ಶಹರೀಕರಣ ಮತ್ತು ಏರುತ್ತಿರುವ ದಿನನಿತ್ಯದ ವೆಚ್ಚ ಅಪ್ಪ-ಅಮ್ಮ ಇಬ್ಬರ ಹೆಗಲಿಗೂ ಸಂಸಾರದ ಆರ್ಥಿಕ ನಿರ್ವಹಣೆಯ ನೊಗವನ್ನು ಕಟ್ಟಿದೆ. ಇದು ಮಕ್ಕಳ ಒಂಟಿತನಕ್ಕೆ ಕಾರಣವಾಗುತ್ತಿದ್ದು, ಅವರ ಬೆಳವಣಿಗೆಯ ಸಮಯದಲ್ಲಿ ಹಲವು ರೀತಿಯ ಸವಾಲುಗಳನ್ನು ಎದುರಿಸುವಂತೆ ಮಾಡುತ್ತಿದೆ. ಮನಶಾಸ್ತ್ರದ ಒಂದು ಭಾಗವಾಗಿರುವ ‘ಪೋಷಿಸುವ ಶೈಲಿ’ಯ ಕುರಿತು ಅಧ್ಯಯನದ ಕೊರತೆ ಭಾರತದಲ್ಲಿದೆ. ಮೊದಲೆಲ್ಲ ಕೂಡುಕುಟುಂಬಗಳಲ್ಲಿ ಬೆಳೆಯುತ್ತಿದ್ದ ನಮಗೆ ಇದರ ಜರೂರತ್ತೂ ಇರಲಿಲ್ಲ ಬಿಡಿ. ಆದರೆ ಬದಲಾಗುತ್ತಿರುವ ಭಾರತೀಯ ಜೀವನಶೈಲಿಯಲ್ಲಿ ಕೂಡುಕುಟುಂಬಗಳು ಕಳೆದು ಅಣುಸಂಸಾರಗಳಾಗಿ ಮಾರ್ಪಟ್ಟಿವೆ. ಇಂತಹ ಪರಿಸ್ಥಿತಿಯಲ್ಲಿ ಇಂತಹುದೊಂದು ಅಧ್ಯಯನದ ಜರೂರತ್ತು ನಮಗೀಗ ಕಾಣತೊಡಗಿದೆ. ಜಾಗತಿಕವಾಗಿ ನೋಡುವುದಾದರೆ ಈ ಕುರಿತಾದ ಹೆಚ್ಚಿನ ಸಂಶೋಧನೆಗಳು ನಡೆದಿದ್ದು, ಈ ಸಾಲಿನಲ್ಲಿ ನಮಗೆ ಮೊದಲು ಕಾಣುವುದು ನ್ಯೂಯಾರ್ಕ್ ಮೂಲದ ಡಾ. ಡಯಾನ ಬಾಮ್ರಿಂಡ್ ಹೆಸರು.
