ತೇಲುವ ಸೌರ ಪಿವಿ ಪ್ರಾಜೆಕ್ಟ್; ಆಂಧ್ರದಲ್ಲಿ ತಲೆ ಎತ್ತಿದೆ ದೇಶದ ಅತಿದೊಡ್ಡ ಸೌರ ವಿದ್ಯುತ್ ಉತ್ಪಾದನಾ ಘಟಕ

ಆಂಧ್ರ ಪ್ರದೇಶದ ವಿಶಾಖಪಟ್ಟಣಂನ ಸಿಂಹಾದ್ರಿ ಉಷ್ಣ ಸ್ಥಾವರದ ಅಧೀನದಲ್ಲಿ ದೇಶದ ಮೊದಲ ಅತಿದೊಡ್ಡ ಸೌರ ವಿದ್ಯುತ್ ಉತ್ಪಾದನಾ ಘಟಕವನ್ನು ಆ.21 ರಂದು ಲೋಕಾರ್ಪಣೆ ಮಾಡಲಾಗಿದೆ. ನ್ಯಾಷನಲ್ ಥರ್ಮಲ್ ಪವರ್ ಕಾರ್ಪೆರೇಶನ್ (ಎನ್​ಟಿಪಿಸಿ) ಅಧೀನದ ಉಷ್ಣ ಸ್ಥಾವರದಲ್ಲಿ ಈ ಘಟಕ ಕೆಲಸ ಶುರುಮಾಡಿದೆ.

ಘಟಕದ ವಿಶೇಷತೆ

• 25 MW ಸಾಮರ್ಥ್ಯದ ವಿಶೇಷ ವಿನ್ಯಾಸದ ಘಟಕ
• 75 ಎಕರೆ ವ್ಯಾಪ್ತಿಯ ಮೀಸಲು ಜಲಾಶಯದಲ್ಲಿ ತೇಲುವ ವಿನ್ಯಾಸದಲ್ಲಿ ಸೌರ ಫಲಕಗಳ ಅಳವಡಿಕೆ
• 1 ಲಕ್ಷಕ್ಕೂ ಹೆಚ್ಚು ಸೌರ ಪಿವಿ ಮಾಡ್ಯೂಲ್​ಗಳ ಮೂಲಕ ವಿದ್ಯುತ್ ಉತ್ಪಾದನೆ
• 2018ರಲ್ಲಿ ಕೇಂದ್ರ ಸರ್ಕಾರ ಫ್ಲೆಕ್ಸಿಬಿಲೈಸೇಶನ್ ಸ್ಕೀಮ್ ಪ್ರಕಾರ ಅನುಷ್ಠಾನಕ್ಕೆ ತಂದ ಮೊದಲ ಸೌರ ವಿದ್ಯುತ್ ಪ್ರಾಜೆಕ್ಟ್

ಎನ್​ಟಿಪಿಸಿ ಯೋಜನೆಗಳು

• ತೆಲಂಗಾಣದಲ್ಲಿ ತಲೆ ಎತ್ತಲಿದೆ ದೇಶದ ಅತಿದೊಡ್ಡ 100MW ತೇಲುವ ಸೌರ ವಿದ್ಯುತ್ ಘಟಕ
• ತಮಿಳುನಾಡಿನ ರಾಮಗುಂಡಂ ಉಷ್ಣ ಸ್ಥಾವರದ ಜಲಾಶಯದಲ್ಲಿ ಸ್ಥಾಪನೆಯಾಗಲಿದೆ 100MW ತೇಲುವ ಸೌರ ವಿದ್ಯುತ್ ಘಟಕ
• 100MW ತೇಲುವ ಸೌರ ವಿದ್ಯುತ್ ಘಟಕವು 450 ಎಕರೆ ಪ್ರದೇಶದಲ್ಲಿ 4.5 ಲಕ್ಷ ಸೌರ ಫಲಕವನ್ನು ಒಳಗೊಂಡಿರಲಿದೆ.
• ಈ ಪ್ರಾಜೆಕ್ಟ್​ಗೆ ಅಂದಾಜು 423 ಕೋಟಿ ರೂಪಾಯಿ ಹೂಡಿಕೆ ಅಂದಾಜಿಸಲಾಗಿದೆ.

ಸಿಂಹಾದ್ರಿ ಉಷ್ಣ ಸ್ಥಾವರ

• 20ಕ್ಕೂ ಹೆಚ್ಚು ವರ್ಷಗಳಿಂದ ವಿಶಾಖಪಟ್ಟಣಂ ಸಮೀಪ ಚಾಲ್ತಿಯಲ್ಲಿರುವ ವಿದ್ಯುತ್ ಉತ್ಪಾದನಾ ಘಟಕ
• 2000MW ಸಾಮರ್ಥ್ಯದ ಕಲ್ಲಿದ್ದಲು ಆಧಾರಿತ ವಿದ್ಯುತ್ ಉತ್ಪಾದನಾ ಯೋಜನೆ
• ಬಂಗಾಳ ಕೊಲ್ಲಿಯಿಂದ ಒಳ ಪ್ರವೇಶಿಸಿ ಉಂಟಾದ ಜಲಾಶಯದಲ್ಲಿ ನಿರ್ವಣವಾದ ಮೊದಲ ಉಷ್ಣ ವಿದ್ಯುತ್ ಸ್ಥಾವರ

ಪ್ರಯೋಜನಗಳೇನು?

• 7,000 ಮನೆ ಬೆಳಗುವ ಸಾಮರ್ಥ್ಯ
• 46,000 ಟನ್ ಸಮನಾದ ಕಾರ್ಬನ್ ಡೈಆಕ್ಸೈಡ್ ಅನ್ನು ಪ್ರತಿವರ್ಷ ಕಡಿಮೆ ಮಾಡುವ ಸಾಮರ್ಥ್ಯ
• 1,364 ದಶಲಕ್ಷ ಲೀಟರ್ ನೀರನ್ನು ವಾರ್ಷಿಕವಾಗಿ ಉಳಿತಾಯ ಮಾಡುತ್ತದೆ.
• ಇದು ವಾರ್ಷಿಕ 6,700 ಮನೆಗಳ ನೀರಿನ ಅವಶ್ಯಕತೆಯನ್ನು ಪೂರೈಸಲು ಸಾಕಾಗಲಿದೆ.

ತೇಲುವ ಸೌರ ವಿದ್ಯುತ್ ಘಟಕಗಳು

• ಭೂಮಿ ಮೇಲಿನ ಸೌರ ವಿದ್ಯುತ್ ಯೋಜನೆಗಳಿಗೆ ಪರ್ಯಾಯವಾಗಿ ಸರೋವರ, ಜಲಾನಯನ ಪ್ರದೇಶಗಳು, ನದಿಗಳು, ಸಮುದ್ರ, ಸಾಗರ ಇತ್ಯಾದಿ ಜಲಮೂಲಗಳ ಮೇಲೆ ಫೊಟೋವೊಲ್ಟಾಯಿಕ್ ಫಲಕಗಳನ್ನು ಸ್ಥಾಪಿಸಲಾಗುತ್ತದೆ. ಇದನ್ನು ತೇಲುವ ಸೌರ ವಿದ್ಯುತ್ ಘಟಕಗಳೆನ್ನುತ್ತಾರೆ.
• ಈ ಯೋಜನೆಗೆ ಭೂಸ್ವಾಧೀನ ಮಾಡಬೇಕಾಗಿಲ್ಲ. ಗ್ರಿಡ್ ಕನೆಕ್ಟಿವಿಟಿ, ನಿಯಮ ನಿಬಂಧನೆಗಳು ಭೂಮಿ ಮೇಲಿನ ಯೋಜನೆಯಷ್ಟು ಕಠಿಣವಾಗಿಲ್ಲ. ತೇಲುವ ಸೌರ ವಿದ್ಯುತ್ ಪ್ರಾಜೆಕ್ಟ್ ಗಳು ನೀರು ಆವಿಯಾಗುವುದನ್ನು ಕಡಿಮೆ ಮಾಡುತ್ತದೆ. ಅಲ್ಲದೆ, ಅಂತರ್ ಸಂಪರ್ಕ ವೆಚ್ಚವನ್ನೂ ಇಳಿಸುತ್ತದೆ.
• ಜಲಸಂಪನ್ಮೂಲಗಳ ತಣಿಸುವ ಸ್ವಭಾವದ ಕಾರಣ ಸೌರ ಫಲಕಗಳ ವಿದ್ಯುತ್ ಉತ್ಪಾದನಾ ಕಾರ್ಯಕ್ಷಮತೆ ಶೇಕಡ 5ರಿಂದ ಶೇಕಡ 10ರಷ್ಟು ಏರಿಕೆಯಾಗುತ್ತದೆ.

ಯಾಕೆ ಈ ಹೂಡಿಕೆ?: ದೇಶದಲ್ಲಿ 2022ರ ವೇಳೆಗೆ ನವೀಕರಿಸಬಹು ದಾದ ವಿದ್ಯುತ್ ಉತ್ಪಾದನಾ ಸಾಮರ್ಥ್ಯ 175 ಎಗ ಗೆ ಏರಿಸಬೇಕೆಂಬ ಮಹತ್ವಕಾಂಕ್ಷೆಯ ಗುರಿಯನ್ನು ಕೇಂದ್ರ ಸರ್ಕಾರ ಹಾಕಿಕೊಂಡಿದೆ. ಇದರಲ್ಲಿ 100ಎಗ ಸೌರ ವಿದ್ಯುತ್ ಪಾಲು.

ಎನ್​ಟಿಪಿಸಿ ಎಂದರೆ..: ನ್ಯಾಷನಲ್ ಥರ್ಮಲ್ ಪವರ್ ಕಾರ್ಪೆರೇಶನ್ (ಎನ್​ಟಿಪಿಸಿ) 1975ರಲ್ಲಿ ಸ್ಥಾಪಿಸಲ್ಪಟ್ಟಿದೆ. ಭಾರತದ ಅತಿದೊಡ್ಡ ಇಂಧನ ಉತ್ಪಾದನಾ ಕಂಪನಿ ಇದಾಗಿದ್ದು, ನವದೆಹಲಿಯಲ್ಲಿ ಕೇಂದ್ರ ಕಚೇರಿ ಹೊಂದಿದೆ. 2010ರ ಮೇ ತಿಂಗಳಲ್ಲಿ ಇದನ್ನು ಮಹಾರತ್ನ ಕಂಪನಿ ಎಂದು ಕೇಂದ್ರ ಸರ್ಕಾರ ಮಾನ್ಯ ಮಾಡಿದೆ. ಕಾರ್ಬನ್ ಉತ್ಪಾದನೆಯನ್ನು ಶೇಕಡ 30 ಇಳಿಸಬೇಕೆಂಬ ಉದ್ದೇಶದಿಂದ ಹಸಿರು ಇಂಧನ ಉತ್ಪಾದನೆ ಯೋಜನೆಯನ್ನು, ಉಪಕ್ರಮವನ್ನು ಕಂಪನಿ ಯಶಸ್ವಿಯಾಗಿ ಅನುಷ್ಠಾನಗೊಳಿಸುತ್ತಿದೆ.