ವರ್ತಮಾನವು ದೇವರಿತ್ತ ಉಡುಗೊರೆ: ಎಷ್ಟು ವರ್ಷಗಳ ಸಾಧನೆಯ ನಂತರ ಆತ್ಮಜ್ಞಾನ ಸಿಗಬಹುದು, ಮೋಕ್ಷಪ್ರಾಪ್ತಿಯಾಗಬಹುದು ಎನ್ನುವ ಪ್ರಶ್ನೆ ಕೆಲವರಲ್ಲಿ ಇರಬಹುದು. ಆದರೆ ನನ್ನ ಗುರು ಭಗವಾನ್ ಸತ್ಯ ಸಾಯಿ ಬಾಬಾ ಅವರ ಪ್ರಕಾರ, ಆಧ್ಯಾತ್ಮಿಕ ಪಯಣದಲ್ಲಿ ವರ್ತಮಾನದಲ್ಲಿ ಬದುಕುವುದೇ ಬಹಳ ಮುಖ್ಯ. ‘ವರ್ತಮಾನವು ದೇವರಿತ್ತ ಉಡುಗೊರೆ’ ಎಂಬ ಅವರ ಮಾತಿನಂತೆ, ಇಂದಿನ ಕೆಲಸವನ್ನು ಇಂದೇ ಮುಗಿಸುವ ನಿಷ್ಠೆ ಅತಿಮುಖ್ಯ. ಎಲ್ಲವೂ ಸಿಗಬೇಕಾದ ಕಾಲಕ್ಕೆ ಸಿಗಲಿದೆ, ಆಗಬೇಕಾದ ಕಾಲಕ್ಕೆ ಆಗಲಿದೆ. ನಮ್ಮ ಸಾಧನೆಯ ಪಥ ನಿಶ್ಚಯವಾದ ಮೇಲೆ, ಮಾರ್ಗದರ್ಶನ ಮಾಡುವ ಗುರುವು ದೊರೆತ ಮೇಲೆ ಅವರ ಮೇಲಿನ ವಿಶ್ವಾಸದಿಂದ ನಾವು ಮುಂದಿನ ಹೆಜ್ಜೆ ಇರಿಸುವುದು ಬಹಳ ಮುಖ್ಯ. ಹಿಂದೆ ಏನಾಗಿತ್ತು, ಮುಂದೇನಾದೀತು ಎಂದು ಹೆಚ್ಚು ಯೋಚಿಸದೆ, ಗುರುವಿನ ಮಾತಿನ ಮೇಲೆ ವಿಶ್ವಾಸ ಇರಿಸಿ ಕಾರ್ಯಪ್ರವೃತ್ತರಾಗಬೇಕು.
