ನೆನಪಿರಲಿ ಇದೆಲ್ಲ ನಾವೇ ಮಾಡಿಕೊಂಡು ದಾರಿ ಮೂಲಕ ಸಂದರ್ಶಿಸಿ ಬಂದದ್ದಕ್ಕೆ ಬಸ್, ರೈಲುಗಳ ಎಲ್ಲ ವೆಚ್ಚ ಸರಿಯಾಗಿ ಎಣಿಸಿದರೆ ಒಂದೆರಡು ಸಾವಿರವೂ ದಾಟಿರಲಿಲ್ಲ. ಹೀಗೆ ನಿಖರ ಖರ್ಚು, ವೆಚ್ಚಗಳ ಲೆಕ್ಕಾಚಾರ ಇದ್ದಿದ್ದರಿಂದ ತುಂಬ ಕಡಿಮೆ ವೆಚ್ಚದಲ್ಲಿ ಇಂಥ ಸಂದರ್ಶಿಸಲೇಬೇಕಾದ ಒಳನಾಡ ಪ್ರವಾಸ ಸಾಧ್ಯವಾಗುತ್ತದೆ. ಇಲ್ಲವಾದರೆ ವಿದೇಶಿ ಪಯಣ ದುಬಾರಿ ಎನ್ನುವ, ಅದರಲ್ಲೂ ತುಂಬ ದುಬಾರಿ ಪ್ರವಾಸಿ ದೇಶವೆಂದೇ ಹೆಸರಾದ ಬ್ರಿಟನ್ ಕೈಗೆಟುಕುವುದೇ ಇಲ್ಲ. ಈ ವಿವರ ಓದುವಾಗ ಇಷ್ಟೆಲ್ಲ ರೈಲು ಬದಲಾವಣೆ ಬಸ್ ಇತ್ಯಾದಿ ಕಷ್ಟ ಎನ್ನಿಸುತ್ತದೇಯೇ? ಎಂಬ ಪ್ರಶ್ನೆ ಕಾಡಬಹುದು. ಆದರೆ ಅಲ್ಲಿನ ಅಚ್ಚುಕಟ್ಟು ಮತ್ತು ನಿಖರ ಸಮಯದ ವ್ಯವಸ್ಥೆಯಲ್ಲಿ ತುಂಬ ಸಲೀಸು. ಇದಾಗುವುದಿಲ್ಲ ಎಂದು ಬಾಡಿಗೆ ಕಾರು ತೆಗೆದುಕೊಂಡರೆ ಒಂದು ಸಾವಿರದ ಪಯಣಕ್ಕೆ ಹತ್ತಾರು ಸಾವಿರ ಕೈಬಿಡುತ್ತದೆ. ಇದೇ ನನ್ನ ಹೆಚ್ಚು ವೆಚ್ಚವಿಲ್ಲದ ವಿದೇಶಿ ಪ್ರವಾಸದ ಮೂಲ ರಹಸ್ಯವೂ ಹೌದು. ಆದರೆ ನೆಟ್ನಲ್ಲಿ ನೋಡಿಕೊಂಡು, ಸ್ಥಳೀಯ ಸ್ನೇಹಿತರ ಮೂಲಕ ಎಲ್ಲ ಮಾಹಿತಿ ಮೊದಲೇ ನಿಗದಿಪಡಿಸಿಕೊಂಡಿದ್ದರೆ ಅರ್ಧ ಸುಲಭ. ಇನ್ನರ್ಧ ಅಲ್ಲಲ್ಲೇ ನಿರ್ಧಾರ. ಎಲ್ಲವೂ ನಿಖರ ಎಂದು ಏನೂ ಇರುವುದಿಲ್ಲ. ಆಯಾ ಸಂದರ್ಭಕ್ಕೆ ತಕ್ಕಂತೆ ಬದಲಾವಣೆ ಮತ್ತು ಚಲನೆ ಇರಬೇಕಷ್ಟೆ. ಎಲ್ಲಕ್ಕಿಂತಲೂ ಮುಖ್ಯ ನಮ್ಮ ಸಮಯ ಮಿತಿ ಮತ್ತು ಅದಕ್ಕೆ ತಕ್ಕ ವೇಗ ಅನಿವಾರ್ಯ ಇಲ್ಲಿ. ವಾರ್ಷಿಕ ಆರೇಳು ಲಕ್ಷ ಪ್ರವಾಸಿಗರನ್ನು ಆಕರ್ಷಿಸುವ ಈ ನಗರಿಯಲ್ಲಿ ಸ್ನಾನಗೃಹ ಮಾತ್ರವಲ್ಲ, ದೋಣಿವಿಹಾರಕ್ಕಾಗಿ ಕಾಲುವೆಗಳು, ರಾಯಲ್ ಕ್ರೆಸೆಂಟ್, ಪರೇಡ್ ಉದ್ಯಾನ, ರಾಯಲ್ ವಿಕ್ಟೋರಿಯಾ ಉದ್ಯಾನ ಜೊತೆ ಸಾಮರ್ಸೆಟ್ ಶಾಪಿಂಗ್ ಕಾಂಪ್ಲೆಕ್ಸ್ ಅತಿ ದೊಡ್ಡ ಕೇಂದ್ರ. ಇದಾಗಿಯೂ ವಾಲ್ಕಾಟ್ ಮತ್ತು ಆರ್ಕಿಡ್ ಕಾರಿಡಾರ್, ವಿಲ್ಸೇಮ್ ಸ್ಟಾಲ್ ಹಾಗೂ ಯಾರ್ಕ್ ಸ್ಟ್ರೀಟ್ ಜೊತೆಗೆ ರಾಯಲ್ ಥಿಯೇಟರ್ ಕೂಡ ಬಕೇಟ್ ಲಿಸ್ಟ್ ಎನ್ನುವಷ್ಟರಲ್ಲಿ, ಅರ್ಟ್ ಮ್ಯೂಸಿಯಂ, ಏಷ್ಯನ್ ಆರ್ಟ್ ಸೆಂಟರ್, ಹ್ಯಾರ್ಷಲ್ ಮ್ಯೂಸಿಯಂ ಆಫ್ ಅಸ್ಟ್ರಾನಮಿ ಹಾಗೂ ಹಾಲ್ಬನ್ ಮ್ಯೂಸಿಯಂ ನಾವೂ ಇದ್ದೇವೆ ಎಂದು ಯಾದಿಗೆ ಸೇರ್ಪಡೆಯಾಗುತ್ತವೆ. ಹಾಗಾಗಿ ಬಾತ್ ಕೇವಲ ಒಂದು ದಿನದ ಮೋಜಿನ ಸ್ನಾನದ ಮನೆಯಾಗುವ ಮೊದಲು ಇವೂ ಸೇರಿದರೆ ನೆನಪಿಸಿಕೊಳ್ಳಬಹುದಾದ ಪ್ರವಾಸ ಮಾಡಿದಂತಾಗುತ್ತದೆ. ಬ್ರಿಟನ್ ಎಂದೊಡನೆ ಈ ಪನ್ನೀರ ಬಿಸಿನೀರ ಬುಗ್ಗೆಗಳ ಮಳೆಯಲ್ಲಿ ನೆನೆಯುವ ಅವಕಾಶ ಬಿಡದಿರಿ. ಆ ಬಿಸಿನೀರ ಬುಗ್ಗೆಗೆ ಬಿದ್ದವನಿಗೇ ಗೊತ್ತು ಅದರ ತುಂತುರು.
