ಬಾಲಕನ ಖಿನ್ನತೆಯ ಹಿಂದೆ...; ಆ ಕ್ಷಣ...

ಏತನ್ಮಧ್ಯೆ ಹಿರಿಯ ಮಗ ಸಂತೋಷ್ ಖಿನ್ನನಾಗಿ ಇರುತ್ತಿದ್ದುದನ್ನು ರಾಜು ಮತ್ತು ಲಕ್ಷಿ ್ಮ ಗಮನಿಸಿದರು. ಏಕೆ ಮಂಕಾಗಿರುವೆಯೆಂದು ಲಕ್ಷಿ ್ಮ ವಿಚಾರಿಸಿದಾಗ ಆತ ತನಗೇನೂ ಆಗಿಲ್ಲ, ಸರಿಯಾಗಿಯೇ ಇದ್ದೇನೆ ಎಂದ. ಶಾಲೆಯ ಪಾಠ ಅವನ ತಲೆಗೆ ಹತ್ತುತ್ತಿಲ್ಲವೇನೋ ಎಂದು ರ್ತಸಿದ ಲಕ್ಷ್ಮಿ ಶಾಲೆಗೆ ಹೋಗಿ ವಿಚಾರಿಸಲು ಗಂಡನಿಗೆ ಹೇಳಿದಳು. ‘ಕಳೆದ ಎರಡು-ಮೂರು ವಾರಗಳಿಂದ ಅಣ್ಣ ಸದಾಕಾಲ ಚಿಂತೆಯಿಂದಿರುತ್ತಾನೆ, ರಾತ್ರಿ ಮಲಗಿರುವಾಗ ಏನೇನೋ ಕನವರಿಸುತ್ತಿರುತ್ತಾನೆ’ ಎಂದು ಸುಹಾಸ್ ಹೇಳಿದಾಗ ಮತ್ತೊಮ್ಮೆ ಪತಿ-ಪತ್ನಿಯರಿಬ್ಬರೂ ಸಂತೋಷ್​ನ ಜೊತೆ ಸಮಾಲೋಚಿಸಿದರು.

ತಾನು ಸರಿಯಾಗಿಯೇ ಇದ್ದೇನೆ, ಏನೂ ಆಗಿಲ್ಲವೆಂದು ಸಂತೋಷ್ ಹೇಳಿದ. ಹದಿಹರೆಯದ ವಯಸ್ಸಿನಲ್ಲಿ ಯುವಕ-ಯುವತಿಯರ ಮೂಡ್​ಗಳು ಬದಲಾಗುತ್ ಇರುತ್ತವೆ, ಕ್ರಮೇಣ ಸಂತೋಷ್ ಸಾಮಾನ್ಯ ಸ್ಥಿತಿಗೆ ಮರಳಬಹುದೆಂದು ಊಹಿಸಿ ಸುಮ್ಮನಾದರು. ಇದಾದ ಕೆಲದಿನಗಳ ನಂತರ ರಾಜು ತನಗೆ ಬೇಕಾದ ವಸ್ತುವೊಂದನ್ನು ಹುಡುಕುತ್ತಿದ್ದಾಗ ಸಂತೋಷ್​ನ ಚೀಲದಿಂದ ಮೊಬೈಲ್ ಫೋನ್ ರಿಂಗಾಯಿತು. ಮನೆಯಲ್ಲಿ ತನ್ನ ಹೊರತಾಗಿ ಯಾರ ಹತ್ತಿರವೂ ಮೊಬೈಲ್ ಇಲ್ಲದಿರುವಾಗ ಸಂತೋಷ್​ನ ಶಾಲೆಯ ಚೀಲದಿಂದ ಮೊಬೈಲ್ ಹೇಗೆ ರಿಂಗಣಿಸುತ್ತಿದೆ ಎಂಬ ಕುತೂಹಲದಿಂದ ರಾಜು ಮಗನ ಬ್ಯಾಗ್ ತೆರೆದಾಗ ಅದರಲ್ಲೊಂದು ಅತಿ ಸಾಧಾರಣ ಮೊಬೈಲ್ ಫೋನ್ ಇತ್ತು.

‘ನಿನ್ನ ಕೈಗೆ ಮೊಬೈಲ್ ಹೇಗೆ ಬಂದಿತು? ನಾನಿಟ್ಟಿದ್ದ ಹಣವನ್ನು ಕದ್ದು ಈ ಫೋನ್ ಖರೀದಿಸಿದೆಯಾ?’ ಎಂದು ರಾಜು ಪ್ರಶ್ನಿಸಿದಾಗ, ಸಂತೋಷ್ ತಂದೆಯ ಎರಡೂ ಕಾಲುಗಳನ್ನು ಹಿಡಿದುಕೊಂಡು ಬಿಕ್ಕಿ ಬಿಕ್ಕಿ ಅಳತೊಡಗಿದ. ಲಕ್ಷಿ ್ಮ ಸಮಾಧಾನಮಾಡಿ ಫೋನ್ ಹೇಗೆ ಬಂತೆಂದು ಪ್ರಶ್ನಿಸಿದಾಗ, ಅಳುತ್ತಲೇ ಸಂತೋಷ್ ಹೀಗೆಂದ: ‘ಎರಡು ತಿಂಗಳ ಹಿಂದೆ ಎಂದಿನಂತೆ ಶಾಲೆಗೆ ನಡೆದುಕೊಂಡು ಹೋಗುವಾಗ ದಾರಿಯಲ್ಲಿ ಚಹಾ ಅಂಗಡಿಯ ಮುಂದೆ ನಾಲ್ಕೆ ೖದು ಜನ ದಾಂಡಿಗರು ನಿಂತಿದ್ದರು. ನನ್ನನ್ನು ಕರೆದು ನೀನು ಯಾರು? ಏನು ಮಾಡುತ್ತಿರುವೆ? ಎಂದು ವಿಚಾರಿಸಿದರು. ನಾನು ಗುತ್ತಿಗೆದಾರ ರಾಜು ಅವರ ಮಗ ಎಂದ ಕೂಡಲೇ ಕುಳಿತಿದ್ದ ರೌಡಿಗಳಲ್ಲೊಬ್ಬ ಇವನು ಸ್ಥಿತಿವಂತರ ಮನೆಯವನು. ಇವನನ್ನು ಕಿಡ್ನಾಪ್ ಮಾಡಿದರೆ ನಮಗೆ ಲಕ್ಷ ಲಕ್ಷ ರೂ.ಗಳು ಸಿಗುತ್ತವೆ ಎಂದ. ಎಲ್ಲರೂ ಹೂಗುಟ್ಟಿದರು. ನಂತರ ಅವರು ನನ್ನನ್ನು ಬೈಕಿನಲ್ಲಿ ಕೂರಿಸಿಕೊಂಡು ಪಕ್ಕದ ಬಡಾವಣೆಯಲ್ಲಿದ್ದ ಒಂದು ಮನೆಗೆ ಕರೆದೊಯ್ದರು. ಅಲ್ಲಿ ನನ್ನ ಜೇಬು ತಪಾಸಣೆ ಮಾಡಿದರು, ಹತ್ತು ರೂಪಾಯಿಯ ನೋಟೊಂದರ ಹೊರತಾಗಿ ಬೇರೇನೂ ಸಿಗಲಿಲ್ಲ. ನಂತರ ಅವರು ನನ್ನನ್ನು ಸಂಪೂರ್ಣವಾಗಿ ವಿವಸ್ತ್ರ ಮಾಡಿ ಫೋಟೋಗಳನ್ನು ತೆಗೆದರು. ತಂದೆ-ತಾಯಿಯರ ಮೊಬೈಲ್ ನಂಬರ್​ಗಳನ್ನು ಕೊಡೆಂದರು. ತಾಯಿಯ ಬಳಿ ಫೋನಿಲ್ಲ ಎಂದು ಉತ್ತರಿಸಿ ಅಪ್ಪನ ಮೊಬೈಲ್ ನಂಬರ್ ಕೊಟ್ಟೆ. ಅವರು ಕಾಲ್ ಮಾಡಿದರು. ಆದರೆ ಅಪ್ಪ ಉತ್ತರಿಸಲಿಲ್ಲ. ಅಷ್ಟರಲ್ಲಿ ಅವರಲ್ಲೊಬ್ಬ ತನ್ನ ತಂದೆ ಇನ್ನರ್ಧ ಗಂಟೆಯಲ್ಲಿ ಮನೆಗೆ ವಾಪಸಾಗುತ್ತಿದ್ದಾರೆ ಎಂದು ಹೇಳಿ ನನ್ನನ್ನು ಬಿಟ್ಟುಬಿಡಲು ಸೂಚಿಸಿದ. ಆಗ ಅವರ ನಾಯಕ ಇತರರೊಡನೆ ಸೇರಿ ನನ್ನನ್ನು ಹಿಗ್ಗಾಮುಗ್ಗಾ ಥಳಿಸಿ ನಾಳೆ ಬೆಳಗ್ಗೆ ಮನೆಯಿಂದ ಒಂದು ಲಕ್ಷ ರೂ. ತಂದುಕೊಟ್ಟರೆ ಸರಿ, ಇಲ್ಲವಾದರೆ ನಿನ್ನನ್ನು ಬೇರೊಂದು ಜಾಗದಲ್ಲಿ ಬಂಧಿಸಿಟ್ಟು ಕೊಲೆ ಮಾಡುತ್ತೇವೆ ಎಂದು ಬೆದರಿಸಿ ನನ್ನನ್ನು ಬಿಟ್ಟ. ನಾನು ತೀವ್ರ ಆಘಾತಕ್ಕೆ ಒಳಗಾಗಿ ಆ ದಿನ ಶಾಲೆಗೆ ಹೋಗಲಿಲ್ಲ. ಮನೆಗೆ ಬಂದ ನಂತರ ನಡೆದ ವಿಷಯವನ್ನು ನಿಮಗೆ ಹೇಳಲು ಧೈರ್ಯವಾಗಲಿಲ್ಲ. ಮುಂದೆ ಏನು ಮಾಡುವುದೆಂದು ಯೋಚಿಸತೊಡಗಿದೆ. ಆ ಸಂಜೆ ಅಪ್ಪ ಮನೆಗೆ ಬಂದು ನಾಳಿನ ಬಟವಾಡೆಗಾಗಿ ಹಣ ತಂದ ಬಗ್ಗೆ ಅಮ್ಮನಿಗೆ ಹೇಳುತ್ತಿದ್ದುದನ್ನು ಕೇಳಿಸಿಕೊಂಡೆ. ಅಪ್ಪ ರಾತ್ರಿಯ ಊಟಕ್ಕೆ ಕುಳಿತಾಗ ಅವರ ಕೋಣೆಗೆ ಹೋಗಿ 10 ಸಾವಿರ ರೂಗಳನ್ನು ಎಗರಿಸಿದೆ. ಮಾರನೆಯ ದಿನ ಶಾಲೆಗೆ ಹೋಗುವಾಗ ಆ ರೌಡಿಗಳು ಮತ್ತೆ ನನ್ನನ್ನು ಅಡ್ಡಹಾಕಿ ಹಣ ತಂದೆಯಾ ಎಂದು ಕೇಳಿದರು. ನೀವು ಕೇಳಿದಷ್ಟು ಹಣ ಸಿಗಲಿಲ್ಲ ಎಂದು ಹೇಳಿ ಅವರಿಗೆ 10 ಸಾವಿರ ರೂ. ಕೊಟ್ಟೆ. ಅವರೆಲ್ಲ ಸಂತಸಗೊಂಡು ಹೋಟೆಲ್ಲಿಗೆ ಕರೆದೊಯ್ದು ಚಹಾ ಕುಡಿಸಿದರು. ಒಂದು ವಾರದ ನಂತರ ಆ ಪುಂಡರು ಮತ್ತೊಮ್ಮೆ ಅಡ್ಡಗಟ್ಟಿ ತಮ್ಮ ಮೊಬೈಲ್ ಫೋನಿನಲ್ಲಿದ್ದ ನನ್ನ ನಗ್ನ ಫೋಟೋಗಳನ್ನು ತೋರಿಸಿ ಮಾರನೆಯ ದಿನ ಹಣ ತಂದುಕೊಡದೇ ಹೋದರೆ ಆ ಫೋಟೋಗಳನ್ನು ಸಾಮಾಜಿಕ ಜಾಲತಾಣಗಳಲ್ಲಿ ಹಾಕುವುದಾಗಿ ಬೆದರಿಸಿದರು. ಆ ಬಾರಿ ನಾನು ಅಮ್ಮ ಅಡುಗೆಮನೆಯಲ್ಲಿಟ್ಟಿದ್ದ ಡಬ್ಬಿಯಿಂದ ಹಣ ಕದ್ದು ಅವರಿಗೆ ಕೊಟ್ಟೆ. ಆನಂತರ ಅವರಿಂದ ತಲೆಮರೆಸಿಕೊಂಡು ಬೇರೆ ಹಾದಿಯಲ್ಲಿ ಶಾಲೆಗೆ ಹೋಗಿಬರತೊಡಗಿದೆ. ಆದರೆ ಕೆಲ ದಿನಗಳ ನಂತರ ಅವರು ನಮ್ಮ ಮನೆಯ ಎದುರಿಗೇ ಬಂದಾಗ ತುಂಬ ಹೆದರಿಕೆಯಾಯಿತು. ‘ನೀನು ನಮ್ಮಿಂದ ತಪ್ಪಿಸಿಕೊಂಡು ಹೋಗದಂತೆ ವ್ಯವಸ್ಥೆ ಮಾಡಿದ್ದೇವೆ’ ಎಂದು ಹೇಳಿದ ಅವರ ನಾಯಕ ನನಗೆ ಒಂದು ಮೊಬೈಲ್ ಕೊಟ್ಟು ‘ನಮಗೆ ಹಣ ಬೇಕಾದಾಗ ಈ ಮೊಬೈಲ್​ನಲ್ಲಿ ಮಿಸ್ಡ್ ಕಾಲ್ ಕೊಡುತ್ತೇವೆ, ನೀನು ಚಹಾ ಅಂಗಡಿ ಬಳಿಗೆ ಬಂದು ನಮಗೆ ಹಣ ತಂದುಕೊಡಬೇಕು’ ಎಂದ. ಅವರ ಕಾಲ್ ಬಂದಾಗ ಎರಡನೆಯ ಬಾರಿಯೂ ಅಪ್ಪನ ಹಣ ಕದ್ದು ಅವರಿಗೆ ನೀಡಿದೆ. ಅವರು ಕಾಲ್ ಮಾಡಿದಾಗ ಉತ್ತರಿಸದಿದ್ದರೆ ನನಗೆ ಹೊಡೆಯುತ್ತಾರೆ. ಹೀಗಾಗಿ ನನಗೆ ವಿದ್ಯಾಭ್ಯಾಸದಲ್ಲಿ ಆಸಕ್ತಿ ಕಡಿಮೆಯಾಗಿ ಜೀವನದಲ್ಲಿ ಜಿಗುಪ್ಸೆಯಾಗಿದೆ’.

ಕೂಡಲೇ ರಾಜು ಸಂತೋಷ್​ನನ್ನು ಪೊಲೀಸ್ ಠಾಣೆಗೆ ಕರೆದೊಯ್ದು ಅವನಿಂದ ದೂರು ಕೊಡಿಸಿದ. ಸಂತೋಷ್​ನಿಗೆ ಕೊಟ್ಟಿದ್ದ ಮೊಬೈಲ್ ಫೋನ್ ಮೂಲಕ ಎಲ್ಲ ಐದು ರೌಡಿಗಳೂ ಪತ್ತೆಯಾದರು. ಅವರೆಲ್ಲ ವಿದ್ಯಾಭ್ಯಾಸವನ್ನು ತೊರೆದು ಗೂಂಡಾತನ ಮಾಡುವುದರಲ್ಲೇ ನಿರತರಾಗಿದ್ದರು. ಅವರನ್ನು ಬಂಧಿಸಿ ಪೋಕ್ಸೋ, ಐಪಿಸಿ, ಐ.ಟಿ. ಆಕ್ಟ್ ಮತ್ತಿತರ ಕಾಯಿದೆಗಳ ಮೇರೆಗೆ ಪ್ರಕರಣಗಳನ್ನು ದಾಖಲಿಸಿ ನ್ಯಾಯಾಲಯದಲ್ಲಿ ಒಂದು ತಿಂಗಳೊಳಗೇ ಆರೋಪಪಟ್ಟಿಯನ್ನು ಸಲ್ಲಿಸಲಾಯಿತು. ಎಲ್ಲರಿಗೂ ಮೂರು ವರ್ಷಗಳ ಜೈಲುವಾಸವಾಯಿತು. ತಮ್ಮ ಮಕ್ಕಳು ಶಾಲೆಯಲ್ಲಿ ಹೇಗೆ ಕಲಿಯುತ್ತಿದ್ದಾರೆ ಎನ್ನುವುದನ್ನಷ್ಟೇ ಅಲ್ಲದೆ ಅವರು ಯಾರಿಂದಲೂ ಶೋಷಿತರಾಗುತ್ತಿಲ್ಲ, ಕೆಟ್ಟ ಸಹವಾಸಕ್ಕೆ ಬಿದ್ದಿಲ್ಲ, ಎನ್ನುವುದನ್ನು ಮಾತಾಪಿತರು ಖಾತ್ರಿ ಮಾಡಿಕೊಳ್ಳಬೇಕು. ಅವರು ಮನೆಯಿಂದ ಹೊರಗೆ ಹೋದಾಗ ಎಂತಹುದೇ ಪ್ರಮುಖ ಘಟನೆ ನಡೆದರೂ ತಮಗೆ ತಿಳಿಸುವಂತೆ ಹೇಳಬೇಕು. ಯಾರದೇ ದೌರ್ಜನ್ಯ, ಬಲವಂತ ಇತ್ಯಾದಿಗಳಿಗೆ ಬಲಿಯಾಗದಂತೆ ಮಕ್ಕಳಿಗೆ ಕಲಿಸಬೇಕು. ಏಕೆಂದರೆ ಒಮ್ಮೆ ಪೀಡನೆಗೆ ಈಡಾದವರೇ ಪದೇಪದೆ ಪೀಡೆಗೊಳಗಾಗುತ್ತಾರೆ. ಅಮೆರಿಕದ ಲೇಖಕ ಹಾಗೂ ಮಕ್ಕಳ ಹಕ್ಕುಗಳ ವಕೀಲ ಆಂಡ್ರೂ ವಾಕ್ಸ್ ಹೇಳುವಂತೆ, ‘ಜೀವನವೇ ಒಂದು ಹೋರಾಟ. ಆದರೆ ಪ್ರತಿಯೊಬ್ಬರೂ ಹೋರಾಟಗಾರರಲ್ಲ. ಎಲ್ಲರೂ ಹೋರಾಟಗಾರರಾಗಿದ್ದರೆ ಪೀಡಕರೇ ಇರುತ್ತಿರಲಿಲ್ಲ.’

(ಲೇಖಕರು ನಿವೃತ್ತ ಪೊಲೀಸ್ ಅಧಿಕಾರಿ)