ಲಕ್ಷಾಂತರ ಜನರ ಪಲಾಯನ, ವಲಸೆ, ಕೊಲೆ, ಸುಲಿಗೆ, ಅತ್ಯಾಚಾರಗಳಿಂದ ಭೀಕರ ಹಿಂಸಾಚಾರಕ್ಕೆ ಕಾರಣವಾಗಿದ್ದ ದೇಶ ವಿಭಜನೆಯ ಕಹಿನೆನಪು ದಶಕಗಳ ನಂತರವೂ ಗಡಿಯಾಚೆ ಈಚೆಗಿನ ಕೋಟ್ಯಂತರ ಜನರ ಮನಸ್ಸನ್ನು ಕಾಡುತ್ತಲೇ ಇದೆ. ಘಟನೆಯನ್ನು ಪ್ರತ್ಯಕ್ಷ ಕಂಡುಂಡ ಹಿರಿಯರ ಮಾನಸಿಕ ಆಘಾತಕ್ಕೆ ಸಾಕ್ಷಿಗಳಾದ ಇಂದಿನ ಪೀಳಿಗೆಯೂ ಆ ಬರ್ಬರ ಘಟನಾವಳಿಗಳನ್ನು ಒಂದು ದುಸ್ವಪ್ನವೆಂಬಂತೆ ಸ್ಮರಿಸುತ್ತಾರೆ. ಮಾಧ್ಯಮ ಕ್ರಾಂತಿಯ ಇಂದಿನ ಯುಗದಲ್ಲೂ ನೋಟು ರದ್ದತಿಯಂತಹ ಕ್ಷಿಪ್ರ ರಾಜಕೀಯ ನಿರ್ಣಯಗಳು ಅನುಭವಕ್ಕೆ ಬರಲು ಅನೇಕರಿಗೆ ಅದೆಷ್ಟೋ ಸಮಯ ಬೇಕಾಯಿತೆಂದಾದರೆ ಅನಕ್ಷರಸ್ಥ ಭಾರತದ ಅಂದಿನ ವಿಭಜನೆಯ ರಾಜಕೀಯ ನಿರ್ಣಯ ಅದೆಷ್ಟು ಜನರಿಗೆ ತಲುಪಿರಬಹುದು?
