ಯಕ್ಷಗಾನಕ್ಕೆ ನಾಡಿನ ಕಲೆಯಾಗುವ ಅರ್ಹತೆ ನಿಜಕ್ಕೂ ಇದೆಯೇ? ಖಂಡಿತವಾಗಿಯೂ ಇದೆ. ಏಕೆಂದರೆ ಕಲಾ ಸಮೂಹವೇ ಯಕ್ಷಗಾನದಲ್ಲಿದೆ. ಸಂಗೀತ, ನೃತ್ಯ, ವೇಷಭೂಷಣ, ಮಾತು, ವಾದನದಂಥ ಕಲೆಗಳನ್ನೂ ಒಳಗೊಂಡ ಸಮಗ್ರ ಕಲೆಯಾಗಿದೆ. ಸರ್ವಸ್ವವಾಗಿದೆ. ಸಮಾಜದ ಎಲ್ಲರನ್ನೂ ಒಳಗೊಂಡು ಜಾತ್ಯತೀತವಾಗಿದೆ. ಕನ್ನಡ ಭಾಷೆಗೆ ಅದರಲ್ಲೂ ಶಾಸ್ತ್ರೀಯ ಕನ್ನಡಕ್ಕೆ ಅದು ನೀಡಿದ, ನೀಡುತ್ತಿರುವ ಕೊಡುಗೆಯೂ ಗಮನಾರ್ಹ. ಯಕ್ಷಗಾನ ಪಾತ್ರಧಾರಿಯಾಗಲಿ, ಕಾವ್ಯವಾಗಲೀ ಬೇರಾವುದೇ ಭಾಷೆಯ ಪದಗಳನ್ನು ಬಳಸುವುದಿಲ್ಲ. ಸಂಸ್ಕೃತ ಭಾಷೆ ಕನ್ನಡದಲ್ಲಿ ಹಾಸುಹೊಕ್ಕಾಗಿರುವುದರಿಂದ ಅದು ಪರಭಾಷೆ ಎನ್ನಲಾಗದು. ಕುಳಿತಲ್ಲೇ ಅಯೋಧ್ಯೆ, ಮಥುರೆ... ಹೀಗೆ ನಮ್ಮ ರಾಮಾಯಣ, ಮಹಾಭಾರತಗಳ ಸ್ಥಳಗಳಿಗೆ ಮಾತುಗಳ ಮೂಲಕವೇ ಕರೆದೊಯ್ಯಬಲ್ಲ ಹಾಗೂ ಆ ಕಾಲವನ್ನು ಆಶುರೂಪದಲ್ಲೇ ವಿಮಶಿಸಬಲ್ಲ ತಾಳಮದ್ದಲೆ ಪ್ರಕಾರವನ್ನು ಹೋಲುವ ಮತ್ತೊಂದು ಕಲೆ ಜಗತ್ತಿನ ಎಲ್ಲೂ ಇದ್ದಂತಿಲ್ಲ. ಹೀಗಾಗಿ ಕಲೆಯ ವಿಸ್ತ್ತಾರ ಹಾಗೂ ಕನ್ನಡನಾಡಿನ ಪ್ರತಿಷ್ಠೆಯ ದೃಷ್ಟಿಯಿಂದ ಯಕ್ಷಗಾನವನ್ನು ಕನ್ನಡನಾಡಿನ ಕಲೆ ಎಂದು ಸ್ವೀಕರಿಸಬಹುದಾಗಿದೆ. ಇದಕ್ಕೆ ಪೂರಕವಾಗಿ ಇನ್ನಷ್ಟು ಸಂಗತಿಗಳಿವೆ.
