ಯೂಟ್ಯೂಬ್ ತೆರಿಗೆ ಲಗಾಮು!; ಚಾನೆಲ್ ಕಂಟೆಂಟ್ ಕ್ರಿಯೇಟರ್ಸ್ ಮೇಲೆ ಪರಿಣಾಮ

ಯುವ ಜನರ ಮೊಬೈಲ್ ಗೀಳು ಎಲ್ಲರಿಗೂ ತಿಳಿದಿರುವ ವಿಚಾರವೇ. ಸಾಮಾಜಿಕ ಜಾಲತಾಣಗಳಲ್ಲಿ ಸಕ್ರಿಯವಾಗಿರುವ ಯುವಕ-ಯುವತಿಯರು ಫೇಸ್​ಬುಕ್, ವಾಟ್ಸ್​ಆಪ್, ಇನ್​ಸ್ಟಾಗ್ರಾಂ, ಟ್ವಿಟರ್, ಯೂಟ್ಯೂಬ್ ಮುಂತಾದ ವೇದಿಕೆಗಳಲ್ಲಿ ಸಕ್ರಿಯರಾಗಿದ್ದಾರೆ. ಯೂಟ್ಯೂಬ್​ನಲ್ಲಿ ಚಾನೆಲ್ ತೆರೆದು ದುಡ್ಡನ್ನೂ ಗಳಿಸುತ್ತಿದ್ದಾರೆ. ಆದರೆ, ಈ ಚಟುವಟಿಕೆಗೆ ತೆರಿಗೆಯ ಲಗಾಮು ಹಾಕಲು ಯೂಟ್ಯೂಬ್​ನ ಒಡೆತನ ಹೊಂದಿರುವ ಗೂಗಲ್ ಮುಂದಾಗಿದೆ. ಇದರಿಂದ ಭಾರತ ಮತ್ತು ಇತರ ರಾಷ್ಟ್ರಗಳಲ್ಲಿ ಯೂಟ್ಯೂಬ್ ಚಾನೆಲ್ ಹೊಂದಿರುವವರಿಗೆ ಕರಭಾರದ ಬರೆ ಬೀಳಲಿದೆ.

| ಶಶಿಧರ ಗರ್ಗೇಶ್ವರಿ

ಯೂಟ್ಯೂಬ್ ಮೂಲಕ ವಿಡಿಯೋಗಳನ್ನು ಹರಿಬಿಟ್ಟು ಆದಾಯ ಗಳಿಸುತ್ತಿರುವವರು ಅದರಲ್ಲಿ ತನಗೊಂದಿಷ್ಟು ರಾಜಸ್ವ ನೀಡಲಿ ಎಂಬುದು ಗೂಗಲ್ ಧೋರಣೆ. ಹೀಗಾಗಿ ವಿಡಿಯೋ ಅಪ್​ಲೋಡ್ ಮಾಡುವ ಮೂಲಕ ಲಾಭ ಮಾಡಿಕೊಳ್ಳುತ್ತಿರುವವರು ಅದಕ್ಕೆ ತೆರಿಗೆ ತೆರಬೇಕು ಎಂಬ ನೀತಿಯನ್ನು ಈ ವರ್ಷ ಜೂನ್​ನಿಂದ ಜಾರಿ ಮಾಡಲು ಗೂಗಲ್ ಮುಂದಾಗಿದೆ. ಅಮೆರಿಕದ ವೀಕ್ಷಕರಿಂದ ಲಾಭ ಗಳಿಸುತ್ತಿರುವ ಯೂಟ್ಯೂಬ್​ಚಾನೆಲ್​ಗಳಿಗೆ ಶೇ. 24ರಷ್ಟು ತೆರಿಗೆ ವಿಧಿಸುವುದಾಗಿ ತಿಳಿಸಿದೆ. ಯೂಟ್ಯೂಬ್​ಗೆ ಜಾಹೀರಾತು ಮತ್ತು ಪ್ರಾಯೋಜಿತ ವಿಡಿಯೋಗಳೇ ಆದಾಯದ ಮೂಲ. ಆದರೆ, ಅದು ಇತರ ಮೂಲಗಳನ್ನು ಆದಾಯಕ್ಕೆ ಆಶ್ರಯಿಸುತ್ತಿದೆ. ಚಾನೆಲ್ ಸದಸ್ಯತ್ವ, ಸೂಪರ್ ಚಾಟ್, ಚಾಟ್ ಡೋನೇಷನ್ಸ್, ಯೂಟ್ಯೂಬ್ ಪ್ರೀಮಿಯಮ್ ಸೂಪರ್ ಸ್ಟಿಕರ್ಸ್ ಇತ್ಯಾದಿ. ಈಗ ಕಂಟೆಂಟ್ ಅಪ್​ಲೋಡ್ ಮಾಡುವವರ ಮೇಲೆ ಕರ ಹೇರುವ ಮೂಲಕ ತನ್ನ ಆರ್ಥಿಕ ಸಂಪನ್ಮೂಲವನ್ನು ಮತ್ತಷ್ಟು ಗಟ್ಟಿಗೊಳಿಸಿಕೊಳ್ಳುತ್ತಿದೆ. ಅಮೆರಿಕದ ಕಂಟೆಂಟ್ ಕ್ರಿಯೇಟರ್​ಗಳಿಗೆ ಕಳೆದ ನವೆಂಬರ್​ನಿಂದಲೇ ಯೂಟ್ಯೂಬ್ ತೆರಿಗೆ ವಿಧಿಸುತ್ತಿದೆ.

ಬಳಕೆದಾರರ ಸಂಖ್ಯೆ ಏರಿಕೆ: 2005ರಿಂದ ಆರಂಭವಾದ ಯೂಟ್ಯೂಬ್​ಗೆ ಭಾರತದಲ್ಲಿ 2017ರಲ್ಲಿ 16.8 ಕೋಟಿ ಬಳಕೆದಾರರು ಇದ್ದರು. ಅದು 2018ರಲ್ಲಿ 22.9 ಕೋಟಿ, 2019ರಲ್ಲಿ 27.1 ಕೋಟಿ, 2020ರಲ್ಲಿ 30.87 ಕೋಟಿಗೆ ಏರಿತು. ಈ ವರ್ಷ ನಮ್ಮ ದೇಶದ 34.2 ಕೋಟಿ ಜನರು ಯೂಟ್ಯೂಬ್ ಬಳಸುತ್ತಿದ್ದಾರೆ.

ಬೇರೆ ದೇಶಗಳಿಗೆ ಹೋಲಿಸಿ ದರೆ ಏಷ್ಯಾದಲ್ಲಿನ ಕಂಟೆಂಟ್ ಕ್ರಿಯೇಟರ್​ಗಳಿಗೆ ಯೂಟ್ಯೂಬ್ ಕಡಿಮೆ ಆದಾಯ ಕೊಡುತ್ತಿದೆ. ಪ್ರತಿ ಚಾನೆಲ್​ನ ಸದಸ್ಯತ್ವ, ವೀಕ್ಷಣಾ ಸಮಯವನ್ನು ಪರಿಗಣಿಸಿ ತೆರಿಗೆ ವಿಧಿಸಿದರೆ ಅದು ಸ್ವಾಗತಾರ್ಹ. ಆದರೆ ಅದನ್ನು ನೋಡದೆಯೇ ಶೇ. 15 ತೆರಿಗೆ ನೀಡಲೇಬೇಕೆಂದರೆ ಅದು ನಮ್ಮಂಥವರಿಗೆ ಕಷ್ಟವಾಗುತ್ತದೆ. ಕರೊನಾ ಸಂಕಷ್ಟದ ಸಮಯದಲ್ಲಿ ಜನರು ಹೆಚ್ಚಾಗಿ ಯೂಟ್ಯೂಬ್ ಬಳಸಿದ್ದಾರೆ. ಕಂಟೆಂಟ್ ಕ್ರಿಯೇಟರ್​ಗಳ ಸಂಖ್ಯೆ ಹೆಚ್ಚಾಗಿದೆ. ಅದನ್ನೇ ಲಾಭವಾಗಿಸಿಕೊಳ್ಳಲು ಹೊರಟ ಯೂಟ್ಯೂಬ್ ಈ ಮಾರ್ಗ ಹುಡುಕಿಕೊಂಡಿದೆ.| ಆಕರ್ಷ್ ಕಮಲ ಕಂಟೆಂಟ್ ಕ್ರಿಯೇಟರ್