ಕನ್ನಡದ ಮಹತ್ವದ ಸಾಹಿತಿಗಳಲ್ಲೊಬ್ಬರಾದ ಕುಸುಮಾಕರ ದೇವರಗೆಣ್ಣೂರು ಅವರ ನಿಜನಾಮ ವಸಂತ ಅನಂತ ದಿವಾಣಜಿ. ವಿಜಯಪುರ ಜಿಲ್ಲೆಯ ದೇವರಗೆಣ್ಣೂರಿನಲ್ಲಿ 1930ರಲ್ಲಿ ಜನಿಸಿದ ಕುಸುಮಾಕರ ಮಹಾರಾಷ್ಟ್ರದ ಸೊಲ್ಲಾಪುರದ ದಯಾನಂದ ಮಹಾವಿದ್ಯಾಲಯದಲ್ಲಿ ಕನ್ನಡ ಅಧ್ಯಾಪಕರಾಗಿದ್ದರು. ಜೀವನೋತ್ಸಾಹದ ಚಿಲುಮೆಯಾಗಿದ್ದ ಕುಸುಮಾಕರ ತಮ್ಮ ವ್ಯಕ್ತಿತ್ವದ ವಿಕಾಸದಲ್ಲಿ ಬೇಂದ್ರೆ ಮತ್ತು ಸತ್ಯಕಾಮ ಅವರ ನೆರವು ದೊಡ್ಡದು ಎಂದು ನೆನೆಯುತ್ತಿದ್ದರು. ಅದೇ ರೀತಿ, ಕಾರ್ಲ್ ಮಾರ್ಕ್ಸ್, ವಿಕ್ಟರ್ ಫ್ರಾಂಕೆಲ್, ಜಿಡ್ಡು ಕೃಷ್ಣಮೂರ್ತಿ, ಮಹರ್ಷಿ ಅರವಿಂದರು, ರವೀಂದ್ರನಾಥ ಟಾಗೋರ್, ಕಾಫ್ಕಾ, ಕಾಮೂ, ಎಮರ್ಸನ್, ಥೋರೋ ಮೊದಲಾದವರನ್ನು ಆಳವಾಗಿ ಓದಿಕೊಂಡಿದ್ದ ಅವರು ವೈಚಾರಿಕ ನೆಲೆಗಟ್ಟಿನಲ್ಲಿ ಯೋಚಿಸುತ್ತಿದ್ದರು. ರಂ.ಶ್ರೀ. ಮುಗಳಿಯವರ ಮಾರ್ಗದರ್ಶನದಲ್ಲಿ ಪಿಎಚ್.ಡಿ ಅಧ್ಯಯನ ಮಾಡಿದ ಕುಸುಮಾಕರ, ಪುರಂದರದಾಸರ ಬಗ್ಗೆ ‘ಪ್ರಸಾದ ಯೋಗ’ ಮಹಾಪ್ರಬಂಧವನ್ನು 1962ರಲ್ಲಿ ಮಂಡಿಸಿದರು. ತಾಂತ್ರಿಕ ಕಾರಣಗಳಿಂದ ಅವರಿಗೆ ಡಾಕ್ಟರೇಟ್ ಸಿಗುವುದು ವಿಳಂಬವಾಗಿ ಕೊನೆಗೂ 1965ರಲ್ಲಿ ಪಿಎಚ್.ಡಿ ಪ್ರದಾನ ಮಾಡಲಾಯಿತು.
