ಪ್ರಪಂಚದಲ್ಲೇ ಯಾರೂ ನೀಡಲಾಗದ ಅತಿ ಹೆಚ್ಚು ನೋವು, ಸಂಕಟವನ್ನು ಹೆರಿಗೆ ನೀಡುತ್ತದೆ ಎಂದು ಯಾರೋ ಹೇಳಿದ ಮಾತನ್ನು ಕೇಳಿ ಬಹಳಷ್ಟು ಜನ ಭಯದಿಂದ ದಯವಿಟ್ಟು ಸಿಸೇರಿಯನ್ ಡೆಲಿವರಿ ಮಾಡಿಕೊಡಿ ಎಂದು ಬರುತ್ತಾರೆ. ಆದರೆ ನೈಸರ್ಗಿಕ ಹೆರಿಗೆಯಿಂದ ತಾಯಿ ಮತ್ತು ಮಗು ಇಬ್ಬರಿಗೂ ಪ್ರಯೋಜನ ಹೆಚ್ಚು. ಮಗು, ತಾಯಿಯ ದೇಹದಿಂದ ಹೊರಬರುವಾಗ ಅಲ್ಲಿರುವ ಬ್ಯಾಕ್ಟೀರಿಯಾ ಮಗುವಿಗೆ ಅಂಟಿಕೊಳ್ಳುತ್ತವೆ. ಅವು ಮಗುವಿನ ಭವಿಷ್ಯದ ಮೇಲೆ ಪರಿಣಾಮ ಬೀರುತ್ತವೆ. ಅಸ್ತಮಾ, ನರಗಳಿಗೆ ಸಂಬಂಧ ಪಟ್ಟ ರೋಗ ಮುಂತಾದ ಹಲವಾರು ಸಮಸ್ಯೆಗಳು ಮಗುವಿಗೆ ಕಾಡದಂತೆ ಆ ಬ್ಯಾಕ್ಟೀರಿಯಾಗಳು ಮಾಡುತ್ತವೆ. ತಾಯಿಯಲ್ಲಿ ಹೆಚ್ಚಿನ ರಕ್ತಸ್ರಾವವಾಗದಂತೆ ನೈಸರ್ಗಿಕ ಹೆರಿಗೆ ನೋಡಿಕೊಳ್ಳುತ್ತದೆ. ಅದರೊಂದಿಗೆ ಮುಂದಿನ ಗರ್ಭಧಾರಣೆಗೆ ಕೂಡ ಸಹಕಾರಿ. ಹೆರಿಗೆ ಸಂದರ್ಭದಲ್ಲಿ ನೋವಾಗುವುದು ಸಹಜ. ಅದನ್ನು ಹಿಮ್ಮೆಟ್ಟಲು ಹಲವಾರು ವಿಧಾನಗಳಿವೆ. ಹಾಗಾಗಿ ಹೆದರಿಕೊಂಡು ಸಿ-ಸೆಕ್ಷನ್ ಡೆಲಿವರಿಗೆ ಹೋಗಬಾರದು. ವೈದ್ಯರು ಕೂಡ ಗರ್ಭಧರಿಸಿದ ದಿನದಿಂದಲೇ ನೈಸರ್ಗಿಕ ಹೆರಿಗೆಯ ಬಗ್ಗೆ ಮಾಹಿತಿ ನೀಡಿ ತಾಯಿ, ಕುಟುಂಬದ ಜತೆ ಸಮಾಲೋಚಿಸಬೇಕು.
