ಮಕ್ಕಳ ಮೈಮೇಲೆ ಆಗುವ ಗಾಯಗಳನ್ನು ಯಾವ ಪಾಲಕರು ತಾನೇ ಸಹಿಸಿಯಾರು? ಅಭಿಷೇಕ್ನ ಅಮ್ಮ ಕರಾಟೆಗೆ ಹೋಗಲೇಬೇಡ ಎಂದು ಒತ್ತಾಯಿಸಿದರು. ನಾಗರಿಕ ಸೇವೆಯ ಕೋರ್ಸ್ ಪಡೆದು ಒಳ್ಳೆಯ ಉದ್ಯೋಗ ಪಡಿ ಎಂದು ಹೇಳಿದರೆ, ಅದಕ್ಕೆ ಹ್ಞೂಂ ಎಂದು ಗೋಣಾಡಿಸಿದ ಅಭಿಷೇಕ್, ಮನಸ್ಸಿನಲ್ಲಿ ಮಾತ್ರ ಮಾರ್ಷಲ್ ಆರ್ಟ್ ಪಟುವಾಗಬೇಕು ಎಂದು ಪಣತೊಟ್ಟಿದ್ದ. ಪಾಲಕರ ಅಣತಿಯಂತೆ ಪಿಯುಸಿ ಮುಗಿಸಿದ ನಂತರ ಅಭಿಷೇಕ್ ಕರ್ನಾಟಕ ಮುಕ್ತ ವಿಶ್ವವಿದ್ಯಾಲಯದ ದೂರ ಶಿಕ್ಷಣದ ಮೂಲಕ ಬ್ಯಾಚಲರ್ ಆಫ್ ಇನ್ಫಾಮೇಷನ್ ಟೆಕ್ನಾಲಜಿ ತರಬೇತಿಗೆ ಅರ್ಜಿ ಹಾಕಿದ. ಆದರೆ ತನ್ನ ಜೀವನದ ಗುರಿಯನ್ನೂ ಬಿಡದೆ ಸಮರ ಕಲೆಗಳಲ್ಲಿ ತರಬೇತಿಯನ್ನೂ ಪಡೆಯುತ್ತಾ ಐಕಿಡೋ, ಜಿಟ್ಸು ಮತ್ತು ಕರಾಟೆಗಳಲ್ಲಿ ಸಾಧನೆಯನ್ನೂ ಮಾಡಿದ.
