ಅಮರನಾಥಕ್ಕೆ ಹೋಗಿಬರುವುದು ಸಾಹಸವೇ ಸರಿ. ದಾರಿಯುದ್ದಕ್ಕೂ ಸೈನಿಕ ಸುರಕ್ಷಾ ವ್ಯವಸ್ಥೆ, ಉಚಿತ ಊಟೋಪಚಾರ, ವೈದ್ಯಕೀಯ ಸೇವೆ ಇದ್ದರೂ ಆ ಕೊರೆಯುವ ಚಳಿಯಲ್ಲಿ ಮಾಡುವ ಚಾರಣ, ರೋಚಕ ಅನುಭವ ನೀಡುತ್ತದೆ. ಜತೆಗೆ, ದಾರಿಯುದ್ದಕ್ಕೂ ಪರ್ವತಗಳು, ನದಿ ಸರೋವರಗಳು, ದಟ್ಟಾರಣ್ಯ... ಆ ಸುಂದರ ಪ್ರಕೃತಿಯನ್ನು ಶಬ್ದಗಳಲ್ಲಿ ವರ್ಣಿಸುವುದು ಅಸಾಧ್ಯ. ಯಾತ್ರೆಗೆ ಹೋಗಲು ಎರಡು ಮಾರ್ಗಗಳಿವೆ. ಜಮ್ಮು, ಪಹಲ್ಗಾಂವ್, ಚಂದನವಾಡಿ ಮೂಲಕ ಒಂದು ಮಾರ್ಗ. ಅಲ್ಲಿಂದ ಅಮರನಾಥಕ್ಕೆ 32 ಕಿಮೀ; ಇನ್ನೊಂದು, ಶ್ರೀನಗರ, ಬಾಲ್ಟಾಲ್ ಮೂಲಕ. ಅದರ ದೂರ 17 ಕಿಮೀ; ಇದು ಸಮೀಪವಾದರೂ ಕಡಿದಾದ, ಕಷ್ಟದ ಮಾರ್ಗ. ಶ್ರೀನಗರದಿಂದ ಅಮರನಾಥಕ್ಕೆ ನೇರವಾಗಿ ಹೆಲಿಕಾಪ್ಟರ್ ವ್ಯವಸ್ಥೆಯೂ ಇದೆ. ಆರೋಗ್ಯ ಸಮಸ್ಯೆ ಇರುವವರಿಗೆ, ವಯೋವೃದ್ಧರಿಗೆ ಎರಡೂ ಮಾರ್ಗಗಳಲ್ಲಿ ಕುದುರೆ, ಡೋಲಿ ವ್ಯವಸ್ಥೆ ಕೂಡ ಉಂಟು. ಕರ್ನಾಟಕದಿಂದ ದೆಹಲಿಗೆ, ಅಲ್ಲಿಂದ ಜಮ್ಮುವಿಗೆ ವಿಮಾನ ಅಥವಾ ರೈಲಿನ ಮೂಲಕ ತಲುಪಬಹುದು. ಮೊದಲ ಮಾರ್ಗದಲ್ಲಿ ಅಮರನಾಥಕ್ಕೆ ಹೋಗುವುದಾದರೆ ಜಮ್ಮುವಿನಲ್ಲಿ ತಂಗಲು ಹೋಟೆಲ್ಗಳಿವೆ. ನಂತರ ಬಸ್/ವ್ಯಾನ್ ಮೂಲಕ 315 ಕಿಮೀ ಪ್ರಯಾಣಿಸಿದರೆ ಪೆಹಲ್ಗಾಂವ್ ಸಿಗುತ್ತದೆ. ಅಲ್ಲಿಂದಲೇ ಉಚಿತ ಊಟೋಪಚಾರ ಆರಂಭವಾಗುತ್ತದೆ. ಟೆಂಟ್ಗಳ ವ್ಯವಸ್ಥೆ ಇರುತ್ತದೆ. ಹಣ ಕೊಟ್ಟು ಅವುಗಳಲ್ಲಿ ತಂಗಬಹುದು. ಪೆಹಲ್ಗಾಂವ್ನಿಂದ ಟ್ರೆಕ್ಕಿಂಗ್ ಅಥವಾ ಸಣ್ಣ ವಾಹನಗಳ ಮೂಲಕ 16 ಕಿಮೀ ಕ್ರಮಿಸಿದರೆ ಚಂದನವಾಡಿ ಸಿಗುತ್ತದೆ. ಇದು ಕಾಡುಮೇಡು, ಬೆಟ್ಟಗುಡ್ಡಗಳಿಂದ ಕೂಡಿದ ಸ್ಥಳ. ಅಲ್ಲಿಂದ ಶೇಷನಾಗ್ಗೆ ಪ್ರಯಾಣ. ಯಾತ್ರಿಕರ ಶಕ್ತಿ, ಧೈರ್ಯದ ಪರೀಕ್ಷೆ ಶುರುವಾಗುವುದೇ ಇಲ್ಲಿಂದ. ಆದರೆ ಯಾತ್ರಿಕರ ಲಗೇಜ್ ಹೊತ್ತುಕೊಂಡು ಬರಲು ಕೂಲಿಯವರು ಸಿಗುತ್ತಾರೆ. ಶೇಷನಾಗ್ನಿಂದ ಪಂಚತಾರಿಣಿಗೆ 14 ಕಿಮೀ ದೂರ. ಇಲ್ಲಿಯೂ ಕಠಿಣ ಬೆಟ್ಟಗುಡ್ಡಗಳ ಶ್ರೇಣಿಯನ್ನು ಹತ್ತಿ ಇಳಿಯಬೇಕಾಗುತ್ತದೆ. ಕೈಕಾಲು ಮರಗಟ್ಟುವಷ್ಟು ಚಳಿ ಇರುತ್ತದೆ. ಇಲ್ಲಿಯೂ ತಂಗಲು ಟೆಂಟ್ಗಳು ಸಿಗುತ್ತವೆ. ಇಲ್ಲಿಂದ ಅಮರನಾಥಕ್ಕೆ ಕೇವಲ 6 ಕಿಮೀ ಪ್ರಯಾಣ. ಹಿಮದ ಮೇಲೆಯೇ ಚಾರಣ ಮಾಡುವ ಸಂಭವ ಬರಬಹುದು. ಆಗ ಜಾರುವುದು, ಬೀಳುವುದು ಸಾಮಾನ್ಯ. ಹಾಗಾಗಿ ಊರುಗೋಲು ಅತ್ಯವಶ್ಯಕ.
