ಹಾಗೆಯೇ, ಈ ತೀರ್ಪು ಆಡ್ವಾಣಿ ಹಾಗೂ ಜೋಷಿಯವರ ರಾಜಕೀಯ ಬದುಕನ್ನು ಮುಂದೆ ಬೆಳಗುವ ಸಾಧ್ಯತೆಯೂ ಇಲ್ಲ. ಬಿಜೆಪಿ ಹಾಗೂ ರಾಷ್ಟ್ರ ರಾಜಕಾರಣ ಆ ಇಬ್ಬರು ಹಿರಿಯ ನಾಯಕರನ್ನು ಹಿಂದಿರಿಸಿ ಅದೆಷ್ಟೋ ಮುಂದೆ ಹೋಗಿಬಿಟ್ಟಿವೆ. ಈ ಬೆಳವಣಿಗೆಗಳಿಗೆ ಅವರಿಬ್ಬರೇ ಮುಖ್ಯವಾಗಿ ಹೊಣೆಯಾಗುತ್ತಾರೆ ಎನ್ನುವುದು ವಿಚಿತ್ರವಾದರೂ ಸತ್ಯ. ಯಪಿಎ ಆಳ್ವಿಕೆಯಲ್ಲಿ ಸೋನಿಯಾ ಗಾಂಧಿಯವರಿಗೆ ಹತ್ತಿರವಾದ ಕಾರಣ ಮತ್ತು ಆ ಕಾಂಗ್ರೆಸ್ ನಾಯಕಿಯ ವಿರುದ್ಧ ಬಿಜೆಪಿ ನಾಯಕರುಗಳು ಮಾಡಿದ ಭ್ರಷ್ಟಾಚಾರದ ಆರೋಪಗಳಲ್ಲ ಸತ್ಯದೂರ ಎಂದವರು 2011ರಲ್ಲಿ ನೀಡಿದ ಸಾರ್ವಜನಿಕ ಹೇಳಿಕೆ 2014ರ ಚುನಾವಣೆಗಳಲ್ಲಿ ಬಿಜೆಪಿಯ ವರಿಷ್ಠ ನಾಯಕರಲ್ಲೊಬ್ಬರಾಗಿ ಕಣಕ್ಕಿಳಿಯುವ ಅವಕಾಶವನ್ನೇ ಅವರಿಂದ ಕಿತ್ತುಕೊಂಡಿತು. ಆಮೇಲೆ ಅವರು ತಮ್ಮದೇ ಪಕ್ಷದಲ್ಲಿ ಮೂಲೆಗುಂಪಾಗಲು ಹೆಚ್ಚುಕಾಲ ಬೇಕಾಗಲಿಲ್ಲ. ಬಿಜೆಪಿಯ ಅಸಂತುಷ್ಟ ನಾಯಕರ ಗುಂಪಿಗೆ ವಲಸೆಹೋದ ಜೋಶಿಯವರದೂ ಅದೇ ಸ್ಥಿತಿ. 90 ದಾಟಿದ ಆಡ್ವಾಣಿ, 80 ದಾಟಿದ ಜೋಷಿ ಮತ್ತು ಕಲ್ಯಾಣ ಸಿಂಗ್ರಿಗೆ ಬೇರಾವುದೇ ಬಗೆಯ ರಾಜಕೀಯ ಪುನರುತ್ಥಾನದ ಕನಸೂ ನನಸಾಗದಿರಲು ವಯಸ್ಸೂ ಅಡ್ಡವಾಗಿ ನಿಂತಿದೆ.
