ನನ್ನ ಮಾತಾಪಿತರಿಗೆ ಗಂಡು ಸಂತಾನವಿರದ ಕಾರಣ ತಂದೆಯ ಸೂಚನೆಯ ಮೇರೆಗೆ ಸೀತಾರಾಂ ನನ್ನ ತವರುಮನೆಯಲ್ಲಿಯೇ ವಾಸವಾಗಿದ್ದ. ಮದುವೆಯಾದ ವರ್ಷದ ನಂತರ ನನಗೆ ಹೆಣ್ಣು ಮಗು ಜನಿಸಿದಾಗ, ಗಂಡನಿಗೆ ನಾವಿಲ್ಲಿರುವುದು ಬೇಡವೆಂದು ಹೇಳಿ ಬೇರೆ ಕಡೆ ಮನೆ ಮಾಡಲು ಸೂಚಿಸಿದೆ. ಸೀತಾರಾಂ ಬೇರೆ ಬಡಾವಣೆಯಲ್ಲಿ ಮನೆಯನ್ನು ಬಾಡಿಗೆಗೆ ತೆಗೆದುಕೊಂಡ. ನಾವು ಅಲ್ಲಿಯೇ ವಾಸಮಾಡತೊಡಗಿದೆವು. ಕೆಲವು ತಿಂಗಳ ನಂತರ ಆತ ತನಗೆ ವ್ಯವಹಾರದಲ್ಲಿ ನಷ್ಟವಾಗಿರುವ ಕಾರಣ ನನ್ನ ತಂದೆಯಿಂದ ಒಂದು ಲಕ್ಷ ರೂಗಳನ್ನು ಸಾಲವಾಗಿ ತಂದು ಕೊಡಲು ಕೋರಿದ. ‘ನಮ್ಮ ಮದುವೆಯ ಸಂದರ್ಭದಲ್ಲಿ ನಿನಗೆ ಮೂರು ಲಕ್ಷ ರೂ. ನಗದು ಹಣ, ಚಿನ್ನದ ಸರ, ಉಂಗುರ, ಮೋಟರ್ ಸೈಕಲ್ ಕೊಡಿಸಿರುವ ಕಾರಣ ನನ್ನ ತಂದೆಗೆ ಈಗ ಹಣ ಕೊಡಲು ಸಾಧ್ಯವಾಗದು’ಎಂದು ನಾನು ಉತ್ತರಿಸಿದೆ.
