ಸಮಾವೇಶ ಆಯೋಜಿಸಿದ ಬಗೆ, ಅದಕ್ಕಾಗಿ ಮಾಡಿದ ವ್ಯಾಪಕ ತಯಾರಿ, ತೊಡಕುಗಳನ್ನು ನಿವಾರಿಸಿಕೊಂಡು ಎಲ್ಲ ಭಾಗಿದಾರ ದೇಶಗಳ ಸಹಮತದೊಂದಿಗೆ 115 ವಿಷಯಗಳನ್ನೊಳಗೊಂಡ, 83 ಪ್ಯಾರಾಗ್ರಾಪ್ಗಳ, 37 ಪುಟಗಳ ಇದುವರೆಗಿನ ಅತ್ಯಂತ ವಿಸõತ ನವದೆಹಲಿ ಜಿ20 ನಾಯಕರ ಘೊಷಣೆಯನ್ನು ಸಿದ್ಧಪಡಿಸಿ ಅದು ಸರ್ವಸಮ್ಮತಿಯಿಂದ ಅಂಗೀಕೃತಗೊಳಿಸಿದ ರಾಜತಾಂತ್ರಿಕ ಚಾಕಚಕ್ಯತೆ.. ಎಲ್ಲವೂ ಜಿ20 ನಾಯಕರ ಶ್ಲಾಘನೆಗೆ ಪಾತ್ರವಾಗಿವೆ. ಜಾಗತಿಕ ಸಮಾವೇಶ ಆಯೋಜಿಸುವ, ಅದನ್ನು ಯಶಸ್ವಿಯಾಗಿ ನಡೆಸುವ ಹೊಸ ಉನ್ನತ ಮಟ್ಟವೊಂದರ ಪರಿಚಯವನ್ನು ಭಾರತ ಮಾಡಿಕೊಟ್ಟಿದೆ ಎನ್ನುವುದು ಹಲವು ಗಣ್ಯರ ಅಭಿಪ್ರಾಯವಾಗಿದೆ. ಹಾಗೆ ನೋಡಿದರೆ ಕಳೆದ ಡಿಸೆಂಬರ್ನಲ್ಲಿ ಜಿ20 ಅಧ್ಯಕ್ಷ ಸ್ಥಾನ ದೊರೆತಂದಿನಿಂದ ಅಂತಿಮ ಶಿಖರ ಸಮಾವೇಶದವರೆಗೆ ಭಾರತ ಈ ಸಂಘಟನೆಗೆ ಸಂಬಂಧಿಸಿದಂತೆ ತನ್ನ 60 ನಗರಗಳಲ್ಲಿ 220 ಕಾರ್ಯಕ್ರಮಗಳು ಹಾಗೂ ಚರ್ಚಾಕೂಟಗಳನ್ನು ಏರ್ಪಡಿಸಿದೆ. ಇವುಗಳಲ್ಲಿ ಭಾಗಿಯಾದ ರಾಜಕೀಯ, ರಾಜತಾಂತ್ರಿಕ, ಆರ್ಥಿಕ, ವೈಜ್ಞಾನಿಕ, ಕಾರ್ವಿುಕ, ಮಹಿಳಾ, ಯುವಜನ ನಾಯಕರು ಮತ್ತವರ ಪ್ರತಿನಿಧಿಗಳನ್ನು ಹೊರತುಪಡಿಸಿ ಸಹಾಯಕ ವರ್ಗ, ಸಾರಿಗೆ ಸಿಬ್ಬಂದಿ, ಊಟೋಪಚಾರ ಸಿಬ್ಬಂದಿ, ಸಾಂಸ್ಕೃತಿಕ ತಂಡಗಳು, ಮಾಧ್ಯಮ ಪ್ರತಿನಿಧಿಗಳು, ಚರ್ಚಾಕೂಟಗಳಲ್ಲಿ ಭಾಗಿಯಾದ ಜನಪ್ರತಿನಿಧಿಗಳು ಮತ್ತಿತರರು ಸೇರಿದಂತೆ ಸುಮಾರು ಒಂದೂವರೆ ಕೋಟಿ ಭಾರತೀಯರು ಭಾಗವಹಿಸಿದ್ದಾರಂತೆ! ಹೀಗಾಗಿಯೇ, ನವದೆಹಲಿ ಸಮಾವೇಶ ಜನತೆಯನ್ನು ಒಳಗೊಂಡ ರಾಜತಂತ್ರಕ್ಕೊಂದು ಉತ್ತಮ ಉದಾಹರಣೆಯಾಗಿದೆ ಮತ್ತು ಈ ಮೂಲಕ ಭಾರತ ಮೇಲ್ಪಂಕ್ತಿ ಹಾಕಿದೆ. ಎಂದು ಜಿ20 ಕೂಟದ ಹೊಸ ಅಧ್ಯಕ್ಷರಾದ ಬ್ರೆಝಿಲ್ನ ಅಧ್ಯಕ್ಷ ಲೂಲಾ ಡ ಸಿಲ್ವಾ ವರ್ಣಿಸಿದ್ದು ಅನ್ವರ್ಥವಾಗಿಯೇ ಇದೆ. ಇಷ್ಟೆಲ್ಲಾ ಶುಭಾಶಯಗಳು, ನಗೆಗಳು, ಹಸ್ತಲಾಘವ-ನಮಸ್ತೆ-ಆಲಿಂಗನಗಳು, ಮಾತುಗಳು, ಚರ್ಚೆಗಳು, ನಿರ್ಣಯಗಳು ಹಾಗೂ ಸ್ನೇಹಯುತ ವಿದಾಯಗಳೊಂದಿಗೆ ಭಾರತ ತನಗಾಗಿ, ತನ್ನ ಹಿತಾಸಕ್ತಿಗಳಿಗಾಗಿ ಸಾಧಿಸಿಕೊಂಡದ್ದೇನು? ಎನ್ನುವುದನ್ನಿಲ್ಲಿ ಅವಲೋಕಿಸೋಣ. ಇದನ್ನು ಭಾರತ ಶ್ರಮವಹಿಸಿ ಆಫ್ರಿಕನ್ ಯೂನಿಯನ್ ಅನ್ನು ಜಿ20 ಕೂಟದ ಅಧಿಕೃತ ಸದಸ್ಯನನ್ನಾಗಿಸಿದ ಬಗೆಯಿಂದಲೇ ಆರಂಭಿಸೋಣ.
