ಟಲಿಯ ತೈಲ ಟ್ಯಾಂಕರ್ ‘ಎನ್ರಿಕಾ ಲೆಕ್ಸಿ’ಯಲ್ಲಿ ಇದ್ದವರು 2012 ಫೆಬ್ರವರಿ 15ರಂದು ಹಾರಿಸಿದ ಗುಂಡು ತಾಗಿ ಭಾರತದ ಇಬ್ಬರು ಮೀನುಗಾರರಾದ ಅಂಜೀಶ್ ಬಿಂಕಿ ಮತ್ತು ವ್ಯಾಲೆಂಟೈನ್ ಜೆಲಸ್ಟೈನ್ ಮೃತಪಟ್ಟರು. ಅವರು ‘ಸೈಂಟ್ ಅಂತೋನಿ’ ಎಂಬ ನಾವೆಯಲ್ಲಿ ಮೀನುಗಾರಿಕೆ ನಡೆಸುತ್ತಿದ್ದರು. ಭಾರತ ಕರಾವಳಿಯ ಲಕ್ಷದ್ವೀಪ ಸಮುದ್ರದಲ್ಲಿ ಈ ಘಟನೆ ನಡೆದಿತ್ತು. ಎನ್ರಿಕಾ ಲೆಕ್ಸಿಯನ್ನು ಸುತ್ತುವರಿದ ಭಾರತೀಯ ಕರಾವಳಿ ಕಾವಲು ಪಡೆ, ಅದನ್ನು ಕೊಚ್ಚಿಯ ಬಂದರಿನಲ್ಲಿ ಲಂಗರು ಹಾಕುವಂತೆ ಮಾಡಿತು. ಗುಂಡು ಹಾರಿಸಿದ ಆರೋಪಿಗಳಾದ ಇಟಲಿಯ ನಾವಿಕರಾದ ಮಸ್ಸಿಮಿಲಾನೊ ಲಾಟೊರೆ ಮತ್ತು ಸಾಲ್ವಟೊರ್ ಗೈರೋನ್ರನ್ನು ಕಾನೂನು ಕ್ರಮಕ್ಕೆ ಒಳಪಡಿಸುವುದು ಇದರ ಉದ್ದೇಶವಾಗಿತ್ತು. ಈ ಪ್ರಕರಣ ಭಾರತ ಮತ್ತು ಇಟಲಿ ನಡುವೆ ರಾಜತಾಂತ್ರಿಕ ಬಿಕ್ಕಟ್ಟಿಗೆ ಕಾರಣವಾಯಿತು. ಭಾರತದ ಜಲಸೀಮೆಯಲ್ಲಿ ಘಟನೆ ನಡೆದಿರುವುದರಿಂದ ಭಾರತೀಯ ಕಾನೂನಿನ ಪ್ರಕಾರ ಇಟಲಿ ನಾವಿಕರನ್ನು ಶಿಕ್ಷಿಸಬಹುದು ಎಂದು ಸುಪ್ರೀಂ ಕೋರ್ಟ್ ಹೇಳಿತು. ಆದರೆ ಭಾರತದ ಈ ವಾದವನ್ನು ಇಟಲಿಯ ವಿದೇಶಾಂಗ ಸಚಿವಾಲಯ ತಿರಸ್ಕರಿಸಿತು. ಅಂತಾರಾಷ್ಟ್ರೀಯ ಜಲ ಪ್ರದೇಶದಲ್ಲಿ ಘಟನೆ ನಡೆದಿದೆ. ಯಾವ ನೌಕೆ ತನ್ನ ದೇಶದ ಧ್ವಜವನ್ನು ಹೊಂದಿರುತ್ತದೋ, ಯಾವುದೇ ವಿವಾದದಲ್ಲಿ ಆ ದೇಶದ ಕ್ರಿಮಿನಲ್ ಕಾನೂನಿನ ವ್ಯಾಪ್ತಿ ಅನ್ವಯವಾಗುತ್ತದೆ ಎನ್ನುವುದು ಇಟಲಿಯ ಅಭಿಪ್ರಾಯವಾಗಿತ್ತು. ಅಲ್ಲದೆ ತನ್ನ ನೌಕಾ ಪಡೆಯ ನಾವಿಕರು ರಕ್ಷಣಾ ಕಾರ್ಯದಲ್ಲಿ ತೊಡಗಿದ್ದರು. ಶಂಕಿತ ಕಡಲುಗಳ್ಳತನದ ವಿರುದ್ಧ ರಾಷ್ಟ್ರೀಯ ಆಸ್ತಿಯನ್ನು ರಕ್ಷಿಸುವಲ್ಲಿ ನಿರತರಾಗಿದ್ದರು. ಹೀಗಾಗಿ ಅವರಿಗೆ ಬೇರೊಂದು ದೇಶದಲ್ಲಿ ಕ್ರಿಮಿನಲ್ ಶಿಕ್ಷೆಯಿಂದ ವಿನಾಯಿತಿ ಇರುತ್ತದೆ ಎಂಬುದೂ ಅದರ ವಾದ.
