ಕೋಕೋಪಿಟ್​ಗೆ ಜೈ ಜವಾನ್; ರೈತರಿಗೆ ನೆರವಾಗುತ್ತಿರುವ ಮಾಜಿ ಯೋಧ

| ಶಿವು ಹುಣಸೂರು

ಹದಿನೇಳು ವರ್ಷ ದೇಶ ರಕ್ಷಣೆ ಮಾಡಿ, ನಿವೃತ್ತಿ ಹೊಂದಿದ ಬಳಿಕ ಹುಟ್ಟೂರಿಗೆ ಬಂದ ಯೋಧ, ಪ್ರಸ್ತುತ ಕೋಕೋಪಿಟ್ ಸಾವಯವ ಗೊಬ್ಬರ ಘಟಕ ಸ್ಥಾಪಿಸಿ ‘ಜೈ ಜವಾನ್ - ಜೈ ಕಿಸಾನ್’ ವಾಣಿಯನ್ನು ಮೊಳಗಿಸಿದ್ದಾರೆ.

ಹುಣಸೂರು ತಾಲೂಕು ಎಮ್ಮೆಕೊಪ್ಪಲು ಗ್ರಾಮದ ಮೋಹನ್​ಕುಮಾರ್, ವಾಯುಸೇನಾ ವಿಭಾಗದ ವಿವಿಧ ಹುದ್ದೆಗಳಲ್ಲಿ ಯಶಸ್ವಿಯಾಗಿ ಕರ್ತವ್ಯ ನಿರ್ವಹಿಸಿ 2016ರಲ್ಲಿ ಸ್ವಯಂ ನಿವೃತ್ತಿ ಹೊಂದಿದರು. ಇದೀಗ ಗ್ರಾಮದಲ್ಲೇ ಯಶಸ್ವಿನಿ ಗೋಲ್ಡ್ ಕೋಕೋಪಿಟ್ ಸಾವಯವ ಗೊಬ್ಬರ ತಯಾರಿಕಾ ಘಟಕ ಸ್ಥಾಪನೆ ಮಾಡಿ, ಹಲವು ರೈತರಿಗೆ ನೆರವಾಗಿದ್ದಾರೆ.

ಎಲ್ಲ ಬೆಳೆಗಳಿಗೂ ಕೋಕೋಪಿಟ್: ತಾಲೂಕಿನ ಬಿಳಿಕೆರೆ ಹೋಬಳಿ ಶೇ.80 ಮಳೆಯಾಶ್ರಿತ ಕೃಷಿ ಪ್ರದೇಶವಾಗಿದೆ. ಹಾಗಾಗಿ, ಈ ಭಾಗದ ರೈತರು ತಂಬಾಕಿಗಿಂತ ತರಕಾರಿ, ಹೂವು, ಹಣ್ಣಿನ ಬೆಳೆಗಳನ್ನು ಬೆಳೆದು ಪಕ್ಕದ ಮೈಸೂರಿಗೆ ತೆರಳಿ ಮಾರಾಟ ಮಾಡುತ್ತಾರೆ. ಇತ್ತೀಚಿನ ವರ್ಷಗಳಲ್ಲಿ ರೈತರು ಬೆಳೆಯುವ ಪ್ರತಿಯೊಂದು ಬೆಳೆಗೂ ಕೋಕೋಪಿಟ್ ಬಳಸಲು ಆರಂಭಿಸಿದ್ದು, ಉತ್ತಮ ಇಳುವರಿ ಪಡೆಯುತ್ತಿದ್ದಾರೆ.

30 ಕುಟುಂಬಗಳಿಗೆ ಜೀವನ: ಮೋಹನ್​ಕುಮಾರ್ ಸ್ಥಾಪಿಸಿರುವ ಘಟಕದಲ್ಲಿ 30ಕ್ಕೂ ಹೆಚ್ಚು ಕೆಲಸಗಾರರು ದುಡಿಯುತ್ತಿದ್ದು, ಅವರಿಗೆ ಸ್ಥಳೀಯವಾಗಿ ಉದ್ಯೋಗ ದೊರಕಿರುವ ಸಮಾಧಾನವಿದೆ. ಪ್ರತಿದಿನ ಕನಿಷ್ಠ 32 ಸಾವಿರ ಕೆಜಿ ಕೋಕೋಪಿಟ್ ತಯಾರಿಸಿ ಮಾರಾಟ ಮಾಡುವ ಮೂಲಕ ದಾಖಲೆ ನಿರ್ವಿುಸಿದ್ದಾರೆ.

ಅಂತಾರಾಜ್ಯ ಮಾರಾಟಗಾರ: ಅತ್ಯಂತ ವೈಜ್ಞಾನಿಕವಾಗಿ, ಗುಣಮಟ್ಟದಿಂದ ಇಸಿ ಮತ್ತು ಪಿಎಚ್ ಲೆವೆಲ್​ಗಳನ್ನು ನಿರ್ದಿಷ್ಟ ಪ್ರಮಾಣದಲ್ಲಿ ಖಾತ್ರಿಪಡಿಸಿಕೊಂಡು ಅಂತಿಮ ಹಂತದಲ್ಲಿ ಮೈಕ್ರೋನ್ಯೂಟ್ರಿಯೆಂಟ್​ಗಳನ್ನು ಸೇರಿಸಿ ಗೊಬ್ಬರ ತಯಾರಿಸಿ ರೈತರಿಗೆ ಮಾರಾಟ ಮಾಡಲಾಗುತ್ತಿದೆ. ಇದೀಗ ಇವರ ಘಟಕದ ಗೊಬ್ಬರಕ್ಕೆ ಕೇರಳ, ತಮಿಳುನಾಡು, ಮಹಾರಾಷ್ಟ್ರದಲ್ಲೂ ಬೇಡಿಕೆಯಿದೆ. ರಾಜ್ಯದ ಮೈಸೂರು, ಕೊಡಗು, ಚಾಮರಾಜನಗರ, ಹಾಸನ, ಮಂಡ್ಯ, ದಾವಣಗೆರೆ, ಬೆಳಗಾವಿ ಮುಂತಾದ ಜಿಲ್ಲೆಗಳಿಗೆ ಪೂರೈಕೆಯಾಗುತ್ತಿದೆ.

ವಿಶೇಷತೆಗಳು: ತೆಂಗಿನ ನಾರಿನಿಂದ ತಯಾರಾದ ಈ ಗೊಬ್ಬರ ಬಳಕೆಯಿಂದ ಮಣ್ಣಿನಲ್ಲಿ ಗಾಳಿಯಾಡುವಿಕೆ ಹೆಚ್ಚಿಸುತ್ತದೆ. ನೀರಿನ ಅಂಶವನ್ನು ಹೆಚ್ಚು ಕಾಲ ಹಿಡಿದಿಡುವ ಶಕ್ತಿ ಇದೆ. ಮಣ್ಣಿನ ಫಲವತ್ತತೆ ಹೆಚ್ಚುತ್ತದೆ. ಇತ್ತೀಚಿನ ದಿನಗಳಲ್ಲಿ ಶುಂಠಿ ಬೆಳೆಗೂ ಈ ಗೊಬ್ಬರವನ್ನು ರೈತರು ಬಳಸುತ್ತಿದ್ದಾರೆ.

https://www.vijayavani.net/people-remembering-atal-along-with-lata/

https://www.vijayavani.net/here-is-the-photo-video-of-lata-mangeshkar-which-have-taken-at-her-last-days/