ಭಾರತದ ವಿರುದ್ಧ ಅಮೆರಿಕದ ಸುಂಕ ಸಮರ ನಿರ್ಣಾಯಕ ಹಂತಕ್ಕೆ ತಲುಪಿದ್ದು, ಇಂದಿನಿಂದ (ಬುಧವಾರ) ಶೇಕಡ 50ರಷ್ಟು ಸುಂಕ ಜಾರಿಗೆ ಬರಲಿದೆ. ಇದು ನಮ್ಮ ದೇಶದ ಮೇಲೆ ಅಲ್ಪಕಾಲೀನ ಪರಿಣಾಮ ಬೀರಬಹುದಾದರೂ, ದೀರ್ಘಕಾಲಿನ ಪರಿಣಾಮಗಳಾಗುವುದಿಲ್ಲ. ‘ಅಮೆರಿಕದ ತೆರಿಗೆ ಸಮರವನ್ನು ಎದುರಿಸಲು ಭಾರತ ಸನ್ನದ್ಧವಾಗಿದೆ’ ಎಂದು ಕೇಂದ್ರ ಸರ್ಕಾರ ಸ್ಪಷ್ಟಪಡಿಸಿದೆ. ತನ್ನ ಹಿತಾಸಕ್ತಿಗೆ ಪೂರಕವಾಗಿ ನಡೆದುಕೊಳ್ಳದಿದ್ದಲ್ಲಿ ಅಮೆರಿಕ ಬೆದರಿಕೆಯ ತಂತ್ರಗಳನ್ನು ಅನುಸರಿಸುತ್ತದೆ ಎಂಬುದಕ್ಕೆ ಇತಿಹಾಸ ಸಾಕ್ಷಿಯಾಗಿದೆ. ಈ ಹಿಂದೆ ಭಾರತಕ್ಕೆ ಗೋಧಿ ರಫ್ತನ್ನು ನಿಷೇಧಿಸಿತ್ತು. ಅಲ್ಲದೆ, ಭಾರತ ಅಣ್ವಸ್ತ್ರ ಪರೀಕ್ಷೆ ನಡೆಸಿದಾಗ ಹಲವು ಕ್ಷೇತ್ರಗಳಲ್ಲಿ ನಿಷೇಧ ವಿಧಿಸಿತು. ಆದರೆ, ಪ್ರತಿಬಾರಿಯೂ ಭಾರತ ಈ ಬೆದರಿಕೆತಂತ್ರಕ್ಕೆ ಮಣಿಯದೆ, ತನ್ನ ಸ್ವಂತಶಕ್ತಿಯಿಂದ ಮತ್ತೆ ಪುಟಿದೆದ್ದಿದೆ.
