ನಾನು ಈ ಬಗ್ಗೆ ಯೋಚಿಸುತ್ತಿರುವಾಗ ಢಾಕಾದಲ್ಲಿ ನಮ್ಮ ನೆರೆಮನೆಯಲ್ಲಿದ್ದ ಹೃದಯ್ ಎನ್ನುವವನು ಕರೆ ಮಾಡಿದ. ಆತನಿಗೆ ನನ್ನ ಫೋನ್ ನಂಬರ್ ಹೇಗೆ ಸಿಕ್ಕಿತೋ ಗೊತ್ತಿಲ್ಲ. ತಾನು ಬೆಂಗಳೂರಿನಲ್ಲಿರುವುದಾಗಿ ತಿಳಿಸಿದ ಆತ ನನ್ನೊಡನೆ ತುರ್ತಾಗಿ ಮಾತನಾಡುವುದಿದೆ ಎಂದು ಬೆಂಗಳೂರಿಗೆ ಬರಹೇಳಿದ. ನಾನು ಹಿಂಜರಿದಾಗ ತಾನೇ ವಿಮಾನದ ಟಿಕೆಟ್ ಕಳುಹಿಸಿದ. ನಾನು ಬೆಂಗಳೂರು ತಲುಪಿದಾಗ ವಿಮಾನ ನಿಲ್ದಾಣದಲ್ಲಿಯೇ ಹೃದಯ್ ಎದುರುಗೊಂಡು ಹೋಟೆಲೊಂದಕ್ಕೆ ಕರೆದೊಯ್ದ. ಬಹಳ ವರ್ಷಗಳ ನಂತರ ಭೇಟಿಯಾಗುತ್ತಿದ್ದುದರಿಂದ ಸಾಕಷ್ಟು ಮಾತನಾಡಿದೆವು. ನೀನು ಭಾರತಕ್ಕೆ ಹೇಗೆ ಬಂದೆ, ಇಲ್ಲೇನು ಮಾಡುತ್ತಿರುವೆ ಇವೆಲ್ಲವೂ ನನಗೆ ತಿಳಿದಿದೆ. ನಾನು ನಿನಗೆ ಸಹಾಯ ಮಾಡುವೆ ಎಂದ. ಶಿರಾಜ್ ಎನ್ನುವನನ್ನು ತನ್ನ ಗೆಳೆಯನೆಂದು ಪರಿಚಯಿಸಿ, ನೀನು ಶಿರಾಜ್ನ ತಂಡದಲ್ಲಿ ವೇಶ್ಯಾವೃತ್ತಿ ಮುಂದುವರಿಸು, ಕೈತುಂಬಾ ಹಣ ಕೊಡಿಸುವೆ ಎಂದ. ಈ ದಂಧೆ ಮಾಡದಿರಲು ನಾನು ತೀರ್ವನಿಸಿರುವೆ, ಎರಡು ತಿಂಗಳ ವೃತ್ತಿ ಮಾಡಿಯೂ ಪಿಂಕಿ ಸಂಬಳವನ್ನೇ ಕೊಡಲಿಲ್ಲ ಎಂದುತ್ತರಿಸಿದೆ. ಒಂದೇ ತಿಂಗಳು ವೇಶ್ಯಾವೃತ್ತಿ ಮುಂದುವರಿಸು, ಶಿರಾಜ್ನಿಂದ ಸಂಬಳವಲ್ಲದೆ, ಪಿಂಕಿಯ ಬಾಕಿಯನ್ನೂ ಕೊಡಿಸುತ್ತೇನೆ ಎಂದ. ಇದಕ್ಕೊಪ್ಪಿದ ನಾನು ಪಿಂಕಿಯ ಮನೆಯಿಂದ ಓಡಿಹೋಗಿ ಶಿರಾಜ್ನ ತಂಡಕ್ಕೆ ಸೇರಿದೆ. ಆತ ಹೇಳಿದ ಹೋಟೆಲ್ನಲ್ಲಿ ಸೆಕ್ಸ್ ಕೆಲಸ ಮಾಡುತ್ತಿದ್ದಾಗ ಪೊಲೀಸರು ದಾಳಿ ನಡೆಸಿ ನನ್ನನ್ನು ಬಂಧಿಸಿ ಮಹಿಳಾ ನಿಲಯಕ್ಕೆ ಕಳುಹಿಸಿದರು. ಶಿರಾಜ್ ನನಗೆ ಜಾಮೀನು ಕೊಡಿಸಿ ಹೈದರಾ ಬಾದ್ಗೆ ಸೆಕ್ಸ್ ಕೆಲಸಕ್ಕಾಗಿ ಹೋಗಲು ತಿಳಿಸಿದ. ನಾನು ಒಪ್ಪದಿದ್ದಾಗ ಥಳಿಸಿದ. ವಿಧಿಯಿಲ್ಲದೆ ಹೈದರಾಬಾದ್ಗೆ ಹೋದೆ. ವೇಶ್ಯಾವೃತ್ತಿಯಿಂದ ಮುಕ್ತಳಾಗಬೇಕೆಂದು ನಾನು ಹೈದರಾಬಾದಿನಿಂದಲೇ ಶ್ಯಾಮ್ನ್ನು ಸಂರ್ಪಸಿದೆ. ಆತ ಕಲ್ಲಿಕೋಟೆಗೆ ಬರಹೇಳಿದಾಗ ಅಲ್ಲಿಗೆ ಹೋದೆ. ಶ್ಯಾಮ್ ತನ್ನ ಸ್ನೇಹಿತ ಲಕ್ಷ್ಮಿಲಾಲ್ ಎನ್ನುವವನ ಮೂಲಕ ನನಗೆ ವಾಸಿಸಲು ಮನೆಯೊಂದನ್ನು ಕೊಡಿಸಿ ಒಂದೆರಡು ತಿಂಗಳಲ್ಲೇ ಲಗ್ನವಾಗುವುದಾಗಿ ಹೇಳಿದ.
