ಕೃಷಿ, ಅಡುಗೆ ಕೆಲಸ ಮಾಡಿಕೊಂಡಿರುವ ಪುತ್ತೂರು ತಾಲೂಕಿನ ಬಲ್ನಾಡು ಗುರಿಮೂಲೆಯ ಶ್ರೀಕೃಷ್ಣ ಶಾಸ್ತ್ರಿ, ಕೆಲದಿನಗಳ ಹಿಂದೆ ಅಡಕೆಯಿಂದ ಹೋಳಿಗೆ ಮಾಡಿದರೆ ಕೃಷಿಕರಿಗೆ ಒಂದಷ್ಟು ಸಹಾಯವಾಗಬಹುದು ಎಂದು ಯೋಚಿಸಿ, ಕಾರ್ಯತಂತ್ರ ರೂಪಿಸಿದರು. ಅಡಕೆಯನ್ನು ಮಿಲ್ನಲ್ಲಿ ಪುಡಿ ಮಾಡಿಸಿದರು. ಆದರೆ ಹೋಳಿಗೆಗೆ ಬೇಕಾದಷ್ಟು ಸಣ್ಣ ಪುಡಿಯಾಗಲಿಲ್ಲ. ಅದನ್ನು ಮನೆಗೆ ತಂದು ತುಪ್ಪದಲ್ಲಿ ಹುರಿದು ಮತ್ತೆ ಮಿಕ್ಸಿಯಲ್ಲಿ ಮತ್ತಷ್ಟು ಪುಡಿ ಮಾಡಿಕೊಂಡರು. ಬಳಿಕ ಸಕ್ಕರೆ ಪಾಕ ಮತ್ತಿತರ ವಸ್ತುಗಳನ್ನು ಸೇರಿಸಿ ಪಾಕ ಬರಿಸಿ ಹೂರಣ ಸಿದ್ಧಗೊಳಿಸಿದರು. ಮೈದಾ ಬಳಸಿ ಸಾಂಪ್ರದಾಯಿಕವಾಗಿ ಕಣಕವನ್ನೂ ಮಾಡಿಕೊಂಡರು. ಸಾಮಾನ್ಯ ಹೋಳಿಗೆಯಂತೆಯೇ ಕಣಕದೊಳಗೆ ಹೂರಣ ಇಟ್ಟು ಮಣೆಯಲ್ಲಿ ಹೋಳಿಗೆ ಮಾಡಿ ಬೇಯಿಸಿದರು. ಅಡಕೆ ಹೋಳಿಗೆಯ ರುಚಿಯನ್ನು ಮನೆಯವರು, ಸಮೀಪ ಬಂಧುಗಳು ಮೆಚ್ಚಿಕೊಂಡರು. ಅಡಕೆಯ ಚೊಗರು ಸಿಹಿಯೊಂದಿಗೆ ನಸುವಾಗಿ ಬೆರೆತು ಅದರದ್ದೇ ಭಿನ್ನ ರುಚಿ ಸಿಗುತ್ತದೆ. ಹೂರಣ ಪಾಕ ಬರಿಸುವ ಕಾರಣ ಅಡಕೆಯ ಚೊಗರು ಸಾಕಷ್ಟು ನಿಯಂತ್ರಣ ಆಗುತ್ತದೆ ಎನ್ನುತ್ತಾರೆ ಶಾಸ್ತ್ರಿ.
