ದೇಶದಲ್ಲಿ ವಿಪುಲವಾದ ರಾಮಾಯಣ ಸಾಹಿತ್ಯವಿದ್ದರೂ ಅಧ್ಯಾತ್ಮ ರಾಮಾಯಣಕ್ಕೆ ಸಿಗಬೇಕಾದ ಪ್ರಾಮುಖ್ಯತೆ ದೊರೆಯದಿರುವುದು ದುರದೃಷ್ಟಕರ. ಆಧ್ಯಾತ್ಮ ರಾಮಾಯಣ, ಉತ್ತರ ಭಾರತದಲ್ಲಿ ಹೆಚ್ಚು ಜನಜನಿತವಾಗಿದ್ದು, ರಾಮಭಕ್ತರಲ್ಲಿ ಮಾತ್ರವಲ್ಲದೆ ವೇದಾಂತಿಗಳಲ್ಲೂ ಅದ್ಭುತವಾದ ಮನ್ನಣೆ ಗಳಿಸಿದೆ. ರಾಮನೇ ಪರಬ್ರಹ್ಮ, ಸೀತೆಯೇ ಮಾಯಾಶಕ್ತಿ ಅಥವಾ ಪ್ರಕೃತಿ ಎಂಬುದೇ ಈ ರಾಮಾಯಣದ ಸಾರ ಸರ್ವಸ್ವ. ರಾಮನೇ ಪರಬ್ರಹ್ಮ ಎನ್ನುವುದನ್ನು ಮುನಿಗಳು, ದೇವತೆಗಳು, ಭಕ್ತರೇ ಅಲ್ಲದೇ ರಾವಣನೂ ಪರಿಗಣಿಸಿರುವುದು ಒಂದು ವಿಶೇಷ. "ವಾಲ್ಮೀಕಿ ರಾಮಾಯಣ' ನವರಸಭರಿತವಾಗಿ ಧರ್ಮ ಪ್ರಧಾನವಾಗಿ ಕಂಡುಬಂದರೆ, "ಅಧ್ಯಾತ್ಮರಾಮಾಯಣ' ಆಧ್ಯಾತ್ಮಿಕ ಗ್ರಂಥವೇ ಆಗಿದೆ ಎನ್ನಬಹುದು. ಕರ್ಮಕಾಂಡದ ಸಾರ ವಾಲ್ಮೀಕಿ ರಾಮಾಯಣವಾದರೆ, ಾನಕಾಂಡದ ಸಾರ ಅಧ್ಯಾತ್ಮರಾಮಾಯಣ. ಗ್ರಂಥದ ಪ್ರಥಮ ಭಾಗದಲ್ಲಿ ಬಾಲಕಾಂಡ, ಅಯೋಧ್ಯಾಕಾಂಡ, ಅರಣ್ಯಕಾಂಡಗಳಿದ್ದರೆ ದ್ವೀತಿಯ ಭಾಗದಲ್ಲಿ ಕಿಷ್ಕಿಂಧಾಕಾಂಡ, ಸುಂದರಕಾಂಡ ಹಾಗೂ ಯುದ್ಧಕಾಂಡಗಳಿವೆ. ತೃತೀಯ ಭಾಗದಲ್ಲಿ ಯುದ್ಧಕಾಂಡ ಮುಂದುವರಿದಿದ್ದು ನಂತರ ಉತ್ತರಕಾಂಡವಿದೆ. ಮಾಹಾತ್ಮ್ಯಾ ಸರ್ಗದಿಂದ ಆರಂಭವಾಗಿ ಉತ್ತರಕಾಂಡದ ಒಂಬತ್ತನೆ ಸರ್ಗದಲ್ಲಿ ರಾಮನು ಪರಮಪದಕ್ಕೆ ಹೋಗುವಲ್ಲಿಯವರೆಗೆ ಗ್ರಂಥ ವ್ಯಾಪಿಸಿದೆ. ಗ್ರಂಥವನ್ನು ಜಯಚಾಮರಾಜ ಒಡೆಯರ್ ಅವರಿಗೆ ಅರ್ಪಿಸಲಾಗಿದೆ.
