ಹಾಗೆ ನೋಡಿದರೆ ಈ ಚಿಪ್ ತಯಾರಿಕೆ ಒಂದೇ ದೇಶದ ಜಹಗೀರುದಾರಿಕೆಯೇನಲ್ಲ. ಚಿಪ್ ವಿನ್ಯಾಸದಲ್ಲಿ ನೆದರ್ಲೆಂಡಿನ ಎಎಸ್ಎಂಎಲ್ ಏಕಸ್ವಾಮ್ಯ ಹೊಂದಿದ್ದು ತಯಾರಿಕೆಯಲ್ಲಿ ತೈವಾನಿನ ಟಿಎಸ್ಎಂಸಿ ಮತ್ತು ದಕ್ಷಿಣ ಕೊರಿಯಾದ ಸ್ಯಾಮಸಂಗ್ ಕಂಪನಿಗಳೆರಡೇ ಜಾಗತಿಕ ಉತ್ಪಾದನೆಯ ಶೇಕಡ 80 ರಷ್ಟು ಕಾಣಿಕೆ ನೀಡುತ್ತವೆ. ಮೂರನೆಯ ಸ್ಥಾನದ ಇಂಟೆಲ್ಗೆ ಇಲ್ಲಿ ಅತಿಥಿಪಾತ್ರ. ಇಲ್ಲಿ ಗಮನಿಸಬೇಕಾದ ಅಂಶವೆಂದರೆ ಈ ಚಿಪ್ ತಯಾರಿಕಾ ಕಂಪೆನಿಗಳ ಹೆಚ್ಚಿನ ಶಾಖೆಗಳು ಚೀನಾದ ನೆಲದಲ್ಲಿ ಸ್ಥಿತವಾಗಿದ್ದು ಜಾಗತಿಕ ಉತ್ಪಾದನೆಯ ಶೇಕಡ ಮೂವತ್ತರಷ್ಟು ಫಸಲು ಚೀನಾದಿಂದಲೇ ಬರುವ ಮೂಲಕ ನಂಬರ್ ಒನ್ ಚಿಪ್ ತಯಾರಿಕಾ ದೇಶವೆಂಬ ಬಿರುದನ್ನು ಗಳಿಸಿಕೊಂಡಿದೆ. ಆದರೆ, ಮಜವೆಂದರೆ ಚಿಪ್ ತಯಾರಿಕೆಯ ಅತಿಮುಖ್ಯ ಘಟ್ಟವಾದ ಮೂಡಿಸುವಿಕೆ (ಛಿಠ್ಚಿಜಜ್ಞಿಜ) ತಂತ್ರಜ್ಞಾನದ ದಿಗ್ಗಜ ಅಮೆರಿಕ ಮೂಲದ ಲ್ಯಾಮ್ ರಿಸರ್ಚ್ ಸೇರಿದಂತೆ ಹೆಚ್ಚಿನ ಪಕ್ಷ ಚೀನಾದಲ್ಲಿ ಚಿಪ್ ತಯಾರಿಕಾ ಘಟಕಗಳಲ್ಲಿ ತೊಡಗಿಸಿಕೊಂಡಿದ್ದು ಅಲ್ಲಿನ ತಂತ್ರಜ್ಞರೆಲ್ಲ ಅಮೆರಿಕದವರು. ಚಿಪ್ ತಯಾರಿಕೆಯಲ್ಲಿ ಚೀನಾ ಏಕಸ್ವಾಮ್ಯ ಗಳಿಸುತ್ತಿರುವ ಸಂಗತಿ ಕೋವಿಡ್ ನಂತರದ ಉಂಟಾದ ಐಸಿ ಕ್ಷಾಮದಿಂದ ಎಲ್ಲ ದೇಶಗಳ ಗಮನಕ್ಕೆ ಬಂತು. ಹೀಗೆ ಬಿಟ್ಟರೆ ಈ ಚೀನಾ ತನ್ನ ಔಷಧವನ್ನು ತನಗೇ ಕುಡಿಸುತ್ತದೆ ಎಂದು ಮನಗಂಡ ಅಮೆರಿಕ ತನ್ನ ಪೌರೋಹಿತ್ಯದಲ್ಲಿ ಜಪಾನ್, ದಕ್ಷಿಣ ಕೊರಿಯಾ ಮತ್ತು ತೈವಾನ್ ಒಳಗೊಂಡ ಚಿಪ್ 4 ಎಂಬ ರಂಗವನ್ನು ರಚಿಸಿ ಚಿಪ್ ಯುದ್ಧಕ್ಕೆ ಮುನ್ನುಡಿ ಹಾಡಿತು. ಆದರೆ, ತಮ್ಮ ದೇಶದ ರಫ್ತಿನ ಬಹುದೊಡ್ಡ ಪಾಲುದಾರನಾದ ಚೀನಾದೊಡನೆ ವ್ಯಾಪಾರ ಮುರಿದುಕೊಳ್ಳುವ ರಿಸ್ಕಗೆ ದುಡುಕದೇ ನಿಧಾನಿಸುತ್ತಿರುವ ಸದಸ್ಯ ರಾಷ್ಟ್ರಗಳ ವರ್ತನೆಯನ್ನು ಕಂಡು ಕೆರಳಿರುವ ಬೈಡನ್ ಕೊನೆಗೂ ತಂತ್ರಜ್ಞಾನ ರಫ್ತು ನಿಷೇಧ ಕಾಯ್ದೆಯ ಬ್ರಹ್ಮಾಸ್ತ್ರವನ್ನು ಉಪಯೋಗಿಸಿದ್ದಾರೆ. ಅಮೆರಿಕದ ಯಾವುದೇ ಸಂಸ್ಥೆ ಮತ್ತು ನಾಗರಿಕರು ಚೀನಾದ ಕಂಪನಿಗಳಿಗೆ ಅತ್ಯಾಧುನಿಕ ಚಿಪ್ ತಯಾರಿಕಾ ತಂತ್ರಜ್ಞಾನ ಮಾಹಿತಿಯನ್ನು ಹಂಚಿಕೊಳ್ಳಲು ಲೈಸೆನ್ಸ್ ಪಡೆಯುವುದನ್ನು ಕಡ್ಡಾಯ ಮಾಡಿ, ಒಂದು ಪಕ್ಷ ಉಲ್ಲಂಘಿಸಿದಲ್ಲಿ ಅಮೆರಿಕದ ಪೌರತ್ವವನ್ನು ರದ್ದು ಮಾಡುವ ಫರ್ವನು ಹೊರಡಿಸಿದ್ದಾರೆ. ತಂತ್ರಜ್ಞಾನವನ್ನು ತಪ್ಪು ಕೈಗಳಿಗೆ ಕೊಡುವುದನ್ನು ನಿರ್ಬಂಧಿಸುವ ಕಾನೂನು ಇದೆಂದು ಬಣ್ಣಿಸಿಕೊಂಡಿರುವ ಅಮೆರಿಕದ ಈ ನಡೆಯಿಂದ ಚೀನಾದಲ್ಲಿ ಕಾರ್ಯನಿರತ ಅಮೆರಿಕದ ಕಂಪನಿಗಳು ತಮ್ಮ ತಂತ್ರಜ್ಞರನ್ನು ವಾಪಸ್ಸು ಕರೆಸತೊಡಗಿವೆ. ಅತ್ತ ಅಮೆರಿಕದ ದ್ವೇಷವನ್ನು ಕಟ್ಟಿಕೊಳ್ಳಲಾಗದೆ ಇತ್ತ ಚೀನಾದಿಂದ ಗಳಿಸುತ್ತಿರುವ ಥೈಲಿಯನ್ನೂ ಬಿಟ್ಟುಕೊಡಲಾಗದ ಇಕ್ಕಟ್ಟಿಗೆ ಸಿಲುಕಿರುವ ಅಮೆರಿಕ ಮೂಲದ ಕಂಪನಿಗಳು ಈ ಬೀಸೊ ದೊಣ್ಣೆಯಿಂದ ಪಾರಾಗಲು ತಮ್ಮದೇ ಉತ್ಪಾದನೆಯ ದುರ್ಬಲ ಆವೃತ್ತಿಗಳನ್ನು ಚೀನಾಗೆ ಪೂರೈಸುತ್ತಿವೆ. ಎನ್ ವಿಡಿಯಾ ಕಂಪನಿಯ ಎ800 ಚಿಪ್ ಕೂಡ ಈ ಕಷ್ಟಕಾಲದ ಶಿಶುಗಳಲ್ಲಿ ಒಂದು. ಮಾನವ ಸಂಪನ್ಮೂಲದಲ್ಲಿ ಶ್ರೀಮಂತವಾಗಿದ್ದರೂ ಸೂಪರ್ ಕಂಪ್ಯೂಟರ್ ಮತ್ತು ರಕ್ಷಣಾ ಕ್ಶೇತ್ರದಲ್ಲಿನ ಅತ್ಯಾಧುನಿಕ ಸಾಮಗ್ರಿಗಳ ತಯಾರಿಕೆಗೆ ಅತ್ಯಗತ್ಯವಾಗಿರುವ ಚಿಪ್ ತಂತ್ರಜ್ಞಾನಕ್ಕಾಗಿ ಅಮೆರಿಕದ ಮೇಲೆ ಅವಲಂಬಿತವಾಗಿರುವ ಚೀನಾ, ಈ ಬೆಳವಣಿಗೆಯಿಂದ ದಿಗ್ಭ›ಮೆಗೊಂಡಿದ್ದು ಕೊನೆಗೆ ಚಿಪ್ಪು ಯಾರ ಕೈಗೆ ಸೇರಲಿದೆಯೆಂಬ ಕುತೂಹಲದಿಂದ ಜಗತ್ತು ಈ ಎರಡು ದೇಶಗಳತ್ತ ನೋಡುತ್ತಿದೆ.
