗಳು ಸಾಮಾನ್ಯವಾಗಿರುವಂತಹ ಪ್ರಾಣಿಗಳು. ಶುದ್ಧ ಸಸ್ಯಾಹಾರಿಗಳಾದ ಇವು ಬೇಸಿಗೆಯ ಮೂರು ತಿಂಗಳಲ್ಲಿ ಕಾಡಿನಲ್ಲಿ ಆಹಾರ ದೊರಕದೆ ತೋಟಗಳಿಗೆ ಪ್ರವೇಶಿಸಿ ಕಬ್ಬು, ಅಡಿಕೆ, ಏಲಕ್ಕಿ, ಕೊಕೋ, ಬಾಳೆಹಣ್ಣು ಮತ್ತು ತರಕಾರಿಗಳನ್ನು ತಿನ್ನುತ್ತವೆ ಮತ್ತು ಅಷ್ಟೇ ಹಾಳುಗೆಡವುತ್ತವೆ. ಇತ್ತೀಚಿನ ವರ್ಷಗಳಲ್ಲಿ ವನ್ಯರಕ್ಷಣೆ ಮತ್ತು ಕಾಡಿನಲ್ಲಿ ಮರ ನೆಡುವ ಕಾರ್ಯಗಳು ಹೆಚ್ಚಾಗುತ್ತಿವೆ. ಆದರೆ, ಹೀಗೆ ನೆಟ್ಟ ಮರಗಳಲ್ಲಿ ಅಕೇಶಿಯಾ, ಮಾಂಜಿಯಮ್ ಸಾಗುವಾನಿ, ದೇವದಾರು ಮತ್ತು ಕಾಗದ ತಯಾರಿಗಾಗಿ ನೀಲಗಿರಿ ಇತ್ಯಾದಿಗಳೇ ಹೆಚ್ಚು. ನೀವು ಹೆಸರು ಹೇಳಿದ ತಕ್ಷಣವೇ ಊಹಿಸಬಲ್ಲಿರಿ. ಇವು ಹಣ್ಣು ಕೊಡುವ ಗಿಡಗಳಲ್ಲ ಹಾಗೂ ಭೂಮಿಯಲ್ಲಿರುವ ನೀರನ್ನು ಇಂಗಿಸುವ ಪ್ರಭೇದಗಳಿಗೆ ಸೇರಿದವು ಎಂದು. ಎತ್ತರದಿಂದ ಅಥವಾ ಉಪಗ್ರಹದಿಂದ ಕಾಣುವಾಗ ಹಸಿರಾಗಿ ಕಂಡರೂ ಇವು ಪ್ರಾಣಿಗಳಿಗೆ ಆಹಾರ ನೀಡಲಾರವು. ವನ್ಯಜೀವಿಗಳು ಕಡಿಮೆ ಆಗುತ್ತ ಹೋದ ಹಾಗೆ ನಾಡು ಬೆಳೆಯುತ್ತ ಹೋಯಿತು. ಕಾಡು ನಾಶವಾಗುತ್ತ ಹೋಯಿತು.
