ಮಹಿಳೆ ಸಾಮಾಜಿಕವಾಗಿ ಸಬಲೆಯಾಗಬೇಕು ಎಂಬ ಆಶಯದೊಂದಿಗೆ ಭಜನಾ ಕಮ್ಮಟದಲ್ಲೂ ಮಹಿಳಾ ಭಜಕರಿಗೆ ಪ್ರಾಧಾನ್ಯ ನೀಡಲಾಗುತ್ತದೆ. ‘ಹೆಣ್ಣೊಂದು ಕಲಿತರೆ ಶಾಲೆಯೊಂದು ತೆರೆದಂತೆ’ ಎನ್ನುವ ಉಕ್ತಿಯಂತೆ ಮಹಿಳಾ ಭಜಕರುಗಳೇ ಮಹಿಳಾ ಭಜನಾ ಮಂಡಳಿಗಳನ್ನು ಮುನ್ನಡೆಸುವ ನಿಟ್ಟಿನಲ್ಲಿ ತರಬೇತಿಯನ್ನೂ ಒದಗಿಸಲಾಗುತ್ತಿದೆ. ಕಮ್ಮಟದಲ್ಲಿ ಉಚಿತ ಊಟ-ವಸತಿಯೊಂದಿಗೆ ಪ್ರತಿದಿನ ಬೆಳಗ್ಗೆ ಒಂದು ಗಂಟೆ ಯೋಗ, ಪ್ರಾಣಾಯಾಮ ಹೇಳಿಕೊಡಲಾಗುತ್ತದೆ. ನಿತ್ಯಕರ್ಮ ಮತ್ತು ಉಪಾಹಾರದ ನಂತರ ಭಜನಾ ತರಬೇತಿಯ ವೇಳಾಪಟ್ಟಿಯಂತೆ ಭಜನೆ ಹಾಡುವ ಅಭ್ಯಾಸ ಪ್ರಾರಂಭ ಮಾಡಲಾಗುತ್ತದೆ. ಧಾರ್ವಿುಕ ಉಪನ್ಯಾಸ, ಪ್ರತಿದಿನ ಸಂಜೆ 5-30ರಿಂದ ನಗರ ಸಂಕೀರ್ತನೆ ಕಾರ್ಯಕ್ರಮ, ಕುಣಿತ ಭಜನಾ ತರಬೇತಿ ಮತ್ತು ಸಂಜೆ 7-30ರಿಂದ ಸಾಂಸ್ಕೃತಿಕ ಕಾರ್ಯಕ್ರಮಗಳು ಇರುತ್ತವೆ. ಕಮ್ಮಟದಲ್ಲಿ ದಾಸಸಾಹಿತ್ಯ, ಹಳೆಯ ಭಜನೆ ಹಾಡುಗಳು, ಶ್ಲೋಕ, ವಚನ ಸಾಹಿತ್ಯಗಳ ಅಭ್ಯಾಸ ಕ್ರಮಗಳನ್ನು ನಡೆಸಲಾಗುತ್ತದೆ. ಶಿಬಿರಾರ್ಥಿಗಳಿಗೆ ಶೋಭಾನೆ, ಜೋಗುಳ ಹಾಡುಗಳನ್ನೂ ಕಲಿಸಲಾಗುತ್ತದೆ. ನೃತ್ಯ ಭಜನೆ ತರಬೇತಿ, ನಗರ ಸಂಕೀರ್ತನೆ, ಸಾಂಸ್ಕೃತಿಕ ಕಾರ್ಯಕ್ರಮ, ಉಪನ್ಯಾಸ ಕಾರ್ಯಕ್ರಮಗಳು ಭಜನಾ ಕಮ್ಮಟದ ವಿಶೇಷತೆಗಳಾಗಿವೆ. ಇವುಗಳ ಜೊತೆಗೆ ಭಜನಾ ಮಂಡಳಿಗಳ ಕಾರ್ಯವೈಖರಿಯ ಬಗ್ಗೆ, ಸಂಘಟನೆಯ ಬಗ್ಗೆಯೂ ತರಬೇತಿಯನ್ನು ನೀಡಲಾಗುತ್ತದೆ. ಇಲ್ಲಿ ತರಬೇತಿ ಪಡೆದ ಶಿಬಿರಾರ್ಥಿಗಳು ತಮ್ಮ ತಮ್ಮ ಊರುಗಳಲ್ಲಿ ಭಜನಾ ಮಂಡಳಿಗಳ ಮೂಲಕ ಇತರರಿಗೂ ತರಬೇತಿ ನೀಡಿ ಭಜನಾ ಸಂಸ್ಕೃತಿಯ ಕುರಿತು ಜಾಗೃತಿ ಮೂಡಿಸುತ್ತಾರೆ. ಮನೆ-ಮನೆಯಲ್ಲೂ ಭಜನೆ ಸಂಸ್ಕೃತಿಯನ್ನು ಸಾರುವ ಕಾರ್ಯವನ್ನು ಮಾಡುತ್ತ ಬಂದಿದ್ದಾರೆ. ಪರಿಣಾಮವಾಗಿ ಇತ್ತೀಚಿನ ವರ್ಷಗಳಲ್ಲಿ ಹೆಚ್ಚಿನ ಎಲ್ಲ ಕಾರ್ಯಕ್ರಮಗಳಲ್ಲಿ ಭಜನೆಗೆ ಅವಕಾಶ ಕಲ್ಪಿಸಿರುವುದು ಶ್ಲಾಘನೀಯ.
