ಇನ್ನರ್​ ಇಂಜಿನಿಯರಿಂಗ್​ನ ಪ್ರಯೋಜನಗಳು ಅನೇಕ

(ಸದ್ಗುರು ಅವರು ಯೋಗಿ, ದಾರ್ಶನಿಕ, ಆಧ್ಯಾತ್ಮಿಕ ನಾಯಕ.

ಯೋಗ ಎಂದು ನಾವು ಹೇಳಿದಾಗ ಬಹುಶಃ ಅನೇಕ ಜನರಿಗೆ ಶರೀರವನ್ನು ಅಸಾಧ್ಯವಾದ ಭಂಗಿಗಳಲ್ಲಿ ತಿರುಗಿಸುವ ಅಭ್ಯಾಸವೆಂದು ಭಾಸವಾಗುತ್ತದೆ. ಆದರೆ ನಾವು ಹೇಳುತ್ತಿರುವ ಯೋಗ ಎಂದರೆ ಅದಲ್ಲ. ಯೋಗ ಎಂದರೆ ದೇಹ, ಮನಸ್ಸು ಮತ್ತು ಆಂತರಿಕ ಸ್ವಭಾವಗಳು ಪರಿಪೂರ್ಣ ಲಯದಲ್ಲಿರುವ ಸ್ಥಿತಿ. ನಿಮ್ಮ ಆಂತರ್ಯವೆಲ್ಲವೂ ಅತ್ಯಂತ ಸುಂದರವಾಗಿ ಕಾರ್ಯನಿರ್ವಹಿಸುವ ಮಟ್ಟಕ್ಕೆ ನಿಮ್ಮನ್ನು ನೀವು ಸರಿಹೊಂದಿಸಿಕೊಂಡರೆ, ನಿಮ್ಮ ಅತ್ಯುತ್ತಮ ಸಾಮರ್ಥ್ಯಗಳು ಸಹಜವಾಗಿ ಹೊರಹೊಮ್ಮುತ್ತವೆ.

ಉತ್ತಮ ಸಮತೋಲನ, ಗಮನ ಸಾಮರ್ಥ್ಯ ಮತ್ತು ಮಿದುಳಿನ ಕಾರ್ಯನಿರ್ವಹಣೆ ಅತ್ಯಂತ ಮುಖ್ಯ. ಉದಾಹರಣೆಗೆ, ಇನ್ನರ್​ ಇಂಜಿನಿಯರಿಂಗ್​ ಕಾರ್ಯಕ್ರಮದಲ್ಲಿ ನಾವು ಜನರಿಗೆ ಶಾಂಭವಿ ಮಹಾಮುದ್ರಾ ಕ್ರಿಯಾದ ದೀಕ್ಷೇಯನ್ನು ನೀಡುತ್ತೇವೆ. ಅಧ್ಯಯನಗಳ ಪ್ರಕಾರ, ಪ್ರತಿದಿನ ಶಾಂಭವಿಯನ್ನು ಅಭ್ಯಾಸ ಮಾಡಿದ ಮೂರೇ ತಿಂಗಳಲ್ಲಿ ಮಿದುಳಿನ ನರಕೋಶಗಳ ಪುನರುತ್ಪತ್ತಿಗೆ ಕಾರಣವಾಗುವ ಪ್ರಮುಖ ಪೊಟೀನ್​ ಮಟ್ಟವು ಶೇಕಡ 241ರಷ್ಟು ಹೆಚ್ಚುತ್ತದೆ. ಇದರರ್ಥ ನೀವು ಹೆಚ್ಚು ಬುದ್ಧಿವಂತರಾಗಿರುತ್ತೀರಿ, ಸಮತೋಲನದಿಂದಿರುತ್ತೀರಿ ಮತ್ತು ಗಮನ ಸಾಮರ್ಥ್ಯದೊಂದಿಗಿರುತ್ತೀರಿ. ದಿನಕ್ಕೆ ಮೂವತ್ತು ನಿಮಿಷಗಳನ್ನು ಆರು ತಿಂಗಳು ಮುಡಿಪಾಗಿಸಿದರೆ, ಹೆಚ್ಚು ಪರಿಣಾಮಕಾರಿಯಾಗಿ ಕೆಲಸಗಳನ್ನು ಮಾಡುವ ಕಾರಣ, ಪ್ರತಿದಿನ ಕನಿಷ್ಠ ಪ 2 ಗಂಟೆಗಳಷ್ಟು ಲಾಭವನ್ನು ಗಳಿಸಿರುತ್ತೀರಿ.

ದೀರ್ಘಕಾಲಿಕ ಕಾಯಿಲೆಗಳ ನಿರ್ವಹಣೆ: ಇನ್ನರ್​ ಇಂಜಿನಿಯರಿಂಗ್​ ಆರೋಗ್ಯಕರ ಜೀವನವನ್ನು ರೂಪಿಸುವ ವಿಧಾನವೂ ಹೌದು. ಮನುಷ್ಯರ ಕಾಯಿಲೆಗಳು ಮುಖ್ಯವಾಗಿ ಎರಡು ವಿಧ. ಸೋಂಕಿನ ಕಾಯಿಲೆಗಳು ಮತ್ತು ದೀರ್ಘಕಾಲಿಕ ಕಾಯಿಲೆಗಳು. ಹೊರಗಿನ ಜೀವಿಗಳು ದೇಹವನ್ನು ಆಕ್ರಮಿಸಿ ಸೋಂಕಿನ ಕಾಯಿಲೆಗಳನ್ನು ಉಂಟುಮಾಡುತ್ತವೆ. ಇವನ್ನು ಔಷಧಗಳಿಂದ ಗುಣಪಡಿಸಬೇಕಾಗುತ್ತದೆ. ದೀರ್ಘಕಾಲಿಕ ಕಾಯಿಲೆಗಳು, ಅಂದರೆ ದೇಹವೇ ಸೃಷ್ಟಿಸುವ ಸಮಸ್ಯೆ. ಶರೀರ ವ್ಯವಸ್ಥೆಯಲ್ಲಿ ಮೂಲಭೂತವಾದದ್ದೇನೋ ಸಮತೋಲನ ತಪ್ಪುತ್ತಿದೆ.

ಆಂತರ್ಯದ ಸಮಸ್ಯೆಯಿಂದ ಸೃಷ್ಟಿಯಾದ ಇಂತಹ ಕಾಯಿಲೆಗಳಿಗೆ ಆಂತರಿಕ ಪರಿಹಾರವನ್ನು ಕಂಡುಕೊಳ್ಳುವುದು ಬಹಳ ಮುಖ್ಯ. ಆಂತರ್ಯದಲ್ಲಿ, ಈ ದೇಹವನ್ನು ರೂಪಿಸುವ ಸಾಮರ್ಥ್ಯ ಹೊಂದಿರುವ ಬುದ್ಧಿಶಕ್ತಿಯ ಆಯಾಮವೊಂದಿದೆ. ನೀವು ಬ್ರೆಡ್​ ತುಂಡೊಂದನ್ನು ತಿಂದರೆ, ಕೆಲವೇ ಗಂಟೆಗಳಲ್ಲಿ ಅದು ಶಕ್ತಿಯಾಗಿ ಬದಲಾಗುತ್ತದೆ. ಇನ್ನರ್​ ಇಂಜಿನಿಯರಿಂಗ್​ ಆಂತರಿಕ ಬುದ್ಧಿಮತ್ತೆ ಮತ್ತು ಸಾಮರ್ಥ್ಯದ ಆಯಾಮವನ್ನು ಸ್ಪರ್ಶಿಸುವ ಪ್ರಕ್ರಿಯೆಯಾಗಿದೆ, ಹೀಗಾಗಿ ಆರೋಗ್ಯವು ಒಂದು ಸಮಸ್ಯೆಯಾಗಿರುವುದಿಲ್ಲ.

ಶಾಂತಿ, ಆನಂದದ ಕೆಮಿಸ್ಟ್ರಿ ನಿರ್ಮಿಸಿಕೊಳ್ಳಿ: ಇನ್ನರ್​ ಇಂಜಿನಿಯರಿಂಗ್​, ನೀವು ನಿಮಗೆ ಬೇಕಾದಂತಹ ಸೂಕ್ತ ಕೆಮಿಸ್ಟ್ರಿಯನ್ನು ನಿರ್ಮಿಸಿಕೊಳ್ಳಬಹುದಾದ ಸಾಧನ. ಮನುಷ್ಯರ ಎಲ್ಲ ಅನುಭವಗಳಿಗೂ ಒಂದು ರಾಸಾಯನಿಕ ಆಧಾರವಿದೆ. ನೀವು ಶಾಂತಿ, ಸಂತೋಷ, ಆನಂದ, ನರಳಾಟ, ಸಂಕಟ ಮತ್ತು ಭಾವೋತ್ಕರ್ಷ ಎಂದು ಕರೆಯುವ ಇವೆಲ್ಲವೂ ವಿವಿಧ ಬಗೆಯ ಕೆಮಿಸ್ಟ್ರಿ. ನೀವೊಂದು ಸಂಕೀರ್ಣ ರಾಸಾಯನಿಕ ಮಿಶ್ರಣ. ಪ್ರಶ್ನೆ ಏನೆಂದರೆ, ನೀವು ಅದ್ಭುತ ಮಿಶ್ರಣವಾಗಿದ್ದೀರೋ ಅಥವಾ ಕೆಟ್ಟ ಮಿಶ್ರಣವಾಗಿದ್ದೀರೋ? ನೀವು ನಿಮ್ಮೊಳಗೆ ಆನಂದಪೂರ್ಣ ಕೆಮಿಸ್ಟ್ರಿಯನ್ನು ನಿರ್ಮಿಸಿ ನಿಮ್ಮನ್ನು ನೀವು ಅದ್ಭುತ ಮಿಶ್ರಣವಾಗಿಸಿಕೊಂಡರೆ, ಸಂತೋಷವಾಗಿರುವುದು ಒಂದು ಸಹಜ ಪರಿಣಾಮ.

ಧೂಮಪಾನ ಅಥವಾ ಕಾಫಿ ಕುಡಿಯುವ ಅಭ್ಯಾಸವನ್ನು ನಿಭಾಯಿಸುವುದು ಹೇಗೆಂದು ನನ್ನನ್ನು ಕೇಳುತ್ತಿರುತ್ತಾರೆ. ನಿಮ್ಮ ಕೆಮಿಸ್ಟ್ರಿಯು ಧೂಮಪಾನ ಅಥವಾ ಕಾಫಿಯನ್ನು ಅವಲಂಬಿಸುವಂತೆ ಮಾಡುವ ಶಾರೀರಿಕ ಆಯಾಮವೊಂದಿದೆ. ಆದರೆ ಶಾಂಭವಿ ಮಹಾಮುದ್ರಾ ಕ್ರಿಯೆಯು ಧೂಮಪಾನ ಅಥವಾ ಕಾಫಿ ಕುಡಿಯುವ ಅಗತ್ಯವು ಕಣ್ಮರೆಯಾಗುವಂತಹ ರೀತಿಯಲ್ಲಿ ನಿಮ್ಮ ವ್ಯವಸ್ಥೆಯನ್ನು ಚುರುಕುಗೊಳಿಸುತ್ತದೆ.

ಯಾರಿಗೂ "ಇದನ್ನು ಬಿಟ್ಟುಬಿಡಿ' ಎಂದು ಹೇಳುವುದರಲ್ಲಿ ನನಗೆ ನಂಬಿಕೆಯಿಲ್ಲ. ಇಲ್ಲಿಯವರೆಗೆ ಧೂಮಪಾನವು ನಿಮ್ಮ ಅತಿ ದೊಡ್ಡ ಅನುಭವವಾಗಿದ್ದರೆ ನೀವು ಸಿಗರೇಟನ್ನು ಕೇವಲ ಎರಡು ನಿಮಿಷ ಕೆಳಗಿಟ್ಟು ಮತ್ತೆ ಪ್ರಾರಂಭಿಸುತ್ತೀರಿ. ಆದರೆ ಧೂಮಪಾನ ಅಥವಾ ಮದ್ಯಪಾನಕ್ಕಿಂತಲೂ ದೊಡ್ಡದಾದ ಅನುಭವವನ್ನು ಸಾಧ್ಯವಾಗಿಸಿದರೆ, ನಾನು ನಿಮಗೆ ಅದನ್ನು ಬಿಟ್ಟುಬಿಡುವಂತೆ ಹೇಳಬೇಕೇ? ವ್ಯಸನವು ತಾನಾಗಿಯೇ ಬಿಟ್ಟು ಹೋಗುತ್ತದೆ. ನಿಮಗೆ ಕೇವಲ ನಿಮ್ಮ ಕೆಮಿಸ್ಟ್ರಿಯ ಕಾರಣದಿಂದಲೇ ಸಂಪೂರ್ಣವಾಗಿ ಭಾವೋತ್ಕರ್ಷರಾಗುವುದು ಹೇಗೆಂದು ತಿಳಿದಿದ್ದರೆ, ನೀವು ಧೂಮಪಾನ ಅಥವಾ ಮದ್ಯಪಾನವನ್ನು ಮಾಡುವುದಿಲ್ಲ. ಸಾವಿರಾರು ಜನರು ಶಾಂಭವಿ ಮಹಾಮುದ್ರಾಗಾಗಿ ಕುಳಿತ ಮೊದಲ ದಿನವೇ ಭಾವೋತ್ಕರ್ಷದ ಸ್ಥಿತಿಗಳಿಗೆ ಚಿಮ್ಮಿದ್ದಾರೆ.

ನಾನು ಇಂತಹ ಯಾವುದೇ ಪದಾರ್ಥವನ್ನು ಎಂದಿಗೂ ಸೇವಿಸಿಲ್ಲ; ಆದರೆ ನೀವು ನನ್ನ ಕಣ್ಣುಗಳನ್ನು ನೋಡಿದರೆ, ನಾನು ಸದಾ ಉನ್ಮತ್ತ. ಹ್ಯಾಂಗೋವರ್​ ಇಲ್ಲ, ಯಾವುದೇ ಖರ್ಚಿಲ್ಲ, ಆರೋಗ್ಯಕ್ಕೂ ಒಳ್ಳೆಯದು! ಯೋಗಿಗಳು ಮದ್ಯ ಮತ್ತು ಮಾದಕ ವಸ್ತುಗಳನ್ನು ಬಾಲಿಶವಾದವು ಎಂದು ನೋಡುತ್ತಾರೆ, ಏಕೆಂದರೆ ನಾವು ನಮ್ಮ ಜೀವಂತಿಕೆಯಿಂದಲೇ ಸಾವಿರ ಪಟ್ಟು ಉನ್ಮತ್ತರಾಗಬಹುದು.

ಸತ್ಯ ಸಂಗತಿ ನಿಧಾನವಾಗಿ ಅರಳುತ್ತದೆ: ಇನ್ನರ್​ ಇಂಜಿನಿಯರಿಂಗ್​ ಅನೇಕ ಪ್ರಯೋಜನಗಳನ್ನು ಹೊಂದಿದೆ. ಆದರೆ, ದೈಹಿಕ ಆರೋಗ್ಯ, ಮಾನಸಿಕ ಸಾಮರ್ಥ್ಯಗಳು, ಜೀವನವನ್ನು ನಿರಾಳವಾಗಿ ನಿರ್ವಹಿಸುವುದು ಸಣ್ಣ ಪರಿಣಾಮಗಳಷ್ಟೇ. ಸತ್ಯ ಸಂಗತಿ ನಿಧಾನವಾಗಿ ಬೆಳೆಯುತ್ತಿದೆ. ಅದು ಅರಳಿದಾಗಷ್ಟೇ ನಿಮಗೆ ತಿಳಿಯುತ್ತದೆ. ಅಲ್ಲಿಯವರೆಗೆ ನೀವು ಏನೂ ಆಗುತ್ತಿಲ್ಲವೆಂದು ಆಲೋಚಿಸುತ್ತೀರಿ.

ಇದು ನೀವು ನಿಮ್ಮ ಮನೆಯಲ್ಲಿ ಹೂಗಿಡವನ್ನು ನೆಟ್ಟಂತೆ. ಬೆಳೆಯುತ್ತಿದ್ದಂತೆ ಕೇವಲ ಎಲೆಗಳು ಮಾತ್ರ ಬರುತ್ತವೆ. ನಿಮ್ಮ ನೆರೆಹೊರೆಯವರು ಬಂದು ಹೇಳುತ್ತಾರೆ & "ಇದರಿಂದ ಏನೂ ಪ್ರಯೋಜನವಿಲ್ಲ. ನೀವು ಹೂಗಳು ಬರುತ್ತವೆ ಎಂದು ಹೇಳಿದ್ದಿರಿ, ಆದರೆ ಎಲೆಗಳು ಮಾತ್ರ ಬರುತ್ತಿವೆ. ಇದನ್ನು ಕಡಿದು ಕಟ್ಟಿಗೆ ಮಾಡೋಣ.' ನೀವು, "ನೋಡೋಣ, ನಾಳೆ ಬೆಳಗ್ಗೆ ಹೂ ಬಿಡಬಹುದು' ಎನ್ನುತ್ತೀರಿ. ಮರುದಿನವೂ ಏನೂ ಆಗಿರುವುದಿಲ್ಲ. ಮತ್ತೆ ನೀವು ಹೇಳುತ್ತೀರಿ "ಇನ್ನೊಂದು ದಿನ ನೋಡೋಣ.' ಮತ್ತೊಂದು ದಿನ, ಮತ್ತೊಂದು ದಿನ... ಹೀಗೆ ಕಾಲ ಕಳೆಯುತ್ತದೆ. ಈ ಮರಕ್ಕೆ ಹೂ ಬಿಡಲು ಎಷ್ಟು ಸಮಯ ಬೇಕು ಎಂಬುದನ್ನು ನೀವು ತಿಳಿಯದಿದ್ದರೆ, ನೀವು ಅದನ್ನು ನೂರಾರು ಬಾರಿ ಕಡಿದುಬಿಡುತ್ತಿದ್ದಿರಿ. ಆದರೆ ನೀವು ಅದನ್ನು ಕಾಳಜಿಯಿಂದ ಪೋಷಿಸುತ್ತ ಹೋದರೆ, ಗಿಡದ ಸೌಂದರ್ಯವು ಅದರ ಎಲೆಗಳು, ನೆರಳು ಅಥವಾ ಸ್ವಲ್ಪ ಆಮ್ಲಜನಕದಲ್ಲಲ್ಲದೆ, ಒಂದು ದಿನ ಅದು ಸಂಪೂರ್ಣವಾಗಿ ಅರಳಿದ ಹೂ ಬಿಟ್ಟಾಗ, ಅತ್ಯದ್ಭುತವಾಗಿ ಸುಂದರವಾಗಿರುವುದು ಎಂದು ನಿಮಗೆ ಅರಿವಾಗುತ್ತದೆ.