ಚೀನಾ ಅಮೆರಿಕದ ಪ್ರತಿಸ್ಪರ್ಧಿ ರಾಷ್ಟ್ರ. ಅಮೆರಿಕದ ಧೋರಣೆಗಳು, ಟ್ರಂಪ್ ಸುಂಕನೀತಿಯ ಬಗ್ಗೆ ಸೃಷ್ಟಿಸಿರುವ ವಿವಾದದ ಬಿರುಗಾಳಿ ಹಾಗೂ ಪದೇಪದೆ ಬದಲಾಗುವ ನಿಲುವುಗಳಿಂದ ಸ್ವಾಭಾವಿಕವಾಗಿಯೇ ಜಾಗತಿಕ ಮಟ್ಟದಲ್ಲಿ ಚೀನಾದ ವರ್ಚಸ್ಸು ಹೆಚ್ಚತೊಡಗಿದೆ. ಮಾತ್ರವಲ್ಲ, ಚೀನಾ ಭಾರತದೊಂದಿಗೆ ಬಾಂಧವ್ಯವೃದ್ಧಿಗೆ ಮುಂದಾಗಿದೆ. ಚೀನಾ-ಭಾರತ-ರಷ್ಯಾ ಮೂರೂ ಒಟ್ಟಾಗಿ ನಿಂತರೆ, ತನ್ನ ಬೆದರಿಕೆ ತಂತ್ರಗಳು ನಡೆಯುವುದಿಲ್ಲ, ಅಮೆರಿಕದ ಮೇಲಿನ ಅವಲಂಬನೆಯೂ ಗಮನಾರ್ಹವಾಗಿ ಕಡಿಮೆಯಾಗುತ್ತದೆ ಎಂಬುದು ಟ್ರಂಪ್ಗೆ ಗೊತ್ತಿದೆ. ಮತ್ತೊಂದೆಡೆ ಇತ್ತೀಚಿನ ವರ್ಷಗಳಲ್ಲಿ ಶಸ್ತ್ರಾಸ್ತ್ರ ಖರೀದಿ ಮತ್ತು ಇತರ ಕ್ಷೇತ್ರದಲ್ಲಿ ಹೂಡಿಕೆಗಾಗಿ ಚೀನಾ ಮೇಲಿನ ಪಾಕ್ ಅವಲಂಬನೆ ಹೆಚ್ಚಿದೆ. ಇದು ಟ್ರಂಪ್ರನ್ನು ಚಿಂತೆಗೀಡು ಮಾಡಿದೆ. ಈ ಅವಲಂಬನೆ ತಗ್ಗಿಸಬೇಕಾದರೆ, ಪಾಕ್ನ್ನು ಹತ್ತಿರವಾಗಿಸಿಕೊಳ್ಳಬೇಕು ಎಂಬ ತಂತ್ರ ಅನುಸರಿಸುತ್ತಿದ್ದಾರೆ. ಅಂದರೆ, ಚೀನಾದ ಪ್ರಾಬಲ್ಯ ಅಥವಾ ವರ್ಚಸ್ಸು ಕುಗ್ಗಿಸಲು ಪಾಕ್ನ್ನು ದಾಳವಾಗಿ ಬಳಸುತ್ತಿದ್ದಾರೆ.
