ಪರೀಕ್ಷೆಯ ಹಿಂದೆ... ಮುಂದೆ; ಗಡಿಬಿಡಿಗಳಿಂದ ಮುಕ್ತಗೊಳ್ಳಲು ಏನು ಮಾಡಬೇಕು? ಇಲ್ಲಿವೆ ಟಿಪ್ಸ್

ಪರೀಕ್ಷೆಗೆ ಇನ್ನು ಕೆಲವೇ ವಾರಗಳು ಉಳಿದಿವೆ. ಪರೀಕ್ಷೆ ಹತ್ತಿರ ಬರುತ್ತಿದ್ದಂತೆಯೇ ಆತಂಕ ಸಹಜ. ಮೊದಲು ಓದುವ ಆತಂಕವಾದರೆ, ಪರೀಕ್ಷೆಯ ಸಮಯದಲ್ಲಿ ಶಾಲೆಗೆ ಹೋಗುವ ಗಡಿಬಿಡಿ. ಅಂಥ ಆತಂಕ, ಗಡಿಬಿಡಿಗಳಿಂದ ಮುಕ್ತಗೊಳ್ಳಲು ಏನು ಮಾಡಬೇಕು? ಇಲ್ಲಿವೆ ನಿಮಗಾಗಿ ಕೆಲವು ಟಿಪ್ಸ್.

ಈಗಿನ್ನೂ ಪರೀಕ್ಷೆಗೆ 2-3 ವಾರಗಳಿವೆಯಲ್ಲವೆ? ಈ ಸಮಯದಲ್ಲಿ ಏನು ಮಾಡಬೇಕು ಎನ್ನುವುದನ್ನು ಮೊದಲು ನೋಡೋಣ.

• ಪ್ರತಿ ವಿಷಯವನ್ನು ಎಳೆಎಳೆಯಾಗಿ ಅಭ್ಯಸಿಸಬೇಕು. ಅನೇಕ ಬಾರಿ ಅದನ್ನು ಪುನರಾವರ್ತನೆ ಮಾಡುತ್ತಿರಬೇಕು. ಪುನರಾವರ್ತನೆಯ ಸಮಯದಲ್ಲಿ ಅತ್ಯಂತ ಮಹತ್ವದ ಅಂಶಗಳಿಗೆ ಹೆಚ್ಚು ಒತ್ತು ಕೊಡುವುದು ಸೂಕ್ತ.
• ಈ ಹಿಂದೆ ನಡೆದ ಪರೀಕ್ಷೆಗಳ ಪ್ರಶ್ನೆಪತ್ರಿಕೆಗಳನ್ನು ಸಂಗ್ರಹಿಸಿ, ಪರೀಕ್ಷಾ ನಿಯಮದಂತೆ ಅವಕ್ಕೆ ಉತ್ತರ ಬರೆಯಿರಿ. ಆಗ ಆಗುವ ಅನುಭವದ ಆಧಾರದ ಮೇಲೆ ಉತ್ತರ ಬರೆವ ವಿಧಾನವನ್ನು ಬೇಕಾದಂತೆ ಬದಲಾಯಿಸಿ ಕೊಳ್ಳಬಹುದು.
• ಪಠ್ಯಕ್ಕೆ ಮಾತ್ರ ಮೀಸಲಾಗಿರದೆ ಇತರ ಪತ್ರಿಕೆಗಳನ್ನು ಗಮನಿಸಬೇಕು. ಅವುಗಳಲ್ಲಿ ಪಠ್ಯಕ್ಕೆ ಪೂರಕವಾದ ನೂತನ ಮಾಹಿತಿಗಳು, ಸಂಶೋಧನೆಗಳು ಬಂದಿದ್ದಲ್ಲಿ ಟಿಪ್ಪಣಿ ಮಾಡಿಕೊಳ್ಳಬೇಕು. ಅಂಥ ಅಂಶಗಳನ್ನು ಪರೀಕ್ಷೆಯಲ್ಲಿ ಬಳಸಿದರೆ ಹೆಚ್ಚು ಪ್ರಭಾವ ಬೀರಬಹುದು.

ಪರೀಕ್ಷೆಯ ಹಿಂದಿನ ದಿನ ಹೀಗಿರಲಿ

• ಮಾರನೆಯ ದಿನ ನಡೆಯುವ ಪರೀಕ್ಷೆಯ ವಿಷಯದ ನೋಟ್ಸ್ ಅನ್ನು ಅವಲೋಕನ ಮಾಡಿಕೊಳ್ಳಬೇಕು. ಅದರಲ್ಲಿನ ಕೀ ಪಾಯಿಂಟ್ಸ್​ಗಳತ್ತ ಹೆಚ್ಚು ಗಮನಹರಿಸಿರಿ.
• ಹಿಂದಿನ ದಿನ ವಿಷಯವನ್ನು ಆಳವಾಗಿ ಓದುವುದು ಒಳ್ಳೆಯದಲ್ಲ. ಅದರಿಂದ ಸಮಯ ಬೇಗ ಮುಗಿದುಹೋಗುತ್ತದೆ. ಸೂತ್ರದಂತಹ ಬಹು ಮುಖ್ಯ ಎನಿಸುವ ಅಂಶಗಳನ್ನು ಗುರುತುಹಾಕಿಕೊಳ್ಳಬೇಕು. ಅವನ್ನು ಸಾಧ್ಯವಾದಷ್ಟು ವೇಗವಾಗಿ ನೋಟ್ಸ್ ಮಾಡಲು ಪ್ರಯತ್ನಿಸುವುದು.
• ಗ್ರಾಫ್, ನಕ್ಷೆ ಯಂತಹ ಅಂಶಗಳಿದ್ದರೆ ಅವುಗಳನ್ನು ಎಚ್ಚರಿಕೆಯಿಂದ ಗಮನಿಸಿರಿ. ಸಾಧ್ಯವಾದಷ್ಟು ಮುಖ್ಯಾಂಶಗಳನ್ನು ಅವಲೋಕನ ಮಾಡಿಕೊಳ್ಳಬೇಕು.
• ಪುನರಾವರ್ತನೆಯು ಆತ್ಮಶಕ್ತಿಯನ್ನು ಹೆಚ್ಚಿಸುತ್ತದೆ. ನನಗೆ ಇಷ್ಟು ಅಂಶಗಳು ಗೊತ್ತಿವೆ ಜತೆಗೆ ಅರ್ಥಮಾಡಿಕೊಂಡಿದ್ದೇನೆ ಎಂಬ ನಂಬಿಕೆ ಬಂದರೆ ಸಾಕು.

ಪರೀಕ್ಷೆಯ ಹಿಂದಿನ ರಾತ್ರಿ

• ಪ್ರತಿ ಪ್ರಶ್ನೆಗೆ ಎಷ್ಟು ಮತ್ತು ಹೇಗೆ ಉತ್ತರ ಬರೆದರೆ ಸೂಕ್ತ ಎಂಬುದನ್ನು ಅಳೆದು-ತೂಗಿ ನೋಡಿಕೊಳ್ಳಿರಿ.
• ನಾಳೆಗೆ ಬೇಕಾದ ಉಡುಪು ಮತ್ತು ಪರೀಕ್ಷಾ ಸಾಮಗ್ರಿಗಳನ್ನು ಸಿದ್ಧಪಡಿಸಿಕೊಳ್ಳಬೇಕು. ಏನು ಬೇಕೋ ಅದನ್ನು ತಿಂದು ಹೊಟ್ಟೆ ಕೆಡಿಸಿಕೊಳ್ಳದೆ, ಉತ್ತಮವಾದ ಮಿತ ಆಹಾರ ಸೇವನೆ ಆರೋಗ್ಯಕರ.
• ಪರೀಕ್ಷೆಗೆ ಸಾವಕಾಶವಾಗಿ ಸಿದ್ಧಗೊಳ್ಳಲು ಬೇಕಾದ ಸಮಯವನ್ನು ಗುರುತಿಸಿ, ಅದಕ್ಕೆ ತಕ್ಕನಾಗಿ ಗಡಿಯಾರದಲ್ಲಿ ಎಚ್ಚರಿಕೆ ಗಂಟೆ ನಿಗದಿಮಾಡಿರಿ.
• ನಾಳೆ ಪರೀಕ್ಷೆ ಎಂದು ಮಧ್ಯರಾತ್ರಿವರೆಗೂ ಓದದೇ ಸರಿಯಾದ ಸಮಯಕ್ಕೆ ಹಾಸಿಗೆಯತ್ತ ಸಾಗಿರಿ.

ಪರೀಕ್ಷೆಯ ದಿನದಂದು

• ಮುಂಜಾನೆ ಬೇಗನೇ ಎದ್ದು, ದೈನಂದಿನ ಕಾರ್ಯಕ್ರಮಗಳನ್ನು ಮುಗಿಸಿಕೊಂಡು ಸಿದ್ಧರಾಗಬೇಕು.
• ಮನೆ ಬಿಡುವ ಮುಂಚೆ ಪರೀಕ್ಷಾ ಸಾಮಗ್ರಿ ಮತ್ತು ನೋಂದಣಿ ಪತ್ರಗಳನ್ನು ಜತೆಯಲ್ಲಿಟ್ಟುಕೊಳ್ಳುವುದನ್ನು ಮರೆಯಬಾರದು.
• ಪರೀಕ್ಷಾ ಕೇಂದ್ರವನ್ನು ಸರಿಯಾಗಿ ನೋಡಿಕೊಂಡು, ಅದನ್ನು ತಲುಪುವ ವೇಳೆಯನ್ನು ಗಮನಿಸಿ, ಸಾಧ್ಯವಾದಷ್ಟು ಮುಂಚಿತವಾಗಿ ಹೊರಡಬೇಕು.
• ಪರೀಕ್ಷೆ ಆರಂಭಕ್ಕೆ ಸಾಕಷ್ಟು ಸಮಯವಿರುವಾಗಲೇ ಪರೀಕ್ಷಾ ಕೇಂದ್ರ ತಲುಪಬೇಕು. ಸ್ವಲ್ಪ ತಡವಾದರೆ ಎಡವಟ್ಟಾಗುತ್ತದೆ. ಒಂದರಿಂದ ಮತ್ತೊಂದು ಎಡವಟ್ಟಾದರೆ ಅಲ್ಲಿಗೆ ಆ ವರ್ಷದ ಪರೀಕ್ಷಾ ಕಥೆ ಮುಗಿದಂತೆ ನೆನಪಿರಲಿ!

ಪರೀಕ್ಷಾ ಕೊಠಡಿಯೊಳಗೆ

• ಪ್ರಶ್ನೆಪತ್ರಿಕೆಯನ್ನು ಒಂದು ಸಾರಿ ಸಂಪೂರ್ಣವಾಗಿ ಓದಬೇಕು.
• ಉತ್ತರ ಬರೆವ ಮುಂಚೆ ಪ್ರಶ್ನೆಯನ್ನು ಅರ್ಥಮಾಡಿಕೊಳ್ಳಬೇಕು.
• ಉತ್ತರ ಬರೆಯಲು ಆರಂಭಿಸುವುದಕ್ಕಿಂತ ಮುಂಚೆ ಏನು ಬರೆಯುತ್ತೇನೆ ಎಂಬುದನ್ನು ಒಂದು ಕ್ಷಣ ಯೋಚಿಸಿ. ಪ್ರಶ್ನೆಯ ಮಾದರಿಗೆ ಅನುಗುಣವಾಗಿ ಅಂದರೆ ದೀರ್ಘ ಉತ್ತರ, ಕಿರು ಉತ್ತರ ಮುಂತಾದವುಗಳಿಗೆ ಬೇಕಾದಷ್ಟು ಸಮಯ ಬಳಸಿಕೊಳ್ಳುವುದು. ಕೆಲವು ಪ್ರಶ್ನೆಗಳಿಗೆ ಉತ್ತರ ಗೊತ್ತಾಗದಿದ್ದರೆ ತಕ್ಷಣ ಆತಂಕಗೊಳ್ಳಬಾರದು. ಆ ಪ್ರಶ್ನೆ ಬಿಟ್ಟು ಮುಂದೆ ಸಾಗುವುದು. ಕೊನೆಗೆ ಮತ್ತೆ ಆ ಪ್ರಶ್ನೆಯನ್ನು ಗಮನಿಸಿ. ಸರಿಯಾಗಿ ನೆನಪು ಮಾಡಿಕೊಂಡರೆ ಅದರ ಉತ್ತರ ಹೊಳೆಯುತ್ತದೆ.
• ಪರೀಕ್ಷೆಯಲ್ಲಿ ಉತ್ತರಗಳನ್ನು ಸುಂದರವಾಗಿ ಮತ್ತು ಸ್ಪಷ್ಟವಾಗಿ ಬರೆಯಬೇಕು. ಅದು ಮೌಲ್ಯಮಾಪಕರನ್ನು ಆಕರ್ಷಿಸುತ್ತದೆ. ಅದರ ಫಲವಾಗಿ ಉತ್ತಮ ಅಂಕಗಳು ನಿಮಗೆ ಸಿಗುತ್ತವೆ.
• ಸಕಾರಾತ್ಮಕ ಯೋಚನೆಗಳು ಸಾಮರ್ಥ್ಯವನ್ನು ಹೆಚ್ಚಿಸುತ್ತ, ಸಮಸ್ಯೆಯನ್ನು ಬಿಡಿಸುವ ಶಕ್ತಿ ವೃದ್ಧಿಸುತ್ತವೆ. ಆ ನಿಟ್ಟಿನತ್ತ ನೀವು ಸಾಗಿನೋಡಿ.

| ಪರಮೇಶ್ವರಯ್ಯ ಸೊಪ್ಪಿಮಠ ಶಿಕ್ಷಕರು