ಪ್ರಶಾಂತ್ಗೆ ಶೀತಲ್ ಈ ಸುದ್ದಿಯನ್ನು ತಿಳಿಸಿದಾಗ ಆತ ಸಂತೋಷ ವ್ಯಕ್ತಪಡಿಸಿ ‘ನೀನು ಮಗುವಿನ ತಾಯಿಯಾಗುವಷ್ಟರಲ್ಲಿ ನಾನು ನನ್ನ ತಂದೆತಾಯಿಯರಿಗೆ ನಮ್ಮ ಸಂಬಂಧದ ಬಗ್ಗೆ ಮನವರಿಕೆ ಮಾಡುತ್ತೇನೆ, ನನಗೆ ಇನ್ನೊಂದು ವರ್ಷದವರೆವಿಗೆ ರಜೆ ದೊರೆಯದಿರುವ ಕಾರಣ ನಾನು ಭಾರತಕ್ಕೆ ಮರಳಿದ ನಂತರ ಮದುವೆಯಾಗೋಣ, ಮದುವೆಗೆ ಮುಂಚೆಯೇ ಮಗು ಹುಟ್ಟಿತು ಎಂದು ಜನರು ಮಾತನಾಡಬಹುದು, ಅದರ ಬಗ್ಗೆ ನೀನೇನೂ ತಲೆಕೆಡಿಸಿಕೊಳ್ಳಬೇಡ, ನಿನ್ನ ತಾಯಿಯನ್ನು ವಿಶ್ವಾಸಕ್ಕೆ ತೆಗೆದುಕೊಳ್ಳಬೇಕಷ್ಟೇ’ ಎಂದ. ಆತನ ಮಾತುಗಳಿಂದ ಶೀತಲ್ ಸಮಾಧಾನಗೊಂಡಳು. ಹೇಗಿದ್ದರೂ ಪ್ರಶಾಂತ ಮದುವೆಯಾಗುವುದಾಗಿ ಆಶ್ವಾಸನೆ ನೀಡಿರುವುದರಿಂದ ತನ್ನ ತಾಯಿಯನ್ನು ಮದುವೆಗೆ ಒಪ್ಪಿಸಿದರೆ ಸಾಕು ಎಂದು ರ್ತಸಿದಳು. ಮುಂದಿನ ತಿಂಗಳು ಊರಿಗೆ ಹೋದಾಗ ಪ್ರಶಾಂತ್ ಜತೆಗಿನ ತನ್ನ ಸಂಬಂಧ ಮತ್ತು ತಾನು ಗರ್ಭಿಣಿಯಾಗಿರುವ ಬಗ್ಗೆ ತಾಯಿಗೆ ತಿಳಿಸಿದಳು. ಈ ಸುದ್ದಿಯನ್ನು ಕೇಳಿ ರಮಾ ಕೆಂಡಾಮಂಡಲವಾಗಿ ಕುಟುಂಬದ ಮರ್ಯಾದೆಯನ್ನು ಹರಾಜಿಗೆ ಹಾಕಿರುವೆ ಎಂದು ಮಗಳನ್ನು ನಿಂದಿಸಿದಳು. ‘ಮದುವೆಗೆ ಮುಂಚೆ ನೀನು ಗರ್ಭಿಣಿಯಾಗಿರುವುದು ಊರಲ್ಲಿ ಜಾಹೀರಾದರೆ ಜನರು ನಮ್ಮ ಬಗ್ಗೆ ನೂರಾರು ಮಾತನಾಡುತ್ತಾರೆ, ನೀನು ಕೂಡಲೇ ಗರ್ಭಪಾತ ಮಾಡಿಸಿಕೊ’ ಎಂದು ಒತ್ತಡ ಹೇರಲಾರಂಭಿಸಿದಳು. ಮಗುವಿನ ಜನನದ ನಂತರ ತಾನು ಪ್ರಶಾಂತ್ನನ್ನು ಲಗ್ನವಾಗುವುದರಿಂದಲೂ ಈ ಮಗುವಿನ ತಂದೆಯಾಗಿರುವವನೇ ಗರ್ಭವನ್ನು ಮುಂದುವರಿಸಲು ಒಪ್ಪಿರುವುದರಿಂದಲೂ ಗರ್ಭಪಾತ ಮಾಡಿಸಿಕೊಳ್ಳುವುದಿಲ್ಲ ಎಂದು ಶೀತಲ್ ಖಡಾಖಂಡಿತವಾಗಿ ಹೇಳಿದಾಗ ರಮಾಗೆ ಏನು ಮಾಡುವುದೆಂದು ತೋಚಲಿಲ್ಲ.
