ಶ್ರೀ ಕವೀಂದ್ರ ತೀರ್ಥರು ಪೀಠದಲ್ಲಿದ್ದದ್ದು ಕೆಲವೇ ವರ್ಷಗಳಾದರೂ ಅವರು ಮಾಡಿದ ಸಾಮಾಜಿಕ ಕಾರ್ಯ, ಯೋಜನೆಗಳು ನೂರಾರು ವರುಷಗಳಿಂದ ಇಂದಿಗೂ ಮಾದರಿಯಾಗಿವೆ. ಶ್ರೀ ವಿದ್ಯಾಧಿರಾಜರ ಪ್ರಿಯ ಶಿಷ್ಯರಾಗಿ ಗುರುಗಳ ಆದೇಶ ಹಾಗೂ ಅನುಗ್ರಹದಂತೆ ವೇದಾಂತ ಸಾಮ್ರಾಜ್ಯವನ್ನು ವೈಭವೋಪೇತವಾಗಿ ಮುನ್ನಡೆಸಿಕೊಂಡು ಬಂದ ಕೀರ್ತಿ ಇವರದು. ಸಮಾಜದ ಉದ್ಧಾರಕ್ಕಾಗಿ ಸದಾ ಧ್ಯಾನಿಸುತ್ತಿದ್ದು ಸ್ಮರಣೀಯ ಸೇವೆಯನ್ನು ಸಲ್ಲಿಸಿದರು. ಶ್ರೀ ವಿದ್ಯಾಧಿರಾಜರ ಬಹುಮುಖ ಕೆಲಸಗಳಲ್ಲಿ ಸಕ್ರಿಯವಾಗಿ ಪಾಲ್ಗೊಂಡು ಅವರ ಸಮಾಜಮುಖಿ ಕನಸುಗಳನ್ನೆಲ್ಲ ನನಸು ಮಾಡಿದರು. ಅನೇಕ ಸುಧಾರಣೆಗಳನ್ನು ತಂದ ಕೀರ್ತಿಗೆ ಭಾಜನರಾದರು. ಪೂರ್ವಾಶ್ರಮದ ಹೆಸರು ವಿದ್ವಾನ್ ವಿಷ್ಣು ದಾಸಾಚಾರ್ಯರು. ನ್ಯಾಯ ಮತ್ತು ವೇದಾಂತ ವಿದ್ಯೆಯಲ್ಲಿ ಅಗಣಿತ ಸಾಧನೆಯನ್ನು ಮಾಡಿ ಪ್ರಕಾಂಡ ಪರಮಹಂಸರಾಗಿ ಅನೇಕ ಪಂಡಿತರನ್ನು ರೂಪಿಸಿ ಸಮಾಜಕ್ಕೆ ಸನಾತನ ಧರ್ಮ ರಕ್ಷಣೆಗಾಗಿ ಕೊಡುಗೆ ನೀಡಿದರು. ‘ವಾದ ರತ್ನಾವಳಿ’ ಶ್ರೀ ಕವೀಂದ್ರ ತೀರ್ಥರು ರಚಿಸಿರುವ ಅಪೂರ್ವ ಗ್ರಂಥಗಳಲ್ಲಿ ಪ್ರಮುಖವಾದದ್ದು.
