40 ಕೋಟೆಗಳ ಮೇಲೆ ಸ್ವರಾಜ್ಯ ಧ್ವಜ: ಅಮ್ಮ ನೀಡಿದ ಸಂಸ್ಕಾರ, ಗುರುವಿನ ಮಾರ್ಗದರ್ಶನ, ಹೃದಯ ಮಂದಿರದಲ್ಲಿ ನೆಲೆಯಾಗಿದ್ದ ತುಳಜಾಭವಾವಿಯ ಕೃಪೆಯಿಂದ ಗುಡ್ಡಗಾಡು ಯುವಕರಲ್ಲಿ ಶಕ್ತಿತುಂಬಿ ಸೈನ್ಯ ರೂಪಿಸಿದ ಶಿವಾಜಿಯ ಯುವಸೇನೆಯ ಬಲವೇ ದೇಶದ ಮೇಲಿದ್ದ ಪ್ರೀತಿ, ಗೌರವಾದರಗಳು. ಈತ ಗೆಲ್ಲುತ್ತಿದ್ದ ಒಂದೊಂದೇ ಕೋಟೆಗಳು ಸುಲ್ತಾನನ ಆಧಿಪತ್ಯದ ಕೊನೆಗಾಲದ ಸಾಮೀಪ್ಯವನ್ನು ಸೂಚಿಸುತ್ತಿತ್ತು. ಶಿವಾಜಿ ಬೆಳೆದಂತೆ, ಸ್ವರಾಜ್ಯದ ಕನಸೂ ಬೆಳೆದು ಹೆಮ್ಮರವಾದರೆ ತಮಗೆ ಅಸ್ತಿತ್ವವಿರಲಾರದೆಂದು ಬಿಜಾಪುರದ ಸುಲ್ತಾನನು ಇತರ ಮುಸಲ್ಮಾನ ರಾಜರೊಂದಿಗೆ ಸೇರಿ ಶಹಾಜಿಯನ್ನು ಬಂಧನದಲ್ಲಿರಿಸಿ, ಶಿವಾಜಿ ಮತ್ತು ಬೆಂಗಳೂರಿನಲ್ಲಿದ್ದ ಸಹೋದರ ಸಂಭಾಜಿಯ ಮೇಲೆ ಏಕಕಾಲಕ್ಕೆ ದಾಳಿ ನಡೆಸಿದ. ಒಂದು ಕ್ಷಣ ವಿಚಲಿತರಾದ ಶಿವಾಜಿಗೆ ಪತ್ನಿ ಸಯೀಬಾಯಿ ಧೈರ್ಯತುಂಬುವ ಮಾತನ್ನಾಡಿ ಹುರಿದುಂಬಿಸಿ ವೀರ ಪರಂಪರೆಯ ಮರಾಠಾ ಇತಿಹಾಸದಲ್ಲಿ ತನ್ನ ಹೆಸರನ್ನು ಸ್ವರ್ಣಾಕ್ಷರದಲ್ಲಿ ಬರೆದಿಟ್ಟಳು. ಚತುರ ಯುದ್ಧತಂತ್ರಗಳಿಂದ ಗೆದ್ದು ಸುಲ್ತಾನನಿಗೆ ಭಯ ಹುಟ್ಟಿಸಿ ಶಹಾಜಿಯ ಗೌರವಪೂರ್ವಕ ಬಿಡುಗಡೆಗೆ ರಣನೀತಿ ಹೆಣೆದು ಸಫಲನಾದ. ಮಾವಳ ಯುವಕರ ದೇಹಬಲ, ರಾಷ್ಟ್ರಪ್ರೇಮ ಮತ್ತು ತನ್ನ ಚಾಣಾಕ್ಷಮತಿ ನಡೆಯಿಂದ ಕೇವಲ ಇಪ್ಪತ್ತೆಂಟರ ಹರೆಯದಲ್ಲಿ ಸುಮಾರು ನಲವತ್ತು ಕೋಟೆಗಳ ಮೇಲೆ ಸ್ವರಾಜ್ಯದ ಧ್ವಜವನ್ನು ನಭದೆತ್ತರಕ್ಕೆ ಹಾರಿಸಿ ಶತ್ರುಗಳನ್ನು ಮಾನಸಿಕವಾಗಿ ಅಧೀರನನ್ನಾಗಿಸಿದ ಶಿವಾಜಿ, ಸಮುದ್ರಮಾರ್ಗದಲ್ಲಿ ಭಾರತದೊಳಗೆ ಬಂದು ಪಾರಮ್ಯ ಮೆರೆಯುವ ಹುನ್ನಾರ ಮಾಡುತ್ತಿದ್ದ ಬಿಳಿಯರ ತಂತ್ರಗಳಿಗೆ ದೇಶ ಮಣಿಯ ಬಾರದೆಂದು ಸಮರ್ಥ ಸಮರಪಡೆ, ಸಮರನೌಕೆ ಮತ್ತು ಅಭೇದ್ಯ ಸಮುದ್ರಕೋಟೆಗಳನ್ನು ಕಟ್ಟಿ ಕರಾವಳಿಯ ರಕ್ಷೆಗೆ ಬದ್ಧರಾದರು.
