ಮುಂದೆ ಹೆಚ್ಚು ಹೆಚ್ಚು ಹಣ ಕೈಸೇರಿದಂತೆಲ್ಲ ರೋಹಿತ್ ಬಾಂದ್ರಾದಲ್ಲಿ ಹೊಸ ಮನೆಯನ್ನೂ ಖರೀದಿಸಿದರು. ಆದರೆ, ಕುಟುಂಬದ ಕೆಲಸಕಾರ್ಯಕ್ಕೆ ಬಾಂದ್ರಾ ದೂರ ಎಂಬ ಕಾರಣಕ್ಕೆ ಮನೆಯಲ್ಲಿ ಯಾರಿಗೂ ಅದು ಇಷ್ಟವಿರಲಿಲ್ಲ. ಹಾಗಾಗಿ ಅಪ್ಪ-ಅಮ್ಮ, ತಮ್ಮ ಹಳೆಯ ಒಂದು ಕೊಠಡಿ ಬಾಡಿಗೆ ಮನೆಯಲ್ಲೇ ಉಳಿದರು. ಹೊಸ ಮನೆಯಲ್ಲಿ ರೋಹಿತ್ ಒಬ್ಬರೇ ವಾಸ್ತವ್ಯ ಹೂಡಿದರು. ಅದರ ಪರಿಣಾಮವೂ ಅವರ ವೃತ್ತಿಜೀವನದ ಮೇಲಾಯಿತು. ಹೊಸ ಮನೆಯಲ್ಲಿ ಸ್ನೇಹಿತರು, ಪಾರ್ಟಿ, ಮೋಜುಮಸ್ತಿಯಲ್ಲಿ ಮೈಮರೆತ ರೋಹಿತ್ ಅಭ್ಯಾಸ ನಿರ್ಲಕ್ಷಿಸಿದರು. ಇದರ ಪರಿಣಾಮ ಆಟದ ಮೇಲಾಯಿತು. 2010ರಲ್ಲಿ ಜಿಂಬಾಬ್ವೆ ಪ್ರವಾಸದಲ್ಲಿ ಸತತ 2 ಶತಕ ಬಾರಿಸಿದ ಬಳಿಕ ಸತತ 16 ಇನಿಂಗ್ಸ್ಗಳಲ್ಲಿ ವಿಫಲರಾಗಿದ್ದರಿಂದ 2011ರ ವಿಶ್ವಕಪ್ ತಂಡದಲ್ಲಿ ಅವರಿಗೆ ಸ್ಥಾನ ಸಿಗಲಿಲ್ಲ. ರೋಹಿತ್ಗಿಂತ ತಡವಾಗಿ ಭಾರತ ತಂಡಕ್ಕೆ ಆಯ್ಕೆಯಾಗಿದ್ದ ವಿರಾಟ್ ಕೊಹ್ಲಿ ವಿಶ್ವಕಪ್ ತಂಡದಲ್ಲಿದ್ದರು. ಆದರೆ, ರೋಹಿತ್ ತಾವೇ ತಮ್ಮ ಕಾಲಮೇಲೆ ಕಲ್ಲು ಹಾಕಿಕೊಂಡಿದ್ದರು. ಈ ತಪ್ಪಿನಿಂದ ಪಾಠ ಕಲಿತ ಅವರು ನಿರಂತರ ಅಭ್ಯಾಸದ ಶಿಸ್ತು ರೂಢಿಸಿಕೊಂಡು ಹಳಿಗೆ ಮರಳಿದರು. ಅದರಲ್ಲೂ ಮುಂಬೈ ಇಂಡಿಯನ್ಸ್ ಐಪಿಎಲ್ ತಂಡದಲ್ಲಿ ಸಚಿನ್ ತೆಂಡುಲ್ಕರ್ ಮಾರ್ಗದರ್ಶನ ವರದಾನವಾಯಿತು. 2011ರ ಏಕದಿನ ವಿಶ್ವಕಪ್ನಲ್ಲಿ ಸ್ಥಾನ ವಂಚಿತರಾದ ನಿರಾಸೆಯ ಬಳಿಕ ತ್ರಿವಿಕ್ರಮನಂತೆ ಪುಟಿದೆದ್ದ ರೋಹಿತ್ ಆನಂತರ 42 ಅಂತಾರಾಷ್ಟ್ರೀಯ ಶತಕ ಬಾರಿಸಿದ್ದಾರೆ. 10 ಟೆಸ್ಟ್ ಶತಕ, 4 ಟಿ20 ಶತಕ, 28 ಏಕದಿನ ಶತಕ, 3 ಏಕದಿನ ದ್ವಿಶತಕ 2011ರ ನಿರಾಸೆ ಬಳಿಕ ಅವರ ಬ್ಯಾಟ್ನಿಂದ ಸಿಡಿದಿವೆ. 2015ರ ವಿಶ್ವಕಪ್ ಕ್ವಾರ್ಟರ್ಫೈನಲ್ನಲ್ಲಿ ಬಾಂಗ್ಲಾದೇಶದ ವಿರುದ್ಧ ಶತಕ ಬಾರಿಸಿ ಭಾರತಕ್ಕೆ ಸೆಮಿಫೈನಲ್ಗೆ ಬಡ್ತಿ ಕೊಡಿಸಿದ್ದ ರೋಹಿತ್, ಇಂಗ್ಲೆಂಡ್ನಲ್ಲಿ ನಡೆದ 2019ರ ವಿಶ್ವಕಪ್ನಲ್ಲಿ 5 ಶತಕ ಬಾರಿಸುವ
