ಅಕ್ಟೋಬರ್ 2 ಮಹಾತ್ಮಗಾಂಧಿ ತಾತನ ಜನ್ಮದಿನ. ಗಾಂಧಿ ಎಂದಕೂಡಲೆ ಬಿಳಿ ಉಡುಪಿನಲ್ಲಿ ಊರುಗೋಲು ಹಿಡಿದುಕೊಂಡಿರುವ ವ್ಯಕ್ತಿತ್ವ ಕಣ್ಣಮುಂದೆ ಬರುತ್ತದೆ. ಗಾಂಧಿ ಜಯಂತಿಯನ್ನು ಪ್ರಧಾನಿ ನರೇಂದ್ರ ಮೋದಿಯವರು ಸ್ವಚ್ಛ ಭಾರತ ಆಂದೋಲನವನ್ನಾಗಿ ರೂಪಾಂತರಿಸಿದ್ದಾರೆ. ಈ ಅಭಿಯಾನವನ್ನು ಗಾಂಧಿ ಜಯಂತಿಯಂದು ಮಾತ್ರ ಅನುಸರಿಸದೆ, ನಮ್ಮ ದಿನನಿತ್ಯದ ಬದುಕಿನಲ್ಲಿ ಅಳವಡಿಸಿಕೊಳ್ಳುವ ಅಗತ್ಯ ಇದೆ. ಈ ಮುಂಚೆ ಶಾಲಾದಿನ ಗಳಲ್ಲಿ ಶಾಲಾ ತರಗತಿ, ಆವರಣ ಎಲ್ಲವನ್ನೂ ಸ್ವಚ್ಛ ಮಾಡುವ ಕೆಲಸ ವಿದ್ಯಾರ್ಥಿಗಳದ್ದೇ ಆಗಿರುತ್ತಿತ್ತು. ಪ್ರತಿ ದಿನ ಒಂದೊಂದು ತರಗತಿ ಮಕ್ಕಳು ಶಾಲಾ ಸ್ವಚ್ಛತೆ ನೋಡಿಕೊಳ್ಳುತ್ತಿದ್ದರು. ಇದರಿಂದ ಕಲಿಕೆ, ಶಾಲಾಭಿಮಾನ, ಪರಿಸರ ಹಾಳುಮಾಡಬಾರದೆಂಬ ಮನಸ್ಥಿತಿ ಬೆಳೆಯುತ್ತದೆ. ‘ನಮ್ಮ ಶಾಲೆ’ ಎಂಬ ಶಾಲಾಭಿಮಾನ ಬೆಳೆಸಿಕೊಂಡು ಕೆಲಸ ಮಾಡಿದರೆ ಯಾವುದೂ ನಮಗೆ ಕಷ್ಟವಲ್ಲ ಹಾಗೂ ನಮ್ಮ ಗೌರವಕ್ಕೂ ಧಕ್ಕೆ ತರುವುದಿಲ್ಲ. ಇಂದು ಸಾಕಷ್ಟು ಗ್ರಾಮೀಣ ಶಾಲೆಗಳಲ್ಲಿ ಮಕ್ಕಳು ಶಾಲಾಭಿಮಾನ ಬೆಳೆಸಿಕೊಂಡು, ಶಿಕ್ಷಕರೊಂದಿಗೆ ಸೇರಿಕೊಂಡು, ಶಾಲಾ ಆವರಣ ಸ್ವಚ್ಛತೆ, ಗಿಡಗಳಿಗೆ ನೀರೆರೆಯುವುದು ಸೇರಿದಂತೆ ಸಾಕಷ್ಟು ಚಟುವಟಿಕೆಗಳಲ್ಲಿ ಕೈಜೋಡಿಸುತ್ತಾರೆ. ಇಂತಹ ಮಕ್ಕಳಲ್ಲಿ ಜೀವನಮೌಲ್ಯ ಹೆಚ್ಚಿರುತ್ತದೆ. ಈ ಬಗ್ಗೆ ನಾವೇನು ಮಾಡಬಹುದು ಎಂದು ತಜ್ಞರ, ವಿದ್ಯಾರ್ಥಿಗಳ ಅಭಿಪ್ರಾಯ ಇಲ್ಲಿ ನೀಡಲಾಗಿದೆ.
