ಇಪ್ಪತ್ತು ನಿಮಿಷಗಳಷ್ಟು ಕ್ಷಿಪ್ರ ಅವಧಿಯಲ್ಲಿ ಪ್ಯಾಲೆಸ್ಟೀನೀಯನ್ ಭಯೋತ್ಪಾದಕ ಸಂಘಟನೆ ಹಮಾಸ್ ಇಸ್ರೇಲ್ ಮೇಲೆ ಐದರಿಂದ ಏಳು ಸಾವಿರ ಕ್ಷಿಪಣಿಗಳ ಮಳೆಗರೆದಿದೆ. ಇಸ್ರೇಲ್ನ ವಿಶ್ವಖ್ಯಾತ ಐರನ್ ಡೋಮ್ ಕ್ಷಿಪಣಿ ಸುರಕ್ಷಾ ವ್ಯವಸ್ಥೆ ಬೆರಳೆಣಿಕೆಯಷ್ಟು ಕ್ಷಿಪಣಿಗಳ ಹೊರತಾಗಿ ಉಳಿದೆಲ್ಲವನ್ನೂ ಆಕಾಶದಲ್ಲೇ ತಡೆಗಟ್ಟಿ ನಿಷ್ಪಲಗೊಳಿಸಿದ ಕಾರಣ ಅವುಗಳಿಂದ ಆ ಯೆಹೂದಿ ರಾಷ್ಟ್ರಕ್ಕಾದ ಹಾನಿಯೇನೂ ಗಂಭೀರವಲ್ಲ. ಆದರೆ ಇದುವರೆಗಿನ ತನ್ನ ಇಪ್ಪತ್ತಮೂರು ದಾಳಿಗಳಲ್ಲಿ ಮಾಡದಿದ್ದನ್ನು ಈ ಬಾರಿ ಹಮಾಸ್ ಮಾಡಿದೆ. ಅದರ ಶಸ್ತ್ರಸಜ್ಜಿತ ಭಯೋತ್ಪಾದಕರು ಗಾಝಾ ಇಸ್ರೇಲ್ ಗಡಿಯಲ್ಲಿನ ಲೋಹಬೇಲಿಯನ್ನು ಬುಲ್ಡೋಜರ್ಗಳ ಮೂಲಕ ಭೇದಿಸಿ ಇಸ್ರೇಲ್ನೊಳಗೆ ನುಗ್ಗಿ ಒಂದು ತಾಸಿನೊಳಗೆ ಹೆಂಗಸರು, ಮಕ್ಕಳು, ಹಿರಿಯರೆನ್ನದೆ ಬರ್ಬರವಾಗಿ ಕೊಂದದ್ದು ಸುಮಾರು ಏಳುನೂರು ಜನರನ್ನು. ಮಧ್ಯಯುಗದಲ್ಲಿ ಮುಸ್ಲಿಂ ದಾಳಿಕೋರರು ಉತ್ತರ ಅರೇಬಿಯಾ, ಮೆಸೊಪೊಟೇಮಿಯಾ, ಸಿರಿಯಾ, ಲೆವಾಂಟ್, ಪರ್ಶಿಯಾ, ಅನತೋಲಿಯಾ, ಖ್ವಾರಿಝ್ಮಿಯಾ, ಅಫ್ಘಾನಿಸ್ತಾನ ಮತ್ತು ಉತ್ತರ ಭಾರತದಲ್ಲಿ ಎಸಗಿದ ಪೈಶಾಚಿಕ ದಾಳಿಗಳ ಒಂದು ‘ಸ್ಯಾಂಪಲ್’ನಂತೆ ಕಂಡ ಆ ದಾಳಿಗಳಲ್ಲಿ ಹಮಾಸ್ ಭಯೋತ್ಪಾದಕರು ನೂರೈವತ್ತರಿಂದ ಇನ್ನೂರು ಜನರನ್ನು ಬಂಧಿಗಳನ್ನಾಗಿಸಿಕೊಂಡು ಗಾಝಾಗೆ ಎಳೆದುಕೊಂಡುಹೋಗಿದ್ದಾರೆ. ಅವರಲ್ಲಿ ಇಸ್ರೇಲಿಗಳಲ್ಲದೇ ಅಮೆರಿಕ, ಕೆನಡಾ, ಮೆಕ್ಸಿಕೋ, ಕೊಲಂಬಿಯಾ, ಅರ್ಜೆಂಟೈನಾ, ಬ್ರೆಝಿಲ್, ಚಿಲಿ ಬ್ರಿಟನ್, ಫ್ರಾನ್ಸ್, ಥಾಯ್ಲ್ಯಾಂಡ್ ಮತ್ತು ಫಿಲಿಪ್ಪೀನ್ಸ್ನ ನಾಗರಿಕರೂ ಸೇರಿ ಜಗತ್ತಿನ ಮೂಲೆಮೂಲೆಯ ಜನರಿದ್ದಾರೆ. ಅವರಲ್ಲಿ ಇಬ್ಬರು ಅಮೆರಿಕನ್ ತಾಯಿ-ಮಗಳು ಮತ್ತು ಇಬ್ಬರು ಇಸ್ರೇಲಿ ವೃದ್ಧೆಯರನ್ನು ಎರಡು ವಾರಗಳ ಬಂಧನದ ನಂತರ ಹಮಾಸ್ ಬಿಡುಗಡೆ ಮಾಡಿದೆ. ಉಳಿದವರಲ್ಲಿ ಮೂಳೆ ಮುರಿತಕ್ಕೆ ಚಿಕಿತ್ಸೆ ಪಡೆಯುತ್ತಿರುವ ಒಬ್ಬಾಕೆಯ ಹೊರತಾಗಿ ಮತ್ತಾವ ಬಂಧಿಯ ಬಗೆಗೂ ವಿಶ್ವಾಸಾರ್ಹ ಮಾಹಿತಿ ಹೊರಬಂದಿಲ್ಲ. ಮಧ್ಯಯುಗದಲ್ಲಾಗುತ್ತಿದ್ದಂತೆ ಪುರುಷರೆಲ್ಲರ ಹತ್ಯೆ, ಮಹಿಳೆಯರ ಮಾನಭಂಗ ಮತ್ತು ಬಲವಂತ ವಿವಾಹ ಹಾಗೂ ಮಕ್ಕಳ ಮತಾಂತರ ಮತ್ತು ಗುಲಾಮಗಿರಿ ಈಗ ಆಗಿಲ್ಲ ಎಂದು ಆಶಿಸೋಣ. ಹಾಗೆಯೇ ಆಗಿಹೋಗಿದ್ದರೆ ಆ ಬಗ್ಗೆ ಅಚ್ಚರಿ ಪಡಬೇಕಾಗಿಲ್ಲ. ಅದು ಆ ಜನಗಳ ಪುರಾತನ ರಿವಾಜು. ಬಲಿಯಾದವರ ಬಗ್ಗೆ ಮರುಕ ಪಡುವುದಲ್ಲದೆ ಬೇರೇನೂ ಮಾಡಲು ನಮ್ಮಿಂದಾಗದು.
