ಸಂಗ್ರಹ ಕಾಲಕ್ಕೆ ಸಂಬಂಧಿಸಿದಂತೆ ಬೇರುಗಳನ್ನು ಗ್ರೀಷ್ಮ, ಶಿಶಿರ ಋತುಗಳಲ್ಲಿ, ಎಲೆಗಳನ್ನು ವರ್ಷಾ, ವಸಂತ, ಶಿಶಿರಗಳಲ್ಲಿ, ಕೊಂಬೆಗಳನ್ನು ವರ್ಷಾ, ವಸಂತಗಳಲ್ಲಿ, ಹೂವುಗಳನ್ನು ವರ್ಷಾ, ವಸಂತಗಳಲ್ಲಿ, ಫಲವನ್ನು ಆಯಾ ಮರಗಿಡಗಳು ಹಣ್ಣು ಬಿಡುವ ಕಾಲದಲ್ಲಿ, ಅದರಲ್ಲೂ ಗ್ರೀಷ್ಮ ಹಾಗೂ ವಸಂತಗಳು ಹೆಚ್ಚು ಪ್ರಶಸ್ತ, ಸಾರವನ್ನು ಹೇಮಂತ, ವಸಂತ ಋತುಗಳಲಿ, ಗಡ್ಡೆ ಹಾಗೂ ಸಸ್ಯದ ಹಾಲನ್ನು ಶರತ್, ಹೇಮಂತಗಳಲ್ಲಿ, ಪಂಚಾಂಗವನ್ನು ಶರತ್ ಋತುವಿನಲ್ಲಿ, ಉಷ್ಣವೀರ್ಯ ದ್ರವ್ಯಗಳನ್ನು ಗ್ರೀಷ್ಮ ಅರ್ಥಾತ್ ಬೇಸಿಗೆಯಲ್ಲಿ, ಶೀತಲದ್ರವ್ಯಗಳನ್ನು ಶಿಶಿರ ಕಾಲದಲ್ಲಿ, ವಾಂತಿ, ಭೇದಿ ಮಾಡಿಸಲು ಬೇಕಾದ ಔಷಧವನ್ನು ವಸಂತ ಋತುವಿನಲ್ಲಿ, ಬಸ್ತಿ, ನಸ್ಯ ಕ್ರಿಯೆಗಳಿಗೆ ಬೇಕಾಗುವ ದ್ರವ್ಯವನ್ನು ಶರದ್ ಋತುವಿನಲ್ಲಿ ಸಂಗ್ರಹಿಸುವುದು ಪ್ರಶಸ್ತ ಎಂಬುದಾಗಿ ಚರಕ ಸಂಹಿತಾ, ಸುಶ್ರುತ ಸಂಹಿತಾ, ರಾಜ ನಿಘಂಟು ಮೊದಲಾದ ಗ್ರಂಥಗಳು ವ್ಯಾಖ್ಯಾನಿಸಿವೆ. ಹಣ್ಣುಗಳು ಪೂರ್ತಿ ಬೆಳೆದು ಹಣ್ಣಾಗದೆ ಇದ್ದಾಗ, ಬೀಜಗಳು ಪೂರ್ತಿಯಾಗಿ ಬೆಳವಣಿಗೆ ಆಗಿದ್ದಾಗ, ಎಲೆಗಳನ್ನು ಹೂ ಬಿಟ್ಟು ಹಣ್ಣಾಗುವ ಮಧ್ಯದ ಸಮಯದಲ್ಲಿ ಸಂಗ್ರಹಿಸಬೇಕು ಮುಂತಾದ ಮಾರ್ಗದರ್ಶನವಿದೆ. ಆಯುರ್ವೆದದ ಈ ಎಲ್ಲ ಚಿಂತನೆಗಳು ಔಷಧ ಸಿದ್ಧಗೊಳಿಸುವ ಪ್ರಕ್ರಿಯೆಯಲ್ಲಿನ ಪರಿಪೂರ್ಣತೆಗೆ ದಾರಿದೀಪವಾಗಿದೆ.
