ಒಬಾಮ ಜಾಗತಿಕವಾಗಿ ಅಮೆರಿಕದ ರಕ್ಷಣಾ ಹಿತಾಸಕ್ತಿಗಳ ಬಗ್ಗೆ ಹಲವಾರು ಋಣಾತ್ಮಕ ನಡೆಗಳನ್ನು ಪ್ರದರ್ಶಿಸಿದರೆ ಉಪಾಧ್ಯಕ್ಷ ಜೋ ಬೈಡೆನ್ ಅವರದು ಇನ್ನೂ ಅಧ್ವಾನ. ಸೆನೇಟರ್ ಆಗಿದ್ದಾಗಲೇ ಮುಷರ್ರಫ್ಗೆ ಸಲಹೆಗಳನ್ನು ಕೊಡುವ ಮೂಲಕ ಪಾಕಿಸ್ತಾನದ ಆಂತರಿಕ ರಾಜಕಾರಣದಲ್ಲಿ ಸಕ್ರಿಯ ಪಾತ್ರ ವಹಿಸುತ್ತಿದ್ದ ಬೈಡೆನ್ ರಿಪಬ್ಲಿಕನ್ ಸೆನೇಟರ್ ರಿಚರ್ಡ್ ಲ್ಯೂಗರ್ ಜತೆಗೂಡಿ, ಪಾಕಿಸ್ತಾನಕ್ಕೆ ಅಮೆರಿಕ ಅದಾಗಲೇ ನೀಡುತ್ತಿದ್ದ ಬೃಹತ್ ಮೊತ್ತದ ಸೇನಾ ಸಹಾಯಧನದ ಜತೆಗೆ ವರ್ಷಕ್ಕೆ 1.5 ಬಿಲಿಯನ್ ಡಾಲರ್ಗಳ ಆರ್ಥಿಕ ಸಹಾಯಧನವನ್ನೂ ನೀಡುವ ವ್ಯವಸ್ಥೆ ಮಾಡಿದ್ದರು. ಅದಕ್ಕಾಗಿಯೇ ಅವರಿಬ್ಬರಿಗೂ ಪಾಕಿಸ್ತಾನ ತನ್ನ ಎರಡನೆಯ ಅತ್ಯುನ್ನತ ನಾಗರಿಕ ಗೌರವ ‘ಹಿಲಾಲ್-ಎ-ಪಾಕಿಸ್ತಾನ್’ (ಪಾಕಿಸ್ತಾನದ ಚಂದ್ರಮ) ನೀಡಿತ್ತು! ಬೈಡೆನ್ರ ಅವಾಂತರಗಳು ಇಷ್ಟಕ್ಕೇ ನಿಲ್ಲುವುದಿಲ್ಲ. ಸತತ ಹತ್ತು ವರ್ಷಗಳವರೆಗೆ ಒಸಾಮಾ ಬಿನ್ ಲಾಡೆನ್ಗಾಗಿ ಅಫ್ಘಾನಿಸ್ತಾನವನ್ನು ಜಾಲಾಡಿದ ಅಮೆರಿಕನ್ ಸೇನೆ ಕೊನೆಗೆ ಅವನನ್ನು 2011ರಲ್ಲಿ ಪಾಕಿಸ್ತಾನದ ರಾಜಧಾನಿಗೆ ಹತ್ತಿರದ ಅಬ್ಬೊಟಾಬಾದ್ನಲ್ಲೇ, ಪಾಕ್ ಸೇನೆಯ ರಕ್ಷಣೆಯಲ್ಲೇ, ಪತ್ತೆಹಚ್ಚಿ; ಕೊಂದೂಹಾಕಿತು. ಇದು ‘ಹಿಲಾಲ್-ಎ-ಪಾಕಿಸ್ತಾನ್’ ಅಲಂಕೃತ ಅಮೆರಿಕನ್ ಉಪಾಧ್ಯಕ್ಷರಿಗೆ ಸಮ್ಮತವಾಗಲಿಲ್ಲ. ತಮ್ಮ ಸೇನೆಯ ಕಾರ್ಯಾಚರಣೆಯನ್ನು ಅವರು ಖಂಡಿಸಿದರು! ಅಮೆರಿಕದಿಂದ ಬಿಲಿಯನ್ಗಟ್ಟಲೆ ಹಣವನ್ನು ಕೊಳ್ಳೆಹೊಡೆದು, ಅಮೆರಿಕದ ಪರಮವೈರಿಯನ್ನು ತನ್ನಲ್ಲಿಯೇ ಇಟ್ಟುಕೊಂಡು ಸಾಕುತ್ತಿದ್ದ ಪಾಕಿಸ್ತಾನಕ್ಕೆ ಬುದ್ಧಿ ಕಲಿಸುವ ಯಾವುದೇ ಕ್ರಮಕ್ಕೆ ಒಬಾಮ ಆಡಳಿತ ಮುಂದಾಗದಿದ್ದುದಕ್ಕೆ ಬೈಡೆನ್ರ ವಿರೋಧವೂ ಬಹುಪಾಲು ಕಾರಣ. ಇದರ ಜತೆಗೆ, ಕರಾಚಿ ಬಂದರಿನಿಂದ ಪಾಕ್ ನೆಲದ ಮೂಲಕ ನ್ಯಾಟೋ ಸೇನೆ ಮತ್ತು ಶಸ್ತ್ರಾಸ್ತ್ರಗಳು ಅಫ್ಘಾನಿಸ್ತಾನ ತಲುಪದಂತೆ ಪಾಕಿಸ್ತಾನ ತಡೆಯೊಡ್ಡಿದಾಗ ಅದರ ವಿರುದ್ಧ ಕಠಿಣ ಕ್ರಮಗಳನ್ನು ಕೈಗೊಳ್ಳಲಾಗದ ನಿರ್ವೀರ್ಯತೆಯನ್ನೂ ಒಬಾಮ ಸರ್ಕಾರ ಪ್ರದರ್ಶಿಸಿತು. ಇದೆಲ್ಲವೂ ತಾಲಿಬಾನ್ ಬಲಗೊಳ್ಳಲು ಸಹಕಾರಿಯಾಯಿತು. ಪರಿಣಾಮವಾಗಿ ಒಬಾಮ ಅಧಿಕಾರ ತ್ಯಜಿಸುವ ಹೊತ್ತಿಗೆ ಅಫ್ಘಾನಿಸ್ತಾನದಲ್ಲಿ ಅಮೆರಿಕ ಮಾಡಿದ್ದೆಲ್ಲವೂ ಹೊಳೆಯಲ್ಲಿ ಹುಣಿಸೆಹಣ್ಣು ತೇಯ್ದಂತಾಗಿ ಅಫ್ಘನ್ ರಾಜಕಾರಣದಲ್ಲಿ ನಿರ್ಣಾಯಕ ಪಾತ್ರ ವಹಿಸುವ ಮಟ್ಟಕ್ಕೆ ತಾಲಿಬಾನ್ ಬೆಳೆದುನಿಂತಿತ್ತು.
