ಅಮೆರಿಕನ್/ನ್ಯಾಟೋ ಸೇನೆ ಅಫ್ಘಾನಿಸ್ತಾನದಿಂದ ಹೊರನಡೆಯುವ ಸ್ಪಷ್ಟ ವೇಳಾಪಟ್ಟಿ ವರ್ಷಾರಂಭದಲ್ಲಿ ತಯಾರಾಗಿ ಮಾರ್ಚ್-ಏಪ್ರಿಲ್ ಹೊತ್ತಿಗೆ ಅದರ ಹಂತಹಂತದ ಅನುಷ್ಠಾನವೂ ಆರಂಭವಾಯಿತಷ್ಟೆ. ಆಗ ಕಾಶ್ಮೀರವನ್ನು ಬದಿಗಿಟ್ಟು ಅಪ್ಘಾನಿಸ್ತಾನವನ್ನು ಗಂಭೀರವಾಗಿ ತೆಗೆದುಕೊಂದ ಪಾಕಿಸ್ತಾನದ ಐಎಸ್ಐ ಸುಮಾರು ಹತ್ತು ಸಾವಿರದಷ್ಟು ಲಷ್ಕರ್-ಎ-ತೊಯ್ಬಾ, ಜೈಶ್-ಎ-ಮೊಹಮ್ಮದ್, ಲಷ್ಟರ್-ಎ-ಜಾಂಗ್ವಿ ಭಯೋತ್ಪಾದಕರನ್ನು ಅಫ್ಘಾನಿಸ್ತಾನಕ್ಕೆ ಕಳುಹಿಸಿತು. ಸದ್ಯ ಕಾಶ್ಮೀರಕ್ಕೆ ಅಂಟಿದ್ದ ಮಾರಿ ಸ್ವಲ್ಪ ಬಿಡುವು ಕೊಡುತ್ತಿದೆಯಲ್ಲ ಎಂಬ ಸಮಾಧಾನ ನಮಗಾದರೂ ಅಪ್ಘಾನಿಸ್ತಾನಕ್ಕೆ ಪಾಕ್ ಭಯೋತ್ಪಾದಕರ ದಂಡು ನುಗ್ಗುವುದೂ ನಮಗೆ ನೆಮ್ಮದಿ ತರುವ ವಿಷಯವಾಗಿರಲಿಲ್ಲ. ಯಾಕೆಂದರೆ ಅವರ ಪ್ರಮುಖ ಗುರಿ ಅಮೆರಿಕದ್ದಾಗಲೀ, ನ್ಯಾಟೋದಾಗಲೀ ಸೇನೆಗಳಾಗಿರಲಿಲ್ಲ. ಐಎಸ್ಐ ಅವರಿಗೆ ಕೊಟ್ಟ ಆದೇಶ ಕಳೆದ ಹದಿನೆಂಟು ವರ್ಷಗಳಿಂದ ಭಾರತ ಅಲ್ಲಿ ಮಾಡಿದ್ದ ಒಳ್ಳೆಯ ಕೆಲಸಗಳನ್ನೆಲ್ಲ ಹಾಳುಗೆಡವುವುದು ಮತ್ತು ಭಾರತೀಯರನ್ನು ಕೊಲ್ಲುವುದಾಗಿತ್ತು. ನಿರಂತರ ಅಶಾಂತಿಯಿಂದ ಜರ್ಜರಿತವಾಗಿಹೋಗಿದ್ದ ಅಫ್ಘಾನಿಸ್ತಾನದ ಪುನರ್ನಿಮಾಣವನ್ನು ಕೈಗೆತ್ತಿಕೊಂಡು ಅಲ್ಲಿ ನಿರ್ವಿುಸಿದ್ದ ಸಂಸತ್ ಭವನವೂ ಸೇರಿ ಹಲವಾರು ಸರ್ಕಾರಿ ಕಟ್ಟಡಗಳು, ಶಾಲೆಕಾಲೇಜುಗಳು, ಅಣೆಕಟ್ಟೆಗಳು ಮತ್ತು ರಸ್ತೆಗಳು ಹಾಳಾಗಬಹುದು ಅಥವಾ ಅಪಾತ್ರರ ಕೈಗೆ ಬೀಳಬಹುದು; ಈ ಕೆಲಸಗಳಲ್ಲಿ ತೊಡಗಿದ್ದ ಸಾವಿರಾರು ಭಾರತಿಯರ ಜೀವಗಳಿಗೆ ಅಪಾಯವುಂಟಾಗಬಹುದು, ತಾನು ತೊಡಗಿಸಿದ್ದ ಸುಮಾರು ಮೂರು ಬಿಲಿಯನ್ ಡಾಲರ್ಗಳು ವ್ಯರ್ಥವಾಗಿಹೋಗಬಹುದು ಎಂಬ ಆತಂಕ ಭಾರತವನ್ನು ಗಂಭೀರವಾಗಿ ಕಾಡತೊಡಗಿದ್ದು ಆಗ. ಜುಲೈ-ಆಗಸ್ಟ್ನಲ್ಲಿ ಅಫ್ಘಾನಿಸ್ತಾನದ ಮೇಲೆ ತಾಲಿಬಾನ್ ಹಿಡಿತ ವಿಸ್ತರಿಸತೊಡಗಿದಂತೇ ಪಾಕಿಸ್ತಾನದಲ್ಲಿ ಸಂಭ್ರಮಾಚರಣೆ ಆರಂಭವಾಯಿತು. ಅಫ್ಘಾನಿಸ್ತಾನದಲ್ಲಿ ಗಟ್ಟಿಯಾಗಿ ನೆಲೆಯೂರಿದ ಮರುಕ್ಷಣ ತಾಲಿಬಾನಿಗಳು ಕಾಶ್ಮೀರಿಗಳ ಪರವಾಗಿ ಹೋರಾಟ ಆರಂಭಿಸುತ್ತಾರೆ, ‘ಘಜ್ವಾ-ಎ-ಹಿಂದ್’ ಅಂದರೆ ‘ಭಾರತದ ಮೇಲೆ ಮುಸ್ಲಿಮರ ಆಕ್ರಮಣ ಮತ್ತು ವಿಜಯ’ ಇನ್ನೇನು ಕೈಗೂಡುತ್ತದೆ ಎಂದೆಲ್ಲ ಪಾಕಿಸ್ತಾನಿ ಮಾಧ್ಯಮಗಳು ಕೂಗತೊಡಗಿದವು. ಆದರೆ ಇದನ್ನು ನಿರಾಕರಿಸಿದ ತಾಲಿಬಾನಿ ವಕ್ತಾರರು ಭಾರತದ ವಿರುದ್ಧ ಅಂತಹ ಯಾವುದೇ ಯೋಜನೆ ನಮ್ಮಲ್ಲಿಲ್ಲ ಎಂದು ಸಾರ್ವಜನಿಕವಾಗಿಯೇ ಘೊಷಿಸಿದರು. ಅಷ್ಟೇ ಅಲ್ಲ, ಅಫ್ಘನ್ ತಾಲಿಬಾನ್ನ ಅವಳಿಯಾದ ಪಾಕ್ ತಾಲಿಬಾನ್ ‘ತೆಹ್ರೀಕ್-ಎ-ತಾಲಿಬಾನ್ ಪಾಕಿಸ್ತಾನ’ ಪಾಕಿಸ್ತಾನದ ನೆಲದಲ್ಲೇ ಪಾಕ್ ಮತ್ತು ಚೀನೀಯರನ್ನು ಕೊಲ್ಲತೊಡಗಿ ಪಾಕ್ ಸರ್ಕಾರ ಮತ್ತು ಸೇನೆಗೇ ತಲೆನೋವು ತರತೊಡಗಿತು! ಆಗಸ್ಟ್ ಮಧ್ಯದಲ್ಲಿ ಕಾಬೂಲ್ ತಾಲಿಬಾನಿಗಳ ವಶವಾದ ಮೇಲೆ ಅಲ್ಲಿಗೆ ಧಾವಿಸಿದ ಪಾಕಿಸ್ತಾನದ ಐಎಸ್ಐ ನಿರ್ದೇಶಕ ಲೆಫ್ಟಿನೆಂಟ್ ಜನರಲ್ ಶೂಜಾ ಹಮೀದ್ ಎಲ್ಲವನ್ನೂ ಸಾಧಿಸಿದ್ದು ತಾನೇ ಎಂದು ಜಾಗತಿಕ ಮಾಧ್ಯಮಗಳ ಮುಂದೆ ಬೀಗಿದ್ದೂ ನಡೆಯಿತು. ಆದರೆ ತನ್ನ ಹರಕತ್ಗಳು ಹೀಗೆ ಬಹಿರಂಗವಾಗುವುದನ್ನು ಇಷ್ಟಪಡದ ಪಾಕ್ ಸೇನೆ ಹಮೀದ್ರನ್ನು ಪದವಿಯಿಂದ ಕೆಳಗಿಳಿಸಿ ಲೆಫ್ಟಿನೆಂಟ್ ಜನರಲ್ ನದೀಂ ಅಂಜುಂರನ್ನು ಆ ಸ್ಥಾನದಲ್ಲಿ ಕೂರಿಸಿತು. ಈ ವಿಷಯದಲ್ಲಿ ಸೇನಾ ಮುಖ್ಯಸ್ಥ ಜನರಲ್ ಕಮರ್ ಜಾವೇದ್ ಬಾಜ್ವಾ ಮತ್ತು ಪ್ರಧಾನಿ ಇಮ್ರಾನ್ ಖಾನ್ರ ನಡುವೆ ಅಭಿಪ್ರಾಯಭೇದವೆದ್ದು ಪಾಕ್ ವ್ಯವಸ್ಥೆಯಲ್ಲಿ ‘ಎಲ್ಲವೂ ಸರಿಯಾಗಿಲ್ಲ’ ಎಂಬ ಸುಳಿವನ್ನೂ ನೀಡಿತು. ಈಗ ತಾಲಿಬಾನ್ ಮತ್ತು ಪಾಕಿಸ್ತಾನದ ನಡುವೆಯೇ ತಾಳಮೇಳ ತಪ್ಪಿ ಕಳೆದ ವಾರಾಂತ್ಯದಲ್ಲಿ ಎರಡೂ ಸೇನೆಗಳು ಉಭಯ ದೇಶಗಳ ಗಡಿಯ ಉತ್ತರ ಭಾಗವಾದ ಕುನಾರ್- ಖೈಬರ್ ಪಖ್ತೂನ್ಖ್ವಾ ಗಡಿಯಲ್ಲಿ ಕಾಳಗಕ್ಕಿಳಿದಿವೆ. ಈ ಘರ್ಷಣೆಯಲ್ಲಿ ಫಿರಂಗಿಗಳು ಬಳಕೆಯಾದವು.
