ಈ ರೀತಿ ಪದೇ ಪದೇ ಆಗುತ್ತಿದ್ದರೆ ಮುಂದೆ ಇದು ಸಂಧಿ ಪೂರ್ತಿಯಾಗಿ ಹಾಳಾಗಲು ಅಥವಾ ಸಂಧಿ ವಕ್ರವಾಗಲು ಕಾರಣವಾಗಬಹುದು. ಹಾಗಾಗಿ ಇದನ್ನು ಬೇಗ ಗುಣಪಡಿಸಿಕೊಳ್ಳಲು ಕ್ರಮಗಳನ್ನು ಕೈಗೊಳ್ಳಲೇಬೇಕು. ಈ ಸಮಸ್ಯೆಗೆ ಅಮೃತಬಳ್ಳಿ ರಾಮಬಾಣದಂತೆ ಕೆಲಸ ಮಾಡುತ್ತದೆ. ಅಮೃತಬಳ್ಳಿಯ ಕಷಾಯವನ್ನು ಕುಡಿಯುವುದರಿಂದ ತೀವ್ರತರವಾದ ಸಮಸ್ಯೆಯನ್ನು ಕಡಿಮೆ ಮಾಡಿಕೊಳ್ಳಬಹುದು ಮತ್ತು ವಾರಕ್ಕೆ ಒಂದೆರಡು ದಿನ ಅಮೃತಬಳ್ಳಿಯ ಕಷಾಯವನ್ನು ಕುಡಿಯುತ್ತಿದ್ದರೆ ಪದೇಪದೇ ತೊಂದರೆಯಾಗುವುದನ್ನು ತಪ್ಪಿಸಬಹುದು. ಉರಿಯೂತವನ್ನು ಕಡಿಮೆ ಮಾಡುವ ಮತ್ತು ಸಂಧಿಗಳ ತೊಂದರೆಗಳನ್ನು ನಿವಾರಿಸುವ ಶುಂಠಿಯನ್ನು ಕಷಾಯ ಮಾಡುವಾಗ ಸೇರಿಸಿದರೆ ಅದರ ಗುಣ ಇನ್ನೂ ಚೆನ್ನಾಗಿ ವೃದ್ಧಿಯಾಗುತ್ತದೆ. ಹಾಗಾಗಿ ಆಗಾಗ ಅಮೃತಬಳ್ಳಿ ಮತ್ತು ಶುಂಠಿಯ ಕಷಾಯವನ್ನು ಸೇವಿಸುತ್ತಿರಬೇಕು. ಪಂಚಕರ್ಮ ಚಿಕಿತ್ಸೆಗಳಾದ ವಿರೇಚನ ಮತ್ತು ಬಸ್ತಿ ಚಿಕಿತ್ಸೆಗಳು ತೀವ್ರತರವಾದ ಮತ್ತು ದೀರ್ಘಕಾಲದಿಂದ ಇರುವ ಸಮಸ್ಯೆಗಳನ್ನು ನಿವಾರಿಸುತ್ತವೆ. ಅರ್ಧ ಚಮಚ ಅಣಲೇ ಕಾಯಿಯ ಪುಡಿಯನ್ನು ಮಲಗುವ ಮೊದಲು ಬಿಸಿನೀರಿಗೆ ಹಾಕಿ ಸೇವಿಸಿದರೆ ಅದು ಕೂಡ ಪರಿಣಾಮಕಾರಿಯಾಗಿ ಕೆಲಸ ಮಾಡುತ್ತದೆ. ಒಂದೆರಡು ಬಾರಿ ಭೇದಿಯೂ ಆಗಬಹುದು. ನಾವು ನಿಸರ್ಗ ಮನೆಯಲ್ಲಿ ಯೂರಿಕ್ ಆಸಿಡ್ ಕಷಾಯ ಎಂಬ ವಿಶೇಷ ಆಯುರ್ವೆದ ಔಷಧವನ್ನು ಕೊಟ್ಟು ಇದರ ಸಮಸ್ಯೆಯನ್ನು ಕಡಿಮೆ ಮಾಡುತ್ತೇವೆ. ಈ ಸಮಸ್ಯೆಯಲ್ಲಿ ಪಥ್ಯ ಕೂಡ ತುಂಬಾ ಮಹತ್ವದ್ದು. ಪ್ಯೂರಿನ್ ಹೆಚ್ಚಿರುವ ಆಹಾರ ಪದಾರ್ಥಗಳನ್ನು ತ್ಯಜಿಸಲೇಬೇಕು. ಎಲ್ಲ ರೀತಿಯ ಮದ್ಯಪಾನ, ಎಲ್ಲಾ ರೀತಿಯ ಮಾಂಸಾಹಾರ, ಹೂಕೋಸು, ಮಶ್ರೂಮ್ ಶೇಂಗಾ ಮುಂತಾದವುಗಳನ್ನು ಮೂರು ತಿಂಗಳ ಕಾಲ ತ್ಯಜಿಸಬೇಕು. ಮೊಟ್ಟೆಗಳನ್ನು ಸೇವಿಸಬಹುದು. ಬಾದಾಮಿ, ಅಂಜೂರ ಅಥವಾ ಗೋಡಂಬಿಯಂತಹ ನಟ್ಗಳಲ್ಲಿ ಪ್ಯೂರಿನ್ ಇರುವುದಿಲ್ಲ. ಬಹುತೇಕ ಹಣ್ಣುಗಳು, ತರಕಾರಿಗಳು ಮತ್ತು ಧಾನ್ಯಗಳನ್ನು ಸೇವಿಸಬಹುದು. ಹಾಲು ಮತ್ತು ಹಾಲಿನ ಉತ್ಪನ್ನಗಳನ್ನು ಪೋ›ಟೀನ್ ಎಂಬ ಕಾರಣಕ್ಕೆ ತುಂಬಾ ಜನ ಯೂರಿಕ್ ಆಸಿಡ್ ಸಮಸ್ಯೆಯಲ್ಲಿ ತ್ಯಜಿಸುತ್ತಾರೆ. ಆದರೆ ಪ್ಯೂರಿನ್ ಇಲ್ಲದ ಕಾರಣ ಇವುಗಳನ್ನು ಸೇವಿಸಬಹುದು.
